ដូចត្រីងៀតឆ្លៀតពងហើយ ! ម្ចាស់ដេប៉ូលក់ខ្សាច់ មិនគោរពការណែនាំធ្វើឱ្យខ្សាច់ជ្រុះរាយតាមផ្លូវ
- កំពង់ចាម
ខេត្តកំពង់ចាម ៖ រថយន្តធំៗប្រភេទវេអង (V1) មានទ្រុងវែងៗបានដឹកខ្សាច់ចេញពីដេប៉ូលក់គ្រួសខ្សាច់ នៅភូមិតាមៀង ឃុំកោះរការ ស្រុកកំពង់សៀម រាល់ថ្ងៃកាត់តាមផ្លូវថ្នល់ ដោយហូរកំពប់ស្រកទាំងទឹកដោយមិនខ្លាចរអែង និងគោរពតាមការណែនាំរបស់មន្ទីរបរិស្ថានខេត្តនោះឡើយ ប្រៀបដូចត្រីងៀតឆ្លៀតពងហើយ ។
លោក ផន ផូ មេឃុំកោះរកាប្រាប់ឲ្យដឹងថា ចំពោះដេប៉ូលក់ខ្សាច់ទាំងបីកន្លែងនៅក្នុងភូមិតាមៀងនោះមាន ១-ឆយ គឹមសែ ២-ហៀង វិបុល និងអ្នកទីបីមិនចាំឈ្មោះ បានធ្វើអាជីវកម្មលក់ដូររាល់ថ្ងៃ ។ ជាមួយនោះ អាជ្ញាធរធ្លាប់បានណែនាំឲ្យពួកគាត់សម្អាតខ្សាច់ដែលជ្រុះរាយប៉ាយនៅមាត់ច្រកចូលកន្លែងដេប៉ូនីមួយៗឱ្យស្អាត តែមានការយឺតយ៉ាវធ្វើឲ្យខ្សាច់ជ្រុះដដែល សូម្បីតែរូបលោកផ្ទាល់ធ្លាប់ជិះម៉ូតូប៊ិះដួលស្របពេលដែលរថយន្តមកពីក្រោយសំណាងណាស់ដែលមិនអី ។
លោកមេឃុំកោះរកាបានបន្តឱ្យដឹងទៀតថា មានពេលខ្លះប្រជាពលរដ្ឋរាយការណ៍មកអាជ្ញាធរថារថយន្តដឹកខ្សាច់បានបង្ករសំឡេងរំខាននិងដឹកខ្សាច់មិនបានគ្របទទួលបានព័ត៌មាននេះអាជ្ញាធរចុះទៅណែនាំជាបន្តបន្ទាប់ ដោយតម្រូវឲ្យម្ចាស់ដេប៉ូទាំងបីកន្លែងគោរពច្បាប់ ។ អាជ្ញាធរមានការព្រួយបារម្ភដោយខ្លាចរថយន្តធុនធំដឹកខ្សាច់លើសទម្ងន់ធ្វើឲ្យស្រុតខូចផ្លូវជាមួយនឹងបញ្ហាប្រឈម បើខ្សាច់នៅតែជ្រុះរាយប៉ាយបែបនេះ និងរអិលបង្កគ្រោះថ្នាក់ដល់ពលរដ្ឋនិងសិស្សសាលាដែលមករៀននៅវិទ្យាល័យតាមៀង ។
លោក ហៀង វិបុល ម្ចាស់ដេបូរខ្សាច់បានប្រាប់តាមទូរសព្ទឱ្យដឹងនាល្ងាចថ្ងៃទី ១ ខែកញ្ញា ឆ្នាំ ២០២៦ ថា ក្រោយពីមានការណែនាំរបស់មន្ត្រីជំនាញបានធ្វើឲ្យម្ចាស់ដេប៉ូលក់ខ្សាច់ទាំងបីកន្លែងនាំគ្នាគោរពច្បាប់ដោយរថយន្តដែលចូលមកដឹកមិនឲ្យលើសទម្ងន់នោះទេ ។ ហើយបើបើកឆ្លងកាត់ស្ថានីយ៍ថ្លឹងរថយន្តគេរកឃើញលើសទម្ងន់នឹងត្រូវផាកពិន័យ ។
លោក នួន គង់សល្យ ប្រធានមន្ទីរបរិស្ថានខេត្តបានឱ្យដឹងថា មន្ត្រីរបស់លោកធ្លាប់បានចុះទៅណែនាំតាមដេប៉ូលក់គ្រួសខ្សាច់ក្នុងខេត្តជាប់ដងទន្លេមេគង្គជារឿយៗ តែពេលដែលមន្ត្រីជាប់រវល់កិច្ចការផ្សេង ម្ចាស់ដេប៉ូ បើមិនគោរពគឺត្រីងៀតឆ្លៀតពងធ្វើឱ្យខ្សាច់ជ្រុះរាយប៉ាយតាមផ្លូវដដែល ។ ទទួលបានការណែនាំពីសំណាក់អភិបាលខេត្តបានជំរុញឲ្យមន្ត្រីជំនាញចុះណែនាំបន្ថែមទៀត ។
លោក ធីម វេ ប្រធានស្ថានីយថ្លឹងរថយន្តលើកំណត់ផ្លូវជាតិលេខ ៧ ក្នុងស្រុកកំពង់សៀម បានឱ្យដឹងដែរថា នៅក្នុងឆមាសទី ១ ឆ្នាំ ២០២៦ រថយន្តគ្រប់ប្រភេទដែលបានបើកឆ្លងកាត់កន្លែងថ្លឹងរថយន្តសរុបមានចំនួនជាង៣ម៉ឺនគ្រឿង ក្នុងនោះបានរកឃើញដឹកលើសទម្ងន់ ៣២គ្រឿង ត្រូវបានផាកពិន័យសរុបទឹកប្រាក់ជាង៥៣លានរៀល ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ