សហគមន៍កសិកម្មឃុំកោះរកា ដាំបន្លែគ្មានជាតិគីមី សម្រាប់ផ្គត់ផ្គង់ទីផ្សារ បង្កើនទំនុកចិត្តសម្រាប់អ្នកបរិភោគ
- ព្រៃវែង
ខេត្តព្រៃវែង ៖ សហគមន៍កសិកម្មឃុំកោះរកា ស្រុកពាមជរ ខេត្តព្រៃវែង កំពុងបង្កើនការដាំដុះបន្លែគ្មានជាតិគីមី ដើម្បីផ្គត់ផ្គង់តម្រូវការអ្នកប្រើប្រាស់ក្នុងស្រុក និងរួមចំណែកលើកកម្ពស់វិស័យកសិកម្មក្នុងតំបន់ផងដែរ។
លោក ម៉ៅ ម៉ិ ហៅ ចន្ទដារា លេខាសហគមន៍កសិកម្មឃុំកោះរកា បានឱ្យដឹងថា បច្ចុប្បន្ននៅក្នុងឃុំកោះរកា មានប្រជាពលរដ្ឋមកពីភូមិចំនួន៤ ដែលកំពុងចូលរួមដាំបន្លែបែបធម្មជាតិ រួមមាន ភូមិស្វាយជ្រុំ ភូមិដីស្រុត ភូមិជ្រៃថ្មី និងភូមិកោះរកា។
បន្លែដែលប្រជាកសិករបានដាំដុះមានច្រើនប្រភេទ ដូចជា ត្រសក់ ត្រឡាច ល្ពៅ ខាត់ណា ត្រប់ស្រួយ ម្ទេស និងម្រះ ជាដើម។ បន្ទាប់ពីប្រមូលផល បន្លែមួយចំនួនត្រូវបានដឹកជញ្ជូនទៅកាន់ទីផ្សារនានា ដូចជា រាជធានីភ្នំពេញ ក្រុងតាខ្មៅ តំបន់កៀនស្វាយ អ្នកលឿង និងតំបន់ផ្សេងៗទៀត តាមតម្រូវការទីផ្សារ។
លោក ម៉ៅ ម៉ិ ហៅ ចន្ទដារា បានលើកឡើងថា សហគមន៍កសិកម្មឃុំកោះរកា មានបំណងចង់ឱ្យប្រជាពលរដ្ឋនៅតាមបណ្ដាឃុំស្រុកដទៃទៀត ចូលរួមដាំបន្លែធម្មជាតិឱ្យបានកាន់តែច្រើន ដើម្បីលើកកម្ពស់គុណតម្លៃបន្លែខ្មែរ ផ្តល់ជម្រើសអាហារសុវត្ថិភាពដល់អ្នកប្រើប្រាស់ និងចូលរួមកាត់បន្ថយការពឹងផ្អែកលើការនាំចូលបន្លែពីក្រៅប្រទេស។
លោកបានបញ្ជាក់ថា ប្រសិនបើប្រជាពលរដ្ឋនៅក្នុងឃុំកោះរកា ឬតំបន់ជិតខាង មានបំណងចង់ដាំបន្លែបែបធម្មជាតិ ទាំងសម្រាប់ទុកបរិភោគក្នុងគ្រួសារ និងសម្រាប់ផលិតជាទំនិញលក់នៅលើទីផ្សារ អាចមកសហការនិងរៀនសូត្រពីបច្ចេកទេសដាំដុះ ជាមួយសហគមន៍កសិកម្មឃុំកោះរកាបាន។ មន្ត្រី និងសមាជិកសហគមន៍ត្រៀមខ្លួនចូលរួមផ្តល់ការណែនាំ និងចែករំលែកបទពិសោធន៍អំពីបច្ចេកទេសដាំដុះបន្លែបែបធម្មជាតិ ដើម្បីជួយឱ្យដំណាំមានការលូតលាស់ល្អ ឆាប់ទទួលបានផល និងមានគុណភាព។
ជាមួយគ្នានេះ សហគមន៍កសិកម្មឃុំកោះរកា ក៏សូមអញ្ជើញប្រជាពលរដ្ឋ អ្នកប្រើប្រាស់ និងអាជីវករដែលមានបំណងចង់ទិញបន្លែបែបធម្មជាតិ អាចមកទំនាក់ទំនង និងស្វែងរកទិញផលិតផលបន្លែពីសហគមន៍កសិកម្មឃុំកោះរកាបាន ដើម្បីចូលរួមគាំទ្រផលិតផលកសិកម្មក្នុងស្រុក និងលើកទឹកចិត្តដល់ប្រជាកសិករខ្មែរ។
លោក ម៉ៅ ម៉ិ បានអំពាវនាវដល់ប្រជាពលរដ្ឋឱ្យចូលរួមដាំដុះបន្លែធម្មជាតិឱ្យបានកាន់តែច្រើន ព្រោះការរួមគ្នាផលិតបន្លែក្នុងស្រុក មិនត្រឹមតែជួយបង្កើនប្រាក់ចំណូលដល់គ្រួសារកសិករប៉ុណ្ណោះទេ ប៉ុន្តែថែមទាំងជួយផ្គត់ផ្គង់បន្លែស្រស់ៗដល់ទីផ្សារ និងកាត់បន្ថយការពឹងផ្អែកលើបន្លែនាំចូលពីក្រៅប្រទេសផងដែរ៕
ចែករំលែកព័តមាននេះ