ទីក្រុងកៀវ៖ ថ្ងៃនេះ រុស្ស៊ីបើកការវាយប្រហារដ៏ប្រល័យ បណ្ដាលឱ្យស្លាប់មនុស្សយ៉ាងតិច៣៧នាក់។ ប្រមុខដឹកនាំអ៊ុយក្រែន លោកហ្សេឡិនស្គី អះអាងថាដ្រូនមួយគ្រឿងរបស់រុស្ស៊ីវាយប្រហារចំឃ្លាំងរំសេវ និងបង្កជាការផ្ទុះយ៉ាងកក្រើកព្រះធរណី។ លោកសច្ចាថាត្រូវតែតាមចាប់អ្នកទទួលខុសត្រូវឃ្លាំងនេះមកផ្ដន្ទាទោសឱ្យខាងតែបានព្រោះករណីនេះកើតឡើងរហូតដល់ទៅ២ដងត្រឹមតែរយៈពេល២ខែប៉ុណ្ណោះ។ ការវាយប្រហារដ៏ផ្ដាច់ផ្ដិលជីវិតមនុស្សបំផុតនៅទីក្រុងកៀវលើកនេះកើតឡើងនៅពេលរុស្ស៊ីសម្រុកវាយប្រហារទីក្រុងនេះ និងតំបន់ខ្សែក្រវាត់ក្រុងអស់រយៈពេលបីថ្ងៃជាប់គ្នា។
ក្រៅពីអ្នកស្លាប់ដូចរៀបរាប់ខាងលើ ជនជាតិអ៊ុយក្រែនរាប់សិបនាក់ទៀតរងរបួស ខណៈដែលមនុស្សរាប់រយនាក់ត្រូវតែប្រញាប់ចាកចេញពីទីនោះដើម្បីសុវត្ថិភាពផ្ទាល់ខ្លួន។ កន្លែងកើតហេតុនោះគឺភូមិមីឡា (Myla)។ ហេដ្ឋារចនាសម្ព័ន្ធដូចជាអគារស្នាក់នៅ និងទីជម្រកសម្រាប់មនុស្សចាស់ និងអ្នកដែលមានពិការភាពរងការខូចខាតយ៉ាងដំណំ។ ការវាយប្រហារនោះបង្កជាភ្លើងឆេះយ៉ាងសន្ធោសន្ធៅ។ នៅក្នុងចំណោមអ្នកស្លាប់ទាំងនោះក៏មានប្រធានភូមិនៅជិតខាងនោះម្នាក់ផងដែរ។ គាត់ស្លាប់នៅពេលព្យាយាមជួយសង្គ្រោះអ្នកដទៃ។
លោកហ្សេឡិនស្គីថ្លែងនៅក្នុងខ្សែអាត់វីឌីអូបង្ហោះនៅលើបណ្ដាញសង្គមថាទិដ្ឋភាពនេះពោរពេញដោយភាពស្លុតរន្ធត់សម្បើមណាស់ ហើយវាក៏ជាកំហុសរបស់អ្នកទទួលខុសត្រូវខាងកាន់កាប់ឃ្លាំងរំសេវដែលបណ្ដោយឱ្យមនុស្សរស់នៅក្បែរនោះ។ កន្លែងដែលរងការវាយប្រហារនោះជាទីតាំងយោធាដែលទុកដាក់គ្រាប់កាំភ្លើងធំ គ្រាប់មីន ដ្រូន និងគ្រាប់រំសេវជាច្រើនប្រភេទទៀត។ កាលពីខែកក្កដា មានករណីវាយប្រហារស្រដៀងគ្នានេះកើតឡើងនៅទីក្រុងវីសស្នេវ (Vyshneve) បណ្ដាលឱ្យស្លាប់មនុស្សដប់នាក់ និងខូចខាតផ្ទះរាប់រយខ្នង។ លោកហ្សេឡិនស្គីចាត់ទុកថានេះជាឧក្រិដ្ឋកម្មថ្មីមួយទៀតក្រោយការវាយប្រហារនៅទីក្រុងវីសស្នេវ។ នេះជាករណីដែលមិនអាចទទួលយកបានជាដាច់ខាត។
លោករំពឹងថានឹងមានការបកស្រាយលម្អិតជូនសាធារណជនជ្រាបអំពីបញ្ហានេះ។ មានការស៊ើបអង្កេតជាបណ្ដើរៗហើយទៅលើសំណុំរឿងព្រហ្មទណ្ឌពាក់ព័ន្ធនឹងការសង្ស័យថាមន្ត្រីក្រោមឱវាទរបស់លោកប្រព្រឹត្តទង្វើធ្វេសប្រហែស។ ជាទូទៅ មន្ត្រីរដ្ឋាភិបាលអ៊ុយក្រែនកម្រផ្សព្វផ្សាយជាសាធារណៈណាស់នូវទំហំនៃការខូចខាតផ្នែកយោធាដោយសារការវាយប្រហាររបស់រុស្ស៊ី។ ក្រសួងការពារជាតិអ៊ុយក្រែនសរសេររៀបរាប់នៅក្នុងសេចក្ដីថ្លែងការណ៍របស់ខ្លួនថាអ្នកទទួលខុសត្រូវនៅក្នុងការគ្រប់គ្រងឃ្លាំងរំសេវនោះនឹងត្រូវឆ្លងកាត់ការធ្វើសវនកម្មថានៅពេលកើតហេតុតើពួកគេស្ថិតនៅទីណា៕ ប្រភព៖ Reuters
ចែករំលែកព័តមាននេះ