មនុស្សគ្រប់រូបតែងតែធ្វើដំណើរហើយការធ្វើដំណើរទាំងនោះគឺពិតជាត្រូវការចំណាយ ។ ដើម្បីកាត់បន្ថយការចំណាយ។ ខាងក្រោមនេះគឺជាគន្លឹះដែលលោកអ្នកគួរគិតមុនពេលដំណើរ៖
១-គិតពីទីកន្លែងទិញសម្ភារដែលនៅជិតផ្ទះ ៖ ប្រសិនបើអាចទិញសម្ភារក្នុងហាងដែលនៅក្បែរលំនៅឋានរបស់លោកអ្នកបាន លោកអ្នកមិនចាំបាច់ទៅទិញនៅហាងឆ្ងាយទេ ព្រោះនាំឱ្យលោកអ្នកចំណាយថវិកាក្នុងការធ្វើដំណើរ និងខាតបង់ពេលវេលាទៀតផង ។
២-ធ្វើដំណើរដោយថ្មើរជើងទៅកាន់ចំណតរថយន្តក្រុងឬស្ថានីយរថភ្លើង៖ លោកអ្នកគួរធ្វើដំណើរដោយថ្មើរជើងទៅកាន់ចំណតរថយន្តក្រុង ឬស្ថានីយរថភ្លើង ប្រសិនបើនៅជិតលំនៅឋាន ព្រោះលោកអ្នកចំណេញទាំងថវិកា និងទទួលបានសុខភាពល្អផងដែរ។
៣-កាត់បន្ថយការបើកបរ៖ ការដើរ ការជិះកង់ ឬធ្វើដំណើរដោយរថយន្តក្រុងជំនួសរថយន្តផ្ទាល់ខ្លួនសម្រាប់រយៈចម្ងាយខ្លី ដើម្បីចៀសវាងការកកស្ទះចរាចរណ៍ ខាតបង់ពេលវេលា និងចំណាយថវិកាច្រើន។
៤-ត្រួតពិនិត្យរថយន្តរបស់លោកអ្នកឱ្យបានទៀងទាត់៖ ក្នុងការថែរក្សាយានយន្តឱ្យដំណើរការបានល្អ ។ លោកអ្នកត្រូវប្តូរប្រេងម៉ាស៊ីនឱ្យបានទៀងទាត់ ដើម្បីកាត់បន្ថយសំណឹកដោយសារប្រព័ន្ធម៉ាស៊ីនដំណើរការ ។
៥-ទម្លាប់អនុវត្តការបើកបរឱ្យបានល្អ៖ ចូររៀបចំទម្លាប់នៃការបើកបរឱ្យបានល្អ ចៀសវាងការស្ទះចរាចរណ៍ ដែលអាចបណ្តាលឱ្យរថយន្តប្រើប្រាស់ប្រេងច្រើន និងកុំបើកបរលឿនពេក។(ល្បឿននៃការបើកបរដ៏ប្រសើរបំផុតសម្រាប់សន្សំសំចៃប្រេងគឺចាប់ពី៦០ទៅ៨៥គីឡូម៉ែត្រ ក្នុងមួយម៉ោង)។ ជាពិសេស សូមបើកបរដោយសន្សឹមៗ បង្កើនឬបន្ថយល្បឿនកុំបង្ខំ ពេលនោះរថយន្តរបស់លោកអ្នកនឹងស៊ីប្រេងតិច។ ប្រសិនបើលោកអ្នកបើកម៉ាស៊ីនត្រជាក់នៅពេលបើកបរក្នុងអាកាសធាតុក្តៅ រថយន្តនឹងស៊ីប្រេង២០%បន្ថែមទៀត។ ដូច្នេះលោកអ្នកគួរថែរក្សារថយន្តឱ្យនៅត្រជាក់ និងចតវានៅកន្លែងដែលមានម្លប់ ។ លោកអ្នកគួរតែយកសម្ភារដែលមិនសំខាន់ចេញពីរថយន្តដើម្បីកាត់បន្ថយទម្ងន់ ដែលបណ្តាលឱ្យរថយន្តស៊ីប្រេងច្រើនផងដែរ។
៦-សន្សំសំចៃទៅលើការចតរថយន្ត៖ សូមស្វែងរកចំណតរថយន្តដែលមានតម្លៃថោកបំផុតនៅជុំវិញកន្លែងរបស់លោកអ្នក ៕
ចែករំលែកព័តមាននេះ