គណៈកម្មាធិការជាតិប្រឆាំងទារុណកម្មបើកវគ្គបណ្តុះបណ្តាលពង្រឹងសមត្ថភាពមន្ត្រីពាក់ព័ន្ធនៅខេត្តពោធិ៍សាត់
- ពោធិ៍សាត់
ខេត្តពោធិ៍សាត់ ៖ វគ្គបណ្ដុះបណ្ដាល និងអប់រំផ្សព្វផ្សាយស្ដីពី «តួនាទី ភារកិច្ច របស់គណៈកម្មាធិការជាតិប្រឆាំងទារុណកម្ម និងលិខិតបទដ្ឋានជាតិ អន្តរជាតិ លើការងារបង្ការ ទប់ស្កាត់ និងប្រឆាំងទារុណកម្ម» បានប្រារព្ធធ្វើនៅសាលប្រជុំទេពឧកញ៉ាឃ្លាំងមឿងសាលាខេត្តពោធិ៍សាត់ កាលពីព្រឹកថ្ងៃទី27 ខែសីហា ឆ្នាំ2026 ក្រោមអធិបតីភាព ឯកឧត្តម កែវ តារាពង្ស អនុប្រធានគណៈកម្មាធិការជាតិប្រឆាំងទារុណកម្ម និងឯកឧត្តម ម៉ក់ រ៉ា ប្រធានក្រុមប្រឹក្សាខេត្ត ដោយមានការអញ្ជើញចូលរួមពីស្ថាប័នតុលាការ កងកម្លាំងប្រដាប់អាវុធទាំងបីប្រភេទ មន្ត្រីពន្ធនាគារ អភិបាលក្រុងស្រុក និងមេឃុំចៅសង្កាត់ទូទាំងខេត្តពោធិសាត់ ។
លោកស្រី ប៉ុក ណាឌី អភិបាលរងខេត្តមានមតិស្វាគមន៍ ព្រមទាំងបានលើកឡើងថា ការប្រឆាំងទារុណកម្មគឺជាបញ្ហាដ៍សំខាន់មួយ ដែលពាក់ព័ន្ធដោយផ្ទាល់ទៅនឹងការគោរពសិទ្ធិមនុស្ស សេចក្ដីថ្លៃថ្នូររបស់មនុស្ស និងនីតិរដ្ឋ ។ ការធានាថា បុគ្គលគ្រប់រូប ទោះបីស្ថិតក្នុងស្ថានភាពណាក៍ដោយ ត្រូវទទួលបានការគោរពនិងការការពារតាមច្បាប់ គឺជាមូលដ្ឋានដ៏សំខាន់សម្រាប់កសាងសង្គមមួយ ដែលមានយុត្តិធម៌ សន្តិភាព សុវត្ថិភាព និងការគោរពគ្នាទៅវិញទៅមក។
វគ្គបណ្ដុះបណ្ដាលនេះ ពិតជាមានសារសំខាន់ណាស់ ដើម្បីពង្រឹងការយល់ដឹងបន្ថែមអំពីច្បាប់លិខិតបទដ្ឋានជាតិ និងអន្តរជាតិ ពាក់ព័ន្ធនឹងការងារបង្ការ ទប់ស្កាត់ និងលុបបំបាត់រាល់ទម្រង់នៃទារុណកម្ម ។ លើកកម្ពស់សមត្ថភាព និងការទទួលខុសត្រូវរបស់អាជ្ញាធរមានសមត្ថកិច្ច និងមន្ត្រីអនុវត្តច្បាប់ ក្នុងការបំពេញភារកិច្ចឱ្យស្របតាមគោលការណ៍សិទ្ធិមនុស្ស។
អង្គពិធីបានធ្វើបទបង្ហាញដោយលោក នៅ រិទ្ធិ គ្រូឧទ្ទេសនៃគណៈកម្មាធិការជាតិប្រឆាំងទារុណកម្ម ដោយបានផ្តោតលើចំណុចសំខាន់ៗ រួមមាន៖ តួនាទីនិងភារកិច្ចរបស់គណៈកម្មាធិការជាតិប្រឆាំងទារុណកម្ម, យន្តការតាមដាន ត្រួតពិនិត្យ និងការចុះវាយតម្លៃនៅតាមទីតាំងឃាត់ខ្លួន ឬរងការដកហូតសេរីភាព ដើម្បីធានាថាគ្មានការប្រព្រឹត្តទារុណកម្ម ឬអំពើឃោរឃៅកើតឡើងឡើយ។ វិធានអង្គការសហប្រជាជាតិ ស្ដីពីបទដ្ឋានអប្បរមា សម្រាប់ការប្រព្រឹត្តទៅលើជនជាប់ឃុំ ដើម្បីធានាបាននូវសេចក្តីថ្លៃថ្នូរ និងសិទ្ធិមូលដ្ឋានរបស់ជនជាប់ឃុំ ។
ឯកឧត្តម កែវ តារាពង្ស អនុប្រធានគណៈកម្មាធិការជាតិប្រឆាំងទារុណកម្ម មានប្រសាសន៍ថា វគ្គបណ្ដុះបណ្ដាលនេះគឺដើម្បីពង្រឹងសមត្ថភាពរបស់មន្ត្រីអនុវត្តច្បាប់ អាជ្ញាធរមានសមត្ថកិច្ច មន្ត្រីសាធារណៈ និងអ្នកពាក់ព័ន្ធ ឲ្យយល់ដឹងច្បាស់អំពីកាតព្វកិច្ចនិងការទទួលខុសត្រូវរបស់ខ្លួន ស្របតាមច្បាប់ជាតិនិងអន្តរជាតិ ។ ការងារប្រឆាំងទារុណកម្មជាកាតព្វកិច្ចរួមគ្នា ដែលទាមទារឱ្យមានការចូលរួមយ៉ាងសកម្មពីគ្រប់ភាគីពាក់ព័ន្ធ។ ឯកឧត្តមបានផ្តាំផ្ញើដល់សិក្ខាកាមទាំងអស់ ឱ្យយកចិត្តទុកដាក់ក្រសោបយកចំណេះដឹងពីវគ្គបណ្តុះបណ្តាលនេះ ទៅអនុវត្តជាក់ស្តែងក្នុងដែនសមត្ថកិច្ចរបស់ខ្លួន ដោយប្រកាន់ខ្ជាប់នូវស្មារតីទទួលខុសត្រូវ គោរពសិទ្ធិមនុស្ស និងច្បាប់ជាធរមាន ដើម្បីរួមចំណែកលុបបំបាត់អំពើទារុណកម្មឱ្យកាន់តែមានប្រសិទ្ធភាពខ្ពស់ ។
ចែករំលែកព័តមាននេះ