ខេត្តស្វាយរៀង ៖ យ៉ាងហោចណាស់ មានក្មេងទំនើងចំនួន៥នាក់ត្រូវយក្សល្ខោនវាយបែកក្បាល បាក់ធ្មេញ បែកខ្នង ជាំដៃ និងសន្លប់នៅក្រោយឆាកសម្តែង ដោយសារតែពួកក្មេងទំនើងទាំងនេះលបមើលកូនក្រមុំយក្ស និងពួកមេនំមេនាងរហូតជាប់ស្នេហ៍ចង់ចូលចាប់យកទៅរួមមេត្រី តែសំណាង
ខេត្តស្វាយរៀង ៖ យ៉ាងហោចណាស់ មានក្មេងទំនើងចំនួន៥នាក់ត្រូវយក្សល្ខោនវាយបែកក្បាល បាក់ធ្មេញ បែកខ្នង ជាំដៃ និងសន្លប់នៅក្រោយឆាកសម្តែង ដោយសារតែពួកក្មេងទំនើងទាំងនេះលបមើលកូនក្រមុំយក្ស និងពួកមេនំមេនាងរហូតជាប់ស្នេហ៍ចង់ចូលចាប់យកទៅរួមមេត្រី តែសំណាងអាក្រក់យក្សមកទាន់ ក៏ស្វាគមន៍ពីបីដំបងម្នាក់ធ្វើឱ្យមានការប្រទូស្តរ៉ាយផ្អើលអ្នកទស្សនា ។
ទាំងតួឯក តួរង តួព្រះឥន្ទ ក៏នាំគ្នារត់ទៅក្រោយឆាកជួយយក្សដែរ ហើយក្មេងទំនើងទាំង៥នាក់ត្រូវរបួសគ្រប់គ្នា ដោយសារក្រុមតួល្ខោនព្រួតវាយ ។ ហេតុការណ៍នេះបានកើតឡើងនៅថ្ងៃទី៨ សីហា វេលាម៉ោង១១យប់ នៅក្នុងវត្តក្រសាំងជ្រំ ភូមិក្រសាំងជ្រំ ឃុំក្រួសស្រុកស្វាយជ្រំ ។
តាមមន្ត្រីប៉ូលិសបានប្រាប់ឱ្យដឹងថា តាំងពីថ្ងៃទី៧ សីហាមក ក្រុមល្ខោនបាសាក់ ខេត្តកំពង់ចាម បានមកសម្តែងលក់សំបុត្រនៅវត្តក្រសាំងជ្រំ ដោយតម្លៃសំបុត្រ១ថ្លៃ២.០០០រៀល ហើយនៅយប់ទី២ ថ្ងៃទី៨ សីហា ក៏បានសម្តែងចាប់ពីវេលាម៉ោង៧រហូតដល់ម៉ោង១១យប់ ។ ខណៈល្ខោនជិតវ៉ារោង តួខ្លះដែលចប់ការសម្តែងរបស់ខ្លួន ក៏ទៅក្រោយឆាកដោះសម្លៀកបំពាក់ទាំងតួយក្ស ទាំងតួបុត្រីយក្ស និងមេនំមេនាង ។ ការផ្លាស់ប្តូរសម្លៀកបំពាក់របស់ពួកនាងៗពិតជាបានបង្ហាញសម្ផស្សសាច់ខ្ចីម៉ដ្ឋខៃធ្វើឱ្យក្រុមក្មេងទំនើង៥នាក់ដែលឈប់មើលនៅខាងមុខរោងក៏នាំគ្នាទៅក្រោយឆាកលួចប៉ើងវាំងននលបមើលទាំងការព្រឺព្រួច រហូតអ្នកខ្លះទៅញែ៉មេនំមេនាងប៉ះចំកូនក្រមុំយក្ស ។ លុះពេលតួយក្សច្បាំងក្នុងរឿងចាញ់តួឯករត់ចូលក្នុងវិញ ឃើញក្រុមមនុស្សមកញ៉ែកូនក្រមុំ ក៏កើតក្តីក្រហាយក៏ទាញដំបងវាយទៅលើក្បាលក្មេងទំនើងទាំង៥នាក់ រហូតដល់កើតមានការប្រទូស្តរា៉យគ្នាយ៉ាងក្រពុលមុខ ហើយតួយក្សក៏ស្រែកហៅតួឯក តួព្រះឥន្ទ្រ តួឥសីដែលប្រដាប់ដោយដំបងគ្រប់ដៃទៅព្រួតវាយជនទំនើងទាំង៥នាក់ ធ្វើឱ្យជនស្ទាវទាំងនោះនាំគ្នាគ្រាហ៍គូកនរត់គេចខ្លួន ។
នៅថ្ងៃទី៩ សីហា វេលាម៉ោង១០យប់ ក្រុមគ្រួសារបានបញ្ជូនពួកគេដែលរងរបួសមកមន្ទីរពេទ្យខេត្ត ដើម្បីសង្គ្រោះ តែត្រូវសមត្ថកិច្ចតាមចាប់ខ្លួន ហើយជន៤នាក់បានរត់ចេញពីមន្ទីរពេទ្យនៅសល់តែម្នាក់ដែលរបួសធ្ងន់ធ្ងរដេកសន្លប់នៅក្នុងមន្ទីរពេទ្យខេត្ត ។ អ្នករងរបួសធ្ងន់នេះឈ្មោះពៅ រី អាយុ២៣ឆ្នាំ នៅភូមិត្រោក ឃុំក្រួស ស្រុកស្វាយជ្រំ ត្រូវយក្សវាយបែកក្បាលរហូតផុងលលាដ៍ដេរ១២ថ្នេរ បែកមាត់ បាក់ធ្មេញអស់៥ និងត្រូវចំកណ្តាលខ្នង៤កន្លែងសន្លប់ ។ រហូតមកដល់ថ្ងៃទី១០ សីហា វេលាម៉ោង៨ព្រឹក យុវជនរូបនេះនៅវង្វេងវង្វាន់នៅឡើយទេ ។
បច្ចុប្បន្នមន្ត្រីសមត្ថកិច្ចកំពុងតាមចាប់ខ្លួនជនសង្ស័យ៤នាក់ដែលរបួសស្រាលយកទៅផ្តន្ទាទោស រីឯជនម្នាក់រងរបួសធ្ងន់ គ្រូពេទ្យកំពុងសង្គ្រោះ ។ ចំណែកក្រុមវង់ល្ខោនខេត្តកំពង់ចាម ក៏បានរើរោងទៅសម្តែងនៅវត្តតានូ ឃុំចំបក់ ស្រុកស្វាយជ្រំ ។ លោកអធិការនគរបាលស្រុកស្វាយជ្រំបានមានប្រសាសន៍ថា ក្មេងទំនើងទាំងប្រាំនាក់ជាអ្នកទៅអុកឡុកចង់ចាប់កូនក្រមុំយក្សល្ខោន ទើបយក្សល្ខោនចេញមុខការពារ៕
ចែករំលែកព័តមាននេះ