សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងព្រឹកថ្ងៃទី២៥ ខែសីហា ឆ្នាំ២០២៦ថា ខេត្តក្រចេះដែលកំពុងតែទាក់ទាញវិនិយោគធំជាងគេ នៅភូមិភាគឦសាននឹងមានកំពង់ផែពហុបំណងមួយនៅពេលខាងមុខ ។
នៅពេលអញ្ជើញសម្ពោធបើកឱ្យប្រើប្រាស់ជាផ្លូវការកំណាត់ផ្លូវជាតិលេខ៧៣ ផ្លូវខេត្តលេខ៣៧៧ និងផ្លូវខេត្តលេខ៣៧៧A ប្រវែងសរុប៩៨.៤០៥គ.ម សម្តេចធិបតីបានបញ្ជាក់ថា យើងនឹងកសាងកំពង់ផែ ពហុបំណងមួយនៅខេត្តក្រចេះ ដើម្បីពង្រឹងវិស័យភស្តុភាកម្ម និងការតភ្ជាប់នៅក្នុងតំបន់។
សម្តេចធិបតីបានបន្តថា វិស័យទេសចរណ៍ ឧស្សាហកម្ម កសិកម្ម នៅភូមិភាគឦសាននឹងរីកចម្រើន ប្រសិនបើការអភិវឌ្ឈហេដ្ឋារចនាសម្ព័ន្ធផ្លូវគមនាគមន៍កាន់តែរីកចម្រើននៅពេលខាងមុខ ។
សម្តេចធិបតីបានបញ្ជាក់ថា ហេដ្ឋារចនាសម្ព័ន្ធគមនាគមន៍នឹងរុញឲ្យវិស័យដឹកជញ្ជូន និងវិស័យភស្តុភាកម្មនៅភូមិភាគឦសានពង្រឹងការតភ្ជាប់កម្ពុជាទៅនឹងកិច្ចសហប្រតិបត្តិការជាមួយនឹងប្រទេសវៀតណាម និងឡាវ រហូតដល់ចិនកាន់តែសកម្ម ។
សម្តេចធិបតីបានបញ្ជាក់ថា «ហេដ្ឋារចនាសម្ព័ន្ធគមនាគមន៍ក៏នឹងអាចជួយបង្កើនតម្លៃបន្ថែមដល់ផលិតកម្ម និងដោះស្រាយបញ្ហាតម្រូវការវត្ថុធាតុដើម និងពង្រីកការតភ្ជាប់។
រហូតដល់ថ្ងៃទី៧ ខែសីហា ឆ្នាំ២០២៦ ភូមិភាគឦសានបានទទួលសំណើរស្នើសុំវិនិយោគសរុប ៧២ គម្រោង មានទុន ២.៧០០លានដុល្លារ និងរំពឹងថាអាចបង្កើតការងារជាង៨ម៉ឺនកន្លែង នៅក្នុងនោះខេត្ត ក្រចេះ បានទាក់ទាញ១៩គម្រោង មានទុនសរុប ១,១ ពាន់លានដុល្លារ ជាមួយនឹងក្តីរំពឹងថានឹងបង្កើតការងារធ្វើជូនពលរដ្ឋ ២៦.០០០នាក់ ៕
ចែករំលែកព័តមាននេះ