ខេត្តកំពង់ស្ពឺ៖ ជនសង្ស័យជាមុខសញ្ញាលួចខ្សែភ្លើងម្នាក់ ត្រូវបានម្ចាស់ចំការឃាត់ខ្លួនប្រគល់ឱ្យនគរបាលស្រុកសាមគ្គីមុនីជ័យ ខណៈដែលជនសង្ស័យបានធ្វើសកម្មភាពយកកន្ត្រៃលួចកាត់ខ្សែភ្លើងហើយត្រូវបានម្ចាស់មកទាន់ព្យាយាមជិះម៉ូតូរត់គេច។ ប៉ុន្តែត្រូវម្ចាស់ចំការដេញប្រផាប់ចាប់ប្រផីង ហូតដល់ឃាត់ខ្លួនបាន។
ការឃាត់ខ្លួនជនសង្ស័យលួចកាត់ខ្សែភ្លើងបានធ្វើឡើងកាលពីវេលាម៉ោង១០និង១០នាទីព្រឹកថ្ងៃទី២៦ ខែសីហា ឆ្នាំ២០២៦ នៅចំណុចផ្លូវលំក្នុងភូមិបន្ទាយខ្មែរ ឃុំជើងរាស់ ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យបាននិយាយឲ្យដឹងថា ជនសង្ស័យដែលត្រូវឃាត់ខ្លួនមានឈ្មោះ សួន សូឃា ភេទប្រុស អាយុ២៦ឆ្នាំមុខរបរមិនពិតប្រាកដ រស់នៅក្នុងភូមិត្រពាំងមាន់ ឃុំព្នាយ ស្រុកសំរោងទង ខេត្តកំពង់ស្ពឺ។
ចំណែកម្ចាស់ចំការមានឈ្មោះ ហឿន យូសៀន ភេទប្រុស អាយុ២៣ឆ្នាំ រស់នៅក្នុងភូមិសួសនៃ ឃុំជើងរាស់ ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យបាននិយាយឲ្យដឹងថានៅមុនពេលកើតហេតុវេលាម៉ោង១០ និង១០នាទីព្រឹកថ្ងៃទី២៦ ខែសីហា ឆ្នាំ២០២៦ នៅចំណុចចំការខាងលិច ភូមិសួសនៃ ឃុំជើងរាស់ ស្រុកសាមគ្គីមុនីជ័យ មានករណីចោរកម្មលួចកាត់ខ្សែភ្លើងមួយកើតឡើងដែលបង្កឡើងដោយជនសង្ស័យម្នាក់ មានឈ្មោះ សួន សូឃា ភេទប្រុស អាយុ២៦ឆ្នាំមុខរបរមិនពិតប្រាកដ រស់នៅក្នុងភូមិត្រពាំងមាន់ ឃុំព្នាយ ស្រុកសំរោងទង បានធ្វើសកម្មភាពយកកន្ត្រៃទៅកាត់ខ្សែភ្លើង ដែលម្ចាស់បានតចូលទៅក្នុងចំការទុកសម្រាប់ប្រើប្រាស់។ ក្នុងពេលដែលជនសង្ស័យខាងលើកំពុងតែធ្វើសកម្មភាពលួចកាត់ខ្សែរភ្លើងនៅក្នុងចំការខាងលើនោះ ស្រាប់តែម្ចាស់ចំការបានមកទាន់ ហើយជនសង្ស័យឃើញក៏បានជិះម៉ូតូព្យាយាមរត់គេចខ្លួន ប៉ុន្តែត្រូវបានម្ចាស់ចំការជិះម៉ូតូដេញប្រផាប់ចាប់ប្រផីងតាមឃាត់ខ្លួនបាននៅចំណុចផ្លូវលំក្នុងភូមិបន្ទាយខ្មែរ ឃុំជើងរាស់ ស្រុកសាមគ្គីមុនីជ័យ ខេត្តកំពង់ស្ពឺ ហើយក៏ប្រគល់ជូនសមត្ថកិច្ចដើម្បីចាត់ការតាមផ្លូវច្បាប់។
នគរបាលស្រុកសាមគ្គីមុនីជ័យបានបន្តឲ្យដឹងទៀតថាក្រោយឃាត់ខ្លួនជនសង្ស័យខាងលើយកមកសាកសួររូបគេបានឆ្លើយសារភាពថា ខ្លួនពិតជាបានធ្វើសកម្មភាព យកកន្ត្រៃទៅលួចកាត់ខ្សែភ្លើងម្ចាស់ចំការពិតប្រាកដមែន ។ ក្រោយពេលឃាត់ខ្លួន សមត្ថកិច្ចដកហូតវត្ថុតាងបាន÷ ខ្សែភ្លើងចំនួន២ដុំ,កន្ត្រៃ១ដើម,ទូរស័ព្ទ១គ្រឿង, និងម៉ូតូចំនួន១គ្រឿងជាមធ្យោបាយ ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៧ ពាក់ផ្លាកលេខកំពង់ស្ពឺ1J-8720 ។
នគរបាលស្រុកសាមគ្គីមុនីជ័យបានបញ្ជាក់ឱ្យដឹងទៀតថា÷ ក្រោយឃាត់ខ្លួនជនសង្ស័យរួមជាមួយនឹងវត្ថុតាងនគរបាលបានកសាងសំណុំរឿងបញ្ជូនទៅការិយាល័យនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់៕
ចែករំលែកព័តមាននេះ