ទីក្រុងវ៉ាស៊ីនតោន៖ លោកដូណាល់ត្រាំមានប្រសាសន៍ថាក្រុមហ៊ុនរបស់អាមេរិកអាចជួយស្រោចស្រង់វិស័យប្រេងរបស់ប្រទេសវេណេហ្ស៊ូអេឡាដែលកំពុងមានបញ្ហា។ ទន្ទឹមនឹងនោះ ពួកគេនឹងជួយផ្គត់ផ្គងប្រេងឆៅនៅអាមេរិកដើម្បីធ្វើឱ្យតម្លៃរបស់វាចុះមកធម្មតាវិញ។ លោកត្រាំនិយាយដោយត្រួសៗពាក់ព័ន្ធនឹងកិច្ចព្រមព្រៀង។ លោកថាអាមេរិកអាចប្រមូលប្រេងជាង៦៥ពាន់លានបារ៉ែលពីវេណេហ្ស៊ូអេឡាតាមរយៈការចាប់ដៃគូសហការជាមួយវិស័យឯកជន។
ប្រមុខដឹកនាំវេណេហ្ស៊ូអេឡាប្រកាសស្វាគមន៍កិច្ចព្រមព្រៀងនេះដោយថ្លែងថាវានឹងជួយលើកស្ទួយសេដ្ឋកិច្ចជាតិ និងប្រាក់ចំណូលរបស់រដ្ឋ។ កិច្ចព្រមព្រៀងនេះស្ដែងឱ្យឃើញនូវការវាតទីរបស់អាមេរិកចូលទៅក្នុងវិស័យប្រេងរបស់វេណេហ្ស៊ូអេឡា ខណៈដែលរដ្ឋបាលរបស់លោកត្រាំកំពុងជួយជ្រោមជ្រែងវិស័យផលិតកម្មប្រេងរបស់ប្រទេសនេះ និងធ្វើយ៉ាងណាឱ្យរោងចក្ររបស់អាមេរិកមានប្រេងឆៅសម្រាប់ចម្រាញ់។ សព្វថ្ងៃនេះ វេណេហ្ស៊ូអេឡាមានប្រេងឆៅកប់ទុកនៅក្នុងដីច្រើនជាងគេនៅលើសាកលលោក ហើយមានភស្តុតាងបង្ហាញគ្រប់គ្រាន់អំពីប្រេងទាំងនោះ។
ប៉ុន្តែគួរឱ្យស្ដាយ ប្រទេសនេះអាចផលិតប្រេងបានត្រឹមតែ១,២៥លានបារ៉ែលប៉ុណ្ណោះនៅក្នុងមួយថ្ងៃដោយសារខ្វះការវិនិយោគ ការគ្រប់គ្រងមិនបានល្អ និងការដាក់ទណ្ឌកម្មសេដ្ឋកិច្ច។ លោកត្រាំបង្ហោះសារនៅលើបណ្ដាញសង្គមថាតបតាមការចង្អុលបង្ហាញរបស់លោក រដ្ឋមន្ត្រីការបរទេស លោករូប៊ីអូ និងរដ្ឋមន្ត្រីក្រសួងសង្គ្រាម លោកភីតហេកសឹត កំពុងធ្វើការយ៉ាងជិតស្និទ្ធជាមួយប្រធានាធិបតីស្ដីទីវេណេហ្ស៊ូអេឡា។ តាមរយៈការចាប់ដៃគូសហការជាមួយវិស័យឯកជន លោកទាំង២អាចសម្រេចបានកិច្ចព្រមព្រៀងបូមប្រេងជាង៦៥ពាន់លានបារ៉ែល។
សេចក្ដីប្រកាសនេះធ្វើឡើងបន្ទាប់ពីមានការចរចាគ្នាអស់ជាច្រើនសប្ដាហ៍រវាងភាគីអាមេរិក និងវេណេហ្ស៊ូអេឡាដើម្បីអនុញ្ញាតឱ្យក្រុមហ៊ុនរបស់អាមេរិកអាចចូលទៅបូមប្រេងពីវេណេហ្ស៊ូអេឡា។ មន្ត្រីរដ្ឋាភិបាលវេណេហ្ស៊ូអេឡាត្រៀមចុះហត្ថលេខាលើកិច្ចព្រមព្រៀងនៅសប្ដាហ៍ក្រោយ។ ប្រភពខ្លះបង្ហើបឱ្យដឹងថាទម្រង់នៃការជួលទីតាំងរុករកប្រេងនោះកំពុងស្ថិតនៅក្នុងដំណាក់កាលពិចារណា។ កន្លែងរុករកប្រេងអាចនឹងដាក់ឱ្យដេញថ្លៃសម្រាប់ក្រុមហ៊ុនអាមេរិក។ ប៉ុន្តែកិច្ចការនេះអាចនឹងក្លាយជាបញ្ហាប្រឈមផ្នែកផ្លូវច្បាប់ និងរដ្ឋធម្មនុញ្ញរបស់វេណេហ្ស៊ូអេឡាដ្បិតអីរដ្ឋនៅបន្តគ្រប់គ្រងវិស័យឧស្សាហកម្មប្រេងធំៗដដែល៕ ប្រភព៖ Reuters
ចែករំលែកព័តមាននេះ