ឃើញអំពូលភ្លើងលោតភ្លឹបភ្លែត ស្មានតែដាច់ភ្លើង ម្ចាស់ផ្ទះជាគ្រូពេទ្យមិនចាប់អារម្មណ៍ ក៏ដេកលក់ ស្រាប់តែភ្លើងឆេះផ្ទះអស់គ្មានសល់ រត់គេចស្ទើរមិនទាន់
- សៀមរាប
ខេត្តសៀមរាប ៖ ម្ចាស់ផ្ទះ ដែលជាគ្រូពេទ្យ បំរើការងារនៅភ្នំពេញ កំពុងនាំគ្នាដេកលង់លក់ ខណៈឃើញអំពូលភ្លើងលោតភ្លឹបភ្លែតៗ ជាច្រើនដងស្មានតែភ្លើងរដ្ឋដាច់ ពេលភ្ញាក់ដឹងខ្លួនម្តង ភ្លើងឆេះផ្ទះអស់គ្មាន រត់ចេញស្ទើរមិនទាន់ បង្កការភ្ញាក់ផ្អើលពេញក្រុងសៀមរាប សំណាងល្អគ្មាននរណាម្នាក់របួសឡើយ ឬឆ្លងរាលដាលដល់ផ្ទះអ្នកជិតខាងឡើយ។
ហេតុការណ៍ខាងលើនេះ បង្កការភ្ញាក់ផ្អើលកើតឡើងនៅវេលាម៉ោង ០២ និង ៣០នាទីទៀបភ្លឺ ឈានចូលថ្ងៃទី២៩ ខែសីហា ឆ្នាំ២០២៦ នៅចំនុចក្នុង ក្រុមទី ១៧ ភូមិវត្តស្វាយ សង្កាត់សាលាកំរើក ក្រុង ខេត្តសៀមរាប ហើយភ្លើងរលត់ទៅវិញចប់សព្វគ្រប់នៅវេលាម៉ោង០៣,១០នាទីយប់ ថ្ងៃដដែល ។
បើតាមប្រភពពីសមត្ថកិច្ចមូលដ្ឋានបានប្រាប់ភ្នាក់ងារ កោះសន្តិភាពនៅ វេលាម៉ោង ៥ និង ៤០ នាទី ល្ងាច ថ្ងៃទី២៩ ខែសីហា ឆ្នាំ២០២៦ នេះថា ពិតជា មានករណីភ្លើងឆេះផ្ទះមួយខ្នង សាងសង់ពីថ្មក្រោម ឈើលើ ប្រក់ដំបូលស័ង្កសី និងជញ្ជាំងស័ង្កសី ដែលមានម្ចាស់ជាជនរងគ្រោះឈ្មោះ ប៉ែន ចាន់ម៉ានិត ភេទប្រុស អាយុ ៣៩ឆ្នាំ ជាគ្រូពេទ្យ (បំរើការងារនៅឯរាជធានីភ្នំពេញ) មានទីលំនៅទីតាំងកើតហេតុ ពិត ប្រាកដមែន ។
តាមប្រភពបន្តថា ករណីឆេះផ្ទះខាងលើនោះ បណ្តាលឱ្យខូចខាតបាត់បង់រួមមាន៖ ខូចខាតផ្ទះទំហំ ០៥ម៉ែត្រ x ០៩ម៉ែត្រ ទាំងស្រុង ។.ខូចខាតរថយន្តម៉ាក ព្រូស ពណ៌ប្រផេះ ចំនួន០១គ្រឿង ។ ខូចខាតម៉ូតូម៉ាក Today ចំនួន០១គ្រឿង ។ -ខូចខាតម៉ាស៊ីនបោកគក់ ចំនួន០១ គ្រឿង ។ -ខូចខាតទូរទឹកកក ចំនួន០១ គ្រឿង។ -ខូខាតគ្រឿងសង្ហារឹមមាន គ្រែដេក ពូក កង្ហារ និង សម្ភារៈផ្ទះបាយ មួយចំនួន ។ -ខូចខាតសម្លៀក បំពាក់មួយចំនួន ។
ប្រភពបញ្ជាក់ថា ករណីឆេះផ្ទះពលរដ្ឋនោះ ដោយមានកងកម្លាំងនគរ បាលបានជួយអន្តរាគមន៍ពីអង្គភាពពន្លត់អគ្គីភ័យនៃស្នងការដ្ឋាននគរបាលខេត្ត សៀមរាប សរុបចំនួន០៣គ្រឿងបានប្រើប្រាស់ ទឹកអស់០១ឡានរបស់អង្គភាពនគរបាលខេត្ត។ មូលហេតុ ៖ បណ្តាលមកពីឆ្លងចរន្តអគ្គិសនី ព្រោះតាមការបំភ្លឺផ្ទាល់មាត់របស់ជនរងគ្រោះនៅចន្លោះម៉ោង ០០ និង ៣០នាទី.រំលងអាធ្រាត្រថ្ងៃកើតហេតុ អំពូលភ្លើងអគ្គិសនីមានសភាពលោតលឺភ្លឹបភ្លែតៗ ច្រើនដង ប៉ុន្តែម្ចាស់ផ្ទះមិនបានចាប់អារម្មណ៍ហើយក៍បានដេកលក់បន្តលុះពេលអណ្តាតភ្លើងឆេះឡើងខ្លាំងទើបភ្ញាក់ដឹងខ្លួន។
បច្ចុប្បន្ន ផ្ទះរបស់ ពលរដ្ឋ ( ជាគ្រូពេទ្យបំរើការងារនៅ ឯ រាជធានីភ្នំពេញ) ដែលឆេះ អស់នោះ បើគិតជាទឹកប្រាក់ ប្រមាណជាង ២០០០០ ដុល្លារ សហរដ្ឋអាមេរិក ៕
ចែករំលែកព័តមាននេះ