ទីក្រុងវ៉ាស៊ីនតោន ៖ កាក់ប្រាក់អនុស្សាវរីយ៍តម្លៃ ១ ដុល្លារអាមេរិក ដែលមានរូបលោកប្រធានាធិបតី ដូណាល់ ត្រាំ (Donald Trump) ត្រូវបានរោងពុម្ពផលិតប្រាក់អាមេរិក (U.S. Mint) ប្រកាសដាក់ឱ្យចរាចរ និងលក់ជាផ្លូវការនៅថ្ងៃទី២ ខែកញ្ញា ឆ្នាំ ២០២៦ (ម៉ោងនៅសហរដ្ឋអាមេរិក)។ ព្រឹត្តិការណ៍នេះ ធ្វើឱ្យលោកក្លាយជាប្រធានាធិបតីកំពុងកាន់តំណែងដំបូងគេនៅក្នុងរយៈពេល១០០ឆ្នាំ ដែលមានរូបបោះពុម្ពនៅលើរូបិយប័ណ្ណអាមេរិក។ នេះបើតាមការចេញផ្សាយពី BBC និង Euronews។
US Mint បានដាក់ឱ្យដំណើរការកាក់អនុស្សាវរីយ៍តម្លៃ ១ ដុល្លារអាមេរិក ដែលមានរូបលោក ត្រាំ រួមជាមួយពាក្យស្លោក «យើងជឿជាក់លើព្រះ» ឬ «In God we trust» ដើម្បីអបអរសាទរខួបលើកទី ២៥០ នៃឯករាជ្យជាតិ ដោយបានបញ្ជាក់ថា កាក់ប្រាក់កំណែពិសេសនេះ បានបង្ហាញពីស្មារតី មោទនភាព និងកេរដំណែលនៃប្រជាជាតិមួយ ដែលកំពុងខិតជិតដល់ខួបដ៏សំខាន់ជាប្រវត្តិសាស្ត្ររបស់ខ្លួន។ កាក់នេះត្រូវបានបង្កើតឡើង ដើម្បីអបអរព្រឹត្តិការណ៍ប្រវត្តិសាស្ត្រជាតិដ៏សំខាន់ ជាមួយនឹងការរចនាសម្រាប់ខួបអនុស្សាវរីយ៍ដ៏កម្រមួយ ដែលកំណត់ថាជាការបំពេញបន្ថែមដ៏លេចធ្លោសម្រាប់ការផលិតកាក់ប្រាក់នាសម័យទំនើប។
កាក់មានពណ៌មាស ប៉ុន្តែផលិតឡើងពីល្បាយលោហៈស័ង្កសី ម៉ង់ហ្គាណែស នីកែល និងទង់ដែងទាំងនេះ ដែលត្រូវបានលក់ក្នុងតម្លៃ ៦១ ដុល្លារ សម្រាប់១បំពង់មាន ២៥ កាក់ និង ១៥៤,៥០ដុល្លារ សម្រាប់១កញ្ចប់មាន ១០០ កាក់នោះ ត្រូវបានរាយការណ៍ថា លក់អស់ពីស្តុកនៅលើគេហទំព័រផ្លូវការរបស់ US Mint ក្នុងរយៈពេលត្រឹមតែប៉ុន្មានម៉ោងប៉ុណ្ណោះ បន្ទាប់ពីការដាក់លក់ជាផ្លូវការ។
កាលពីខែឧសភាកន្លងទៅ រដ្ឋមន្ត្រីក្រសួងហិរញ្ញវត្ថុអាមេរិក លោក ស្កុត បេសិន (Scott Bessent) ធ្លាប់បានលើកឡើងដែរថា ក្រសួងកំពុងរៀបចំផែនការបោះពុម្ពក្រដាសប្រាក់ ២៥០ ដុល្លារអាមេរិកថ្មី ដែលមានរូបរបស់លោក ត្រាំ ប៉ុន្តែច្បាប់សហព័ន្ធបានហាមឃាត់ការបោះពុម្ពរូបិយប័ណ្ណអាមេរិកមានរូបបុគ្គលនៅមានជីវិត។ ទោះយ៉ាងណាក៏ដោយ ក្រុមសម្ព័ន្ធមិត្តរបស់លោក ត្រាំ នៅក្នុងសភាបានដាក់ស្នើច្បាប់ដែលអាចបង្កើតការលើកលែងមួយ ប៉ុន្តែសំណើនោះបច្ចុប្បន្នកំពុងជាប់គាំង។
យ៉ាងណាមិញ ស្ថិតក្រោមច្បាប់ពិសេសឆ្នាំ ២០២០ ដែលត្រូវបានអនុម័តតាំងពីអាណត្តិទី១ របស់លោក ត្រាំ ដើម្បីអនុញ្ញាតឱ្យមានការរចនាកាក់ពិសេសសម្រាប់អបអរសាទរខួប ២៥០ឆ្នាំ នៃទិវាឯករាជ្យជាតិសហរដ្ឋអាមេរិក។ នៅក្នុងអត្ថបទច្បាប់នោះ មានចែងហាមមិនឱ្យដាក់រូបបុគ្គលនៅមានជីវិតលើខ្នងកាក់ តែមិនបានចែងហាមឃាត់ចំពោះការដាក់លើផ្នែកខាងមុខកាក់ឡើយ។ ដូច្នេះហើយទើបបានជាក្រសួងរតនាគារអាមេរិកចាប់យកចំណុចនេះធ្វើជាមូលដ្ឋានច្បាប់ ដើម្បីដាក់រូបលោក ត្រាំ នៅផ្នែកខាងមុខកាក់។
គួររំលឹកជូនថា នេះមែនជាលើកទី១នោះទេ ខណៈកាក់ ៥០ សេនដុល្លារអាមេរិកមួយប្រភេទ ធ្លាប់ត្រូវបានបោះពុម្ពផ្សាយ ដើម្បីប្រារព្ធខួបលើកទី ១៥០ នៃទិវាឯករាជ្យជាតិ ក្នុងឆ្នាំ ១៩២៦ ដោយមានរូបលោក Calvin Coolidge ដែលជាប្រធានាធិបតីនាពេលនោះ។ ដូច្នេះតាមរយៈនេះ លោក ត្រាំ បានក្លាយជាប្រធានាធិបតីកំពុងកាន់តំណែងដំបូងគេក្នុងរយៈពេល១០០ឆ្នាំ ដែលមានរូបនៅលើកាក់ប្រាក់ដុល្លារអាមេរិក៕
ចែករំលែកព័តមាននេះ