រដ្ឋសភាកម្ពុជាបើកដំណើរការជាផ្លូវការវេទិកា ASEAN-RAI
- ភ្នំពេញ
រាជធានីភ្នំពេញ ៖ វេទិកា ASEAN-RAI ដែលរដ្ឋសភាកម្ពុជាធ្វើជាម្ចាស់ផ្ទះ ក្រោមកិច្ចសហការជាមួយអគ្គលេខាធិការដ្ឋានអន្តរសភាអាស៊ាន (AIPA) និងការគាំទ្រពីអង្គការស្បៀងអាហារ និងកសិកម្មនៃអង្គការសហប្រជាជាតិ (FAO) បានបើកដំណើរការជាផ្លូវការហើយ នៅព្រឹកថ្ងៃទី២៥ សីហា ឆ្នាំ២០២៦ ។
ថ្លែងបើកវេទិកា ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា តំណាងសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានបញ្ជាក់ថា រដ្ឋសភាគាំទ្រគោលនយោបាយរបស់រាជរដ្ឋាភិបាល និងការប្តេជ្ញាចិត្តអន្តរជាតិ ព្រមទាំងចូលរួមជំរុញការអនុវត្តគោលនយោបាយពាក់ព័ន្ធនឹងសន្តិសុខស្បៀង ការប្រែប្រួលអាកាសធាតុ និងការវិនិយោគប្រកបដោយការទទួលខុសត្រូវ ដើម្បីផ្តល់ផលប្រយោជន៍ដល់ប្រជាពលរដ្ឋ និងសហគមន៍ក្នុងតំបន់ ។
ឯកឧត្តមបានបន្តថា បច្ចុប្បន្ន ពិភពលោកកំពុងប្រឈមនឹងវិបត្តិជាច្រើន រួមទាំងវិបត្តិអាកាសធាតុ និងអសន្តិសុខស្បៀងអាហារ ខណៈតំបន់អាស៊ីអាគ្នេយ៍ក៏មិនអាចជៀសផុតពីហានិភ័យទាំងនេះបានឡើយ ។ បញ្ហានាពេលបច្ចុប្បន្ន មិនមែនជាការប្រែប្រួលអាកាសធាតុធម្មតាទៀតទេ ប៉ុន្តែកំពុងវិវត្តទៅជាវិបត្តិអាកាសធាតុធ្ងន់ធ្ងរ ដែលទាមទារឱ្យសហគមន៍អន្តរជាតិរួមគ្នាដោះ
ស្រាយ។
ឯកឧត្តបានបន្តថា ការគំរាមកំហែងទាំងនេះ មិនអាចដោះស្រាយដោយប្រទេសណាមួយតែឯងបានទេ ។ ភាពមិនអាចទាយទុកជាមុនបាននៃអាកាសធាតុ ព្រឹត្តិការណ៍អាកាសធាតុធ្ងន់ធ្ងរ និងការខូចខាតបរិស្ថាន កំពុងជះឥទ្ធិពលដោយផ្ទាល់ដល់ផលិតកម្មកសិកម្ម និងធ្វើឱ្យប្រព័ន្ធស្បៀងអាហារកាន់តែមានភាពតានតឹង ។
ឯកឧត្តមបានសង្កត់ធ្ងន់ថា ភាពធន់នឹងការប្រែប្រួលអាកាសធាតុ គឺជាមូលដ្ឋានគ្រឹះនៃសន្តិសុខស្បៀងអាហារ ហើយទាមទារឱ្យមានការឆ្លើយតបប្រកបដោយសង្គតិភាពផ្នែកច្បាប់ គោលនយោបាយ និងសង្គម ។
ការពង្រឹងភាពធន់នៃប្រព័ន្ធកសិកម្ម និងប្រព័ន្ធស្បៀងអាហារ គឺជាកត្តាសំខាន់ក្នុងការធានាការផ្គត់ផ្គង់ស្បៀងអាហារប្រកបដោយស្ថិរភាព សម្រាប់ប្រជាជនដែលកំពុងកើនឡើង ការពារជីវភាពរស់នៅរបស់សហគមន៍ និងរក្សាការអភិវឌ្ឍសេដ្ឋកិច្ច និងសង្គមរយៈពេលវែង ។
ជាមួយគ្នានេះ ឯកឧត្តមអនុប្រធានទី១រដ្ឋសភាបានលើកឡើងថា កសិករនៅក្នុងតំបន់អាស៊ានកំពុងប្រឈមនឹងហានិភ័យធ្ងន់ធ្ងរពីការប្រែប្រួលអាកាសធាតុ ជាពិសេស គ្រោះរាំងស្ងួត និងទឹកជំនន់ ។
ដូច្នេះ តំបន់ចាំបាច់ត្រូវបង្កើនការវិនិយោគលើការអភិវឌ្ឍកសិកម្មធន់នឹងអាកាសធាតុ ការសម្របខ្លួនទៅនឹងការប្រែប្រួលអាកាសធាតុ ការគ្រប់គ្រងធនធានទឹក និងការអភិវឌ្ឍប្រព័ន្ធព្រមានជាមុនប្រកបដោយភាពឆ្លាតវៃ ។
ចែករំលែកព័តមាននេះ