ខេត្តកណ្តាល ៖ ថ្លាន់ញីមួយក្បាលដែលពេលនេះមានទម្ងន់ជាង១៥០គីឡូក្រាម និងមានប្រវែងជាង៥ម៉ែត្រ រស់នៅជាមួយទារកតាំងពីនៅអាយុបាន៣ខែ និងនៅក្បែរគ្នាជានិច្ច ជាមួយគ្រួសារនេះទុកដូចសមាជិកក្រុមគ្រួសារអស់រយៈពេលជាង ១០ឆ្នាំមកហើយនោះ មិនដែលបង្កផលវិបាក ឬបញ្ហាអ្វី
ខេត្តកណ្តាល ៖ ថ្លាន់ញីមួយក្បាលដែលពេលនេះមានទម្ងន់ជាង១៥០គីឡូក្រាម និងមានប្រវែងជាង៥ម៉ែត្រ រស់នៅជាមួយទារកតាំងពីនៅអាយុបាន៣ខែ និងនៅក្បែរគ្នាជានិច្ច ជាមួយគ្រួសារនេះទុកដូចសមាជិកក្រុមគ្រួសារអស់រយៈពេលជាង១០ឆ្នាំមកហើយនោះ មិនដែលបង្កផលវិបាក ឬបញ្ហាអ្វីមួយដល់ក្រុមគ្រួសារ ក៏ដូចជាប្រជាពលរដ្ឋនៅក្នុងភូមិ-ឃុំនោះទេ ។ រហូតដល់អ្នកភូមិខ្លះ មានជំនឿថា ថ្លាន់មួយនេះបានបារមីស័ក្តិសិទ្ធិពូកែ និងតែងនាំគ្នាមកសុំទឹកមន្ត ដើម្បីព្យាបាលជំងឺ ។ ទាក់ទិននឹងថ្លាន់ញីនេះ ដែរ ក៏ត្រូវបានប្រព័ន្ធផ្សព្វផ្សាយបរទេសនានាចុះផ្សាយព្រោងព្រាតផងដែរ កាលពីប៉ុន្មានឆ្នាំកន្លងមកនេះ ។
ទោះបីជាបែបនេះក្តី កាលពីថ្ងៃទី៨ សីហា ក្រុមគ្រួសារដែលធ្លាប់ថែរក្សាថ្លាន់ញីទុកដូចជាសមាជិកគ្រួសារដែលរស់នៅភូមិសិត្បូ ឃុំសិត្បូ ស្រុកស្អាងបានសម្រេចចិត្តប្រគល់ទៅឱ្យមន្ត្រីនៃអង្គការអភិរក្ស សត្វព្រៃយកទៅលែងនៅសួនសត្វភ្នំតាម៉ៅហើយ ។ មូលហេតុដែលអ្នកចិញ្ចឹមសម្រេចចិត្តបែបនេះដោយសារតែថ្លាន់ញីមួយក្បាលនេះបានខាំកូនប្រុសគាត់ដែលជាមនុស្សស្និទ្ធស្នាលបំផុតជាប់កជើងកាលពីវេលាម៉ោង៩ព្រឹកថ្ងៃទី៨ សីហា ខណៈកូនប្រុសគាត់ចូលទៅបោសសំអាតក្នុងបន្ទប់ដែលពស់ថ្លាន់នោះរស់នៅដូចសព្វមួយដង ។ កូនប្រុសគាត់នេះគឺជាទារកដែលពស់នេះមករស់នៅក្បែរតាំងពីអាយុ៣ខែមកនោះ ។ មូលហេតុម្យ៉ាងទៀត គឺដោយសារគាត់ខ្វះថវិកាសម្រាប់ទិញចំណីឱ្យស៊ី ព្រោះវាស៊ីម្តងៗអស់សាច់រហូតដល់១០គីឡូក្រាម ដោយសារខ្លួនវាកាន់តែធំមានប្រវែងជាង៥ម៉ែត្រទម្ងន់ប្រហែល១៥០គីឡូក្រាម ។
លោកឃួន សំអុល អាយុ៥៥ឆ្នាំ និងប្រពន្ធគាត់ឈ្មោះគឹម កាណារ៉ា រស់នៅភូមិសិត្បូ ឃុំសិត្បូ ស្រុកស្អាង បានរៀបរាប់ពីប្រវត្តិពស់ថ្លាន់ញីមួយនេះឱ្យដឹងថា ពស់ថ្លាន់ញីមួយនេះបានចូលមករស់នៅក្នុងផ្ទះគាត់តាំងពីថ្ងៃទី៨ មីនា ឆ្នាំ ២០០០មកម្ល៉េះ គឺចូលមកដេកក្បែរកូនប្រុសគាត់ទើបតែអាយុ៣ខែប៉ុណ្ណោះ រហូតមកដល់ពេលនេះកូនប្រុសគាត់អាយុ១១ឆ្នាំទៅហើយ រៀនថ្នាក់ទី៦ នៅសាលារៀនសិត្បូ ឃុំសិត្បូ ។ នៅពេលកូនពស់ថ្លាន់នេះចូលមកនៅក្បែរកូនប្រុសគាត់ដំបូង គឺជាកូនពស់ប៉ុនមេដៃប៉ុណ្ណោះ ហើយរស់នៅជាមួយគាត់រហូតដល់គាត់ចាត់ទុកជាសមាជិកក្រុមគ្រួសារមួយរូបផងដែរ និងបានដាក់ឈ្មោះពស់នេះថា មីចំរើន ។ ព្រោះចាប់តាំងពីពស់នេះចូលមកនៅ គាត់ប្រកបការងាររកទទួលទានបានចំរើន និងសុខសប្បាយជានិច្ច ព្រមទាំងមានអ្នកភូមិមកចោមរោមមើលអុជធូប សូមទឹកមន្ត ដើម្បីសុំសេចក្តីសុខចំរើនទៀតផង ។
លោកឃួន សំអុល បានឱ្យដឹងថា រហូតមកដល់ឆ្នាំ២០០៤ ពស់ញីមួយនេះកាន់តែធំ ហើយគាត់ពិបាកក្នុងការរកចំណីឱ្យស៊ីណាស់ គាត់បានអុជធូបនិយាយជាមួយពស់នេះសុំឱ្យស៊ីតែចំណីសត្វតៃសាក (ងាប់) ដូចជាមាន់ ទា ជាដើម ។រហូតដល់ឆ្នាំ២០០៤ ដដែលនោះ កូនប្រុសគាត់ដែលពស់ថ្លាន់នៅជាមួយតាំងពីទារកអាយុ៣ខែនោះ ក៏ដឹងក្តី ដឹងខុសត្រូវបានប្រាប់គាត់ថា ពស់ញីដែលមករស់នៅក្នុងផ្ទះយើងនេះជាប្អូនស្រីរបស់ខ្លួនតាំងពីជាតិមុនមក ទើបមករស់នៅក្បែរខ្លួនរហូតមក ក្រុមគ្រួសារគាត់ក៏ចាត់ទុកពស់ញីនេះជាសាច់ញាតិ សមាជិកគ្រួសារមួយរូបទៀតដែរ គឺលែងឱ្យមានសេរីភាពស្រេចតែចិត្ត ។ ពស់នេះមិនដែលបង្កការអុកឡុកធ្វើឱ្យអ្នកភូមិភ័យខ្លាចនោះឡើយ មានតែអ្នកភូមិមកសុំទឹកមន្តយកទៅពិសាដើម្បីព្យាបាលជំងឺបានពូកែស័ក្តិសិទ្ធិ ហើយអ្នកភូមិស្រុកចាត់ទុកថា ជាពស់ញីកាន់សីលមានធម៌ ព្រោះមិនស៊ីសាច់សត្វរស់ឡើយ ។ ក្រោយៗមកមានអង្គការអភិរក្សសត្វព្រៃមកសុំយកទៅចិញ្ចឹមនៅសួនសត្វ ប៉ុន្តែក្រុមគ្រួសារគាត់មិនព្រមប្រគល់ឱ្យ ព្រោះចាត់ទុកជាសមាជិកក្រុមគ្រួសារមួយរូបទៅហើយ។ ដោយគាត់លើកហេតុផលជាច្រើន ទើបខាងអង្គការនោះយល់ព្រមឱ្យគាត់ថែរក្សារហូតមក ដោយធ្វើបន្ទប់មួយនៅក្នុងផ្ទះឱ្យរស់នៅដោយឡែក ។ ជួនកាលថ្លាន់នោះ លូនទៅដេកជាមួយគាត់ និងកូនៗជាញឹកញាប់ គឺមិនចាក់សោបន្ទប់ទេ ទុកឱ្យវាមានសេរីភាព ។
លោកឃួន សំអុល បានរៀបរាប់ទៀតថា រយៈពេលប៉ុន្មានឆ្នាំចុងក្រោយនេះ ពស់ថ្លាន់នេះកាន់តែធំ វាសីុកាន់តែច្រើន ធ្វើឱ្យគាត់ជួបការលំបាកក្នុងការរកចំណីឱ្យវាស៊ី ។ ប៉ុន្តែដោយសារចាត់ទុកថា ជាសមាជិកគ្រួសារមួយទៅហើយនោះ គាត់ខិតខំតស៊ូចែកពីមាត់រំលែកពីក ដើម្បីឱ្យពស់បានសីុឆ្អែត ។ រយៈពេលដែលពស់នេះមករស់នៅជាមួយប្រមាណ១១ឆ្នាំ គឺមានប្រវែងជាង៥ម៉ែត្រ ទំហំខ្លួនធំ ទម្ងន់ប្រហែល១៥០គីឡូក្រាមទៅហើយ ។ នៅថ្ងៃទី៨ សីហា កូនគាត់ចូលទៅបោសសំអាតបន្ទប់របស់វានោះក៏ត្រូវវាខាំជាប់កជើង ហើយកូនគាត់ស្រែកឱ្យជួយទាន់ពេល ទើបគាត់និងក្រុមគ្រួសារមានចិត្តខឹងក៏សម្រេចចិត្តប្រគល់ទៅឱ្យខាងអង្គការអភិរក្សសត្វព្រៃយកទៅលែងនៅសួនសត្វភ្នំតាម៉ៅទៅចុះ ចៀសវាងកើតមានបញ្ហាធំជាងនេះ ៕
ចែករំលែកព័តមាននេះ