រាជធានីភ្នំពេញ ៖ កម្លាំងគណៈបញ្ជាការឯកភាពរដ្ឋបាលខណ្ឌចំការមន បានបើកប្រតិបត្តិការស្រាវជ្រាវ និងឈានទៅបង្ក្រាបទីតាំងបទល្មើសឆបោកតាមប្រព័ន្ធអនឡាញ (Online Scam) មួយកន្លែង ដោយឃាត់ខ្លួនអ្នកពាក់ព័ន្ធចំនួន ១៤នាក់ ព្រមទាំងដកហូតបានស៊ីមកាតទូរសព្ទជិត ២០,០០០ស៊ីម និងរថយន្ត រួមជាមួយសម្ភារបម្រើឱ្យសកម្មភាពបទល្មើសមួយចំនួនទៀត ។
ប្រតិបត្តិការនេះ បានធ្វើឡើងកាលពីថ្ងៃទី២៨ ខែសីហា ឆ្នាំ២០១៦ នៅចំណុចផ្លូវលេខ ៣១២ កែងផ្លូវសម្តេចសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ប្រភពព័ត៌មានពីសមត្ថកិច្ច បានឱ្យដឹងថា កាលពីប៉ុន្មានថ្ងៃមុន មានសារព័ត៌មានអនឡាញមួយចំនួន បានផ្សព្វផ្សាយព័ត៌មានមិនពិត និងបំប៉ោងស្ថានការណ៍ ដោយបានចោទប្រកាន់ក្រុមយុវជនជាមន្ត្រីកិច្ចសន្យា ចំណុះរដ្ឋបាលខណ្ឌចំការមន ថាជាកូនខ្លា ដែលធ្វើឱ្យក្រុមជនល្មើសធំៗ បានដឹងខ្លួនមុន និងគេចខ្លួន ដែលបង្កការលំបាកយ៉ាងខ្លាំងដល់កិច្ចប្រតិបត្តិការស្រាវជ្រាវរបស់សមត្ថកិច្ច ។
ទោះបីជាមានឧបសគ្គ និងការរំខានពីការផ្សាយព័ត៌មានមិនទាន់ច្បាស់លាស់យ៉ាងណាក្តី ក៏ក្រុមការងារគណៈបញ្ជាការឯកភាពខណ្ឌចំការមន បានបន្តធ្វើការស្រាវជ្រាវយ៉ាងយកចិត្តទុកដាក់ និងប្រកបដោយជំនាញ រហូតកំណត់បានតម្រុយ និងឈានទៅដល់ការបង្ក្រាបទីតាំងបទល្មើសជាក់ស្តែងបានជោគជ័យ គិតត្រឹមថ្ងៃទី២៩ ខែសីហា ឆ្នាំ២០២៦ នេះ ។
បច្ចុប្បន្ន អ្នកពាក់ព័ន្ធទាំង ១៤នាក់ រួមជាមួយវត្ថុតាងទាំងអស់ ត្រូវបានសមត្ថកិច្ចកសាងសំណុំរឿងដើម្បីចាត់ការទៅតាមនីតិវិធីច្បាប់ ៕
ចែករំលែកព័តមាននេះ