ហ្វូងដំរីព្រៃចូលរាតត្បាតភូមិអ្នកស្រុកផ្អើលទាំងយប់
- ព្រះវិហារ
ខេត្តព្រះវិហារ ៖ ប្រជាពលរដ្ឋនៅស្រុកត្បែងមានជ័យ ខេត្តព្រះវិហារ មានការភ័យស្លន់ស្លោរបន្ទាប់ពីហ្វូងដំរីព្រៃចំនួន ៦ក្បាល (ធំ៣ កូន៣) បានចូលមកលុកលុយក្នុងភូមិសាស្ត្រ នៅវេលាយប់ថ្ងៃទី៣០ សីហា ២០២៦ ។ ហេតុការណ៍នេះបានបង្កការខូច ខាតដល់ផលដំណាំកសិកម្មយ៉ាងដំណំ និងតម្រូវឱ្យអាជ្ញាធរជម្លៀសជនងាយរងគ្រោះចេញពីតំបន់គ្រោះថ្នាក់ ។
យោងតាមប្រភពពីរដ្ឋបាលស្រុកត្បែងមានជ័យ ហ្វូងដំរីព្រៃខាងលើបានចូលមកបំផ្លាញដំណាំក្នុងឃុំពោធិ៍ នៅភូមិជូនគង់ ត្រពាំងក្រវ៉ាន់ ពាមអារោញ និងស្រោងស្រឡៅ ដែលមានចម្ងាយប្រមាណ ៥គីឡូម៉ែត្រពីសាលាឃុំ ។ ក្រៅពីការស៊ីដំណាំពោត និងដូង ដោយហ្វូងដំរីក៏មានការចូលលុកលុយបន្ថែមពីសត្វជ្រូកព្រៃ ។
លោក មឿន សុភេទ ប្រធានមន្ទីរបរិស្ថានខេត្តព្រះវិហារ បានបញ្ជាក់ថា ក្រុមការងារជំនាញកំពុងចុះស្រង់ទិន្នន័យដើម្បីវាយ តម្លៃកម្រិតនៃការខូចខាត ។ យោងតាមប្រភពព័ត៌មានឱ្យដឹងថា ដើម្បីការពារអាយុជីវិតពលរដ្ឋ អាជ្ញាធរមូលដ្ឋានសហការជាមួយកម្លាំងចម្រុះបានបើកប្រតិបត្តិការសង្គ្រោះបន្ទាន់ ដោយជម្លៀសប្រជាពលរដ្ឋចាស់ជរា និងកុមារ ចេញពីតំបន់ប្រឈមទៅកាន់ទីសុវត្ថិភាព ឬសាលារៀន ។ នៅវេលាម៉ោងប្រហែល១១យប់ថ្ងៃទី៣០ សីហា ២០២៦ ។ សកម្មភាពនេះធ្វើឡើងយ៉ាងប្រញាប់ប្រញាល់ ដោយប្រើប្រាស់រថយន្ត និងរទេះផ្សេងៗ ក្រោមពន្លឺភ្លើងពិល និងភ្លើងរថយន្ត ដើម្បីធានាសុវត្ថិភាពពីការគំរាមកំហែងរបស់សត្វព្រៃ ដោយសារមុននេះមានអ្នកភូមិ២នាក់ ត្រូវបានរងរបួសដោយដំរីដេញព្រិច ។
លោក ខឹម សិត អភិបាលរងស្រុកត្បែងមានជ័យ និងជាប្រធានលេខាធិការដ្ឋានគណៈបញ្ជាការឯកភាពរដ្ឋបាលស្រុកបានបញ្ជាក់ថា ក្រុមការងារចម្រុះកំពុងពង្រឹងការត្រួតពិនិត្យ និងដាក់ចេញវិធានការការពារយ៉ាងតឹងរឹង ដើម្បីទប់ស្កាត់មិនឱ្យសត្វព្រៃបន្តចូលមកក្នុងភូមិ រស់នៅរបស់ប្រជាពលរដ្ឋ ។ ជាមួយគ្នានេះ រដ្ឋបាលស្រុកបានអំពាវនាវដល់សាធារណជននិងពលរដ្ឋ រស់នៅក្បែរតំបន់កើតហេតុ បង្កើនការប្រុងប្រយ័ត្នខ្ពស់ និងរាយការណ៍បន្ទាន់មកកាន់អាជ្ញាធរនៅពេលសង្កេតឃើញការបំលាស់ទីរបស់ហ្វូងដំរី ដើម្បីចៀសវាងគ្រោះថ្នាក់ជាយថាហេតុ ។ ក្រុមមន្ត្រីបានឱ្យដឹងថាពួកវាបានចូលបំផ្លាញដំណាំនៅតាមចម្ការ ។
ហ្វូងដំរីព្រៃនេះធ្លាប់បានចូលមកក្បែរភូមិអ្នកស្រុក ហើយក្រុមការងារមន្ទីរបរិស្ថានខេត្តព្រះវិហារ សហការជាមួយបុគ្គលិកជំនាញមកពីអង្គការ WCS និងរដ្ឋបាលស្រុកត្បែងមានជ័យ ចាប់តាំងពីថ្ងៃទី១២ ខែសីហា ឆ្នាំ២០២៦ រហូតមកដល់ពេលនេះ បាននិងកំពុងតាមដានដំណើរនិងការស្នាក់នៅរបស់ដំរីព្រៃមួយហ្វូង ចំនួន៦ក្បាល ក្នុងនោះមានកូនតូច១ក្បាល ដែលបានដើរចូលមកក្បែរ នៅចំណុចព្រៃកែង ស្រោងស្រឡៅ នៅដែនជម្រកសត្វព្រៃឆែប-ព្រះរការ ក្នុងស្រុកត្បែងមានជ័យ ខេត្តព្រះវិហារ ។
ក្រុមការងារបានចុះអង្កេតឃ្លាំមើលជាក់ស្តែង និងប្រើប្រាស់បច្ចេកវិទ្យាដ្រូន ដើម្បីត្រួតពិនិត្យរកឃើញហ្វូងសត្វដំរី ស្ថិតនៅចម្ងាយប្រហែល៣គីឡីម៉ែត្រពីភូមិអ្នកស្រុក ។ ហ្វូងដំរីខាងលើ បានធ្វើដំណើរនិងរស់នៅ ដោយមិនបង្កបញ្ហាអ្វីជាមួយមនុស្ស នៅចំណុចអូរស្រោងស្រឡៅ ដែលជាកន្លែងស្នាក់នៅរបស់ពួកវា តែដោយសារការស្វែងរកចំណី ទើបពួកវាតែងចូលស៊ីផលដំណាំអ្នកស្រុកក្នុងចម្ការ ។
ក្រុមមន្ត្រីបានបញ្ជាក់ថា តាមការសិក្សាស្រាវជ្រាវ សត្វដំរីព្រៃនៅដែនជម្រកសត្វព្រៃឆែប-ព្រះរការ មានចន្លោះពី១៥ក្បាល ទៅ២០ក្បាល ដែលត្រូវបានយកចិត្តទុកដាក់ និងអភិរក្ស ។ ដំរីព្រៃឬដំរីអាស៊ី ជាប្រភេទសត្វដែលជិតផុតពូជនៅលើពិភពលោក តែនៅបន្តមានវត្តមាននៅក្នុងប្រទេសកម្ពុជា ។ យោងតាមទិន្នន័យពីការស្រាវជ្រាវរបស់មន្ត្រីជំនាញ ក្រសួងបរិស្ថាន និងដៃគូពាក់ព័ន្ធ នៅក្នុងតំបន់ការពារធម្មជាតិនានា បានរកឃើញថា ដំរីអាស៊ីឬដំរីព្រៃ បានរស់នៅជាហ្វូង ហើយមានឃើញ កូនតូចៗជាច្រើនថែមទៀត ដែលមានប្រមាណ៦០០ក្បាល ។
មនុស្សនិងសត្វដំរីរស់នៅរួមគ្នាក្នុងតំបន់ការពារធម្មជាតិកែវសីមា
កន្លងមកនេះនៅខេត្តមណ្ឌលគិរីបានបង្ហាញនូវជម្លោះរវាងមនុស្ស និងដំរីជាធម្មតាតែងកើតឡើងដោយសារប្រតិកម្មបែបអវិជ្ជមាន ដោយសារសត្វដំរីបំផ្លាញដំណាំ និងផ្ទះរបស់មនុស្ស ហើយក្នុងករណីខ្លះអាចគំរាមកំហែងដល់អាយុជីវិតក៏មាន ។ ជួនកាល មនុស្សប្រឈមមុខនឹងការបាត់បង់ផលដំណាំសម្រាប់ចិញ្ចឹមជីវិត របស់ពួកគេ ដែលធ្វើឲ្យពួកគេឈានទៅរកការឆ្លើយតបបែបអវិជ្ជមាន ។ ដូចជា ការបាញ់សម្លាប់សត្វដំរី ការដាក់អន្ទាក់ និងការប្រើបន្ទះឈើរារាំងដោយដែកគោល ដើម្បីបញ្ឈប់សត្វដំរីមិនឱ្យចូលក្នុងចម្ការរបស់ពួកគេជាដើម ។
ក្រុមការងារ HWC នឹងដាក់កាមេរ៉ាស្វ័យប្រវត្តិនៅជិតកន្លែងជម្លោះ ដើម្បីថតរូបភាពសត្វដំរី និងកំណត់អត្តសញ្ញាណដំរីនោះ ។ ការធ្វើបែបនេះនឹងអនុញ្ញាតឱ្យក្រុមការងារសម្របសម្រួលការកាត់បន្ថយជម្លោះ រវាងមនុស្សជាមួយសត្វដំរីទាំងនោះនៅក្នុងតំបន់នាពេលអនាគត នឹងអនុញ្ញាតឱ្យក្រុមការងារអាចផ្ដល់ព័ត៌មានបានជាមុន ប្រសិនបើដំរីដែលបាន កំណត់អត្តសញ្ញាណត្រូវបានរកឃើញនៅជិតចម្ការរបស់ពួកគេ ។ អ្នកភូមិត្រូវបានណែនាំឱ្យប្រើឧឃោសនស័ព្ទ ដើម្បីបំពងសំឡេង ការដុតភ្លើងបំភ្លឺ និងប្រើពិលមានពន្លឺខ្លាំង ដើម្បីប្រឈមជាមួយសត្វដំរីព្រៃនៅពេលយប់ ៕
ចែករំលែកព័តមាននេះ