ទីក្រុងកាត់ត្មាន់ឌូ៖ ពាក់ព័ន្ធនឹងគ្រោះទឹកជំនន់នៅប្រទេសណេប៉ាល់ និងតំបន់ភ្នំទីបេ គិតទាំងថ្ងៃនេះទៀត កិច្ចខិតខំប្រឹងប្រែងស្វែងរក និងជួយសង្គ្រោះអ្នកបាត់ខ្លួនបានធ្វើឡើងចូលដល់ថ្ងៃទីបួនហើយ។ ទន្ទឹមនឹងការរកឃើញអ្នកស្លាប់ អាជ្ញាធរប្រាប់ថាពួកគេក៏រកឃើញអ្នកនៅរស់ និងដឹកជញ្ជូនពួកគេទៅកាន់ទីកន្លែងសុវត្ថិភាព។ នៅឯមជ្ឈមណ្ឌលដោះស្រាយបញ្ហារងគ្រោះដោយទឹកជំនន់លើកនេះ គេឃើញថាអ្នកបាត់ខ្លួនខ្លះចាប់ផ្ដើមធ្វើដំណើរទៅដល់ទីនោះជាបន្តបន្ទាប់។ ប៉ុន្តែក្រុមគ្រួសារខ្លះនៅតែបន្តរង់ចាំយ៉ាងអន្ទះសាដើម្បីទទួលសាច់ញាតិរបស់ខ្លួន ខណៈដែលចំនួនអ្នកស្លាប់ចេះតែកើនឡើងជាបន្តបន្ទាប់។
បន្ទាប់ពីអាជ្ញាធរណេប៉ាល់ធ្វើបច្ចុប្បន្នភាពតួលេខអ្នកស្លាប់ និងបាត់ខ្លួន គេឃើញថាចំនួនអ្នកស្លាប់សរុបគិតទាំងខាងណេប៉ាល់ និងទីបេកើនឡើងដល់៦៣៣នាក់។ ចំណែកអ្នកបាត់ខ្លួនកើនឡើងដល់ជិត៣ពាន់នាក់។ អាជ្ញាធរចិនបញ្ជាក់ថានៅខាងទឹកដីរបស់ខ្លួនខ្លួន មនុស្ស៧នាក់ស្លាប់ និងជាង៥៥០នាក់បន្តបាត់ខ្លួន។ នៅនូវ៉ាខុត (Nuwakot) ដែលជាទីតាំងរងគ្រោះខ្លាំងជាងគេបំផុតរបស់ណេប៉ាល់ គេឃើញឧទ្ធម្ភាគចក្របន្តហោះក្រវែលទីតាំងកើតហេតុមុនពេលថ្ងៃត្រង់បន្ទាប់ពីពួកគេត្រូវបានរំខានដោយសារបញ្ហាអាកាសធាតុមិនសូវអំណោយផល។ ឧទ្ធម្ភាគចក្រខ្លះដឹកជញ្ជូនកេស និងថង់ដាក់ជំនួយ ក្នុងនោះមានខោអាវ មីកញ្ចប់ នំផ្អែម និងបាយ។ ឧទ្ធម្ភាគចក្រខ្លះទៀតវិលត្រឡប់ពីតំបន់រងគ្រោះ និងពាំនាំមកជាមួយនូវអ្នកដែលនៅរស់រានមានជីវិត។
បុរសវ័យចំណាស់ម្នាក់ត្រូវគេស្ទូចឡើងទៅលើអាកាសតាមឧទ្ធម្ភាគចក្រ ចំណែកទាហានម្នាក់ខិតខំលើកស្ត្រីចំណាស់ម្នាក់ទៅស្នាក់នៅក្នុងតង់កៅស៊ូ។ នៅទីនោះ ក្រុមគ្រូពេទ្យពិនិត្យសម្ពាធឈាម ចលនាដង្ហើម សង្វាក់បេះដូង ធ្មេញ និងអញ្ចាញ។ មនុស្សប្រហែលដប់នាក់ដើរចេញពីឧទ្ធម្ភាគចក្រមួយគ្រឿង, ទាហានបីកូនង៉ែតជាច្រើននាក់ដែលត្រូវបានគេជម្លៀសចេញពីតំបន់បាត់ខ្លួន។ អ្នកជម្លៀសខ្លួនទាំងនោះត្រូវគេដឹកចេញពីសហគមន៍ទ្រីស៊ូលី (Trishuli)។ ចំពេលដែលមនុស្សបន្តចាកចេញពីទ្រីស៊ូលី អ្នកភូមិខ្លះទៀតត្រូវបង្ខំចិត្តវិលត្រឡប់ទៅទីនោះវិញដើម្បីស្ទាបស្ទង់សភាពការណ៍ក្រែងលោអាចនៅសេសសល់របស់របរខ្លះនៅក្នុងផ្ទះដែលលិចលង់ និងបាក់បែក។
នៅរដ្ឋធានីកាត់ត្មាន់ឌូ សាច់ញាតិ និងមិត្តភក្ដិរបស់អ្នកបាត់ខ្លួនបានប្រមូលផ្ដុំគ្នានៅខាងក្រៅមន្ទីរពេទ្យរដ្ឋតាំងពីព្រឹកព្រលឹម និងទន្ទឹងរង់ចាំយ៉ាងអន្ទះអន្ទែងព្រោះពួកគេមិនស្ងប់ចិត្តនឹងការបាត់ដំណឹងសូន្យឈឹងនៃមនុស្សជាទីគោរពរាប់អានរបស់ខ្លួន។ មនុស្សជាច្រើនស្ទុះស្រចុះស្រឡើងរវាងកន្លែងផ្ដល់ព័ត៌មាន និងមន្ទីរពេទ្យព្យាបាលអ្នករបួស, អ្នកខ្លះកាន់រូបថតសាច់ញាតិ និងសម្លឹងរកមើលបញ្ជីឈ្មោះអ្នកជំងឺដែលត្រូវរបួស។ ស្ត្រីជនជាតិណេប៉ាល់ម្នាក់ឈ្មោះឌីល ម៉ាយ៉ា ឡាម៉ា (Dil Maya Lama) ឈរយំយ៉ាងសស្រិចនៅខាងក្រៅកន្លែងផ្ដល់ព័ត៌មាននៃមន្ទីរពេទ្យខាងលើ និងស្វះស្វែងរកដំណឹងរបស់បងប្រុសដែលបាត់ខ្លួនជាច្រើនថ្ងៃមកហើយ។ បងប្រុសរូបនេះជាអ្នកបើកឡានឱ្យក្រុមនហ៊ុនសាងសង់ទំនប់វារីអគ្គិសនីឈ្មោះរ៉ាស៊ូវ៉ា (Rasuwa)។ នាងប្រាប់ថានាងបានធ្វើដំណើរតាំងពីតំបន់រ៉ាម៉េឆាប (Ramechhap) ដែលមានចម្ងាយ១៣០គីឡូម៉ែត្រពីមន្ទីរពេទ្យ៕ ប្រភព៖ AP
ចែករំលែកព័តមាននេះ