គ្រោះរាំងស្ងួតជិត១ខែ ៖ មន្ទីរធនធានទឹកខេត្តកំពង់ស្ពឺ អន្តរាគមន៍ដាក់ម៉ាស៊ីនបូមទឹក សង្គ្រោះស្រូវជាង ៥០ហិកតា កំពុងក្រៀមស្វិត
- កំពង់ស្ពឺ
ខេត្តកំពង់ស្ពឺ ៖ ដោយមើលឃើញពីការលំបាកគ្រោះរាំងស្ងួត គ្មានភ្លៀងធ្លាក់ប្រមាណជិតមួយខែមកហើយនោះ ស្រូវរបស់ប្រជាពលរដ្ឋខ្វះទឹក ក្រៀមស្វិតបណ្ដើរៗ។ មន្ទីរធនធានទឹកនិងឧតុនិយមខេត្តកំពង់ស្ពឺបានដាក់ម៉ាស៊ីនបូមទឹកចល័ត៦៥សេះ ដើម្បីជួយអន្តរាគមន៍សង្គ្រោះដំណាំស្រូវរបស់ប្រជាពលរដ្ឋ ប្រមាណជាង៥០ហិកតា ស្ថិតនៅក្នុងភូមិថ្លុកឈើទាល សង្កាត់សុព័រទេព ក្រុងច្បារមន ខេត្តកំពង់ស្ពឺ។
លោក ញាញ់ ជាបហ៊ង ប្រធានមន្ទីរធនធានទឹកនិងឧតុនិយមខេត្តកំពង់ស្ពឺបាននិយាយឲ្យដឹងថា កាលពីថ្ងៃទី២៣ ខែសីហា ឆ្នាំ២០២៦ ក្រុមការងារនៃមន្ទីរធនធានទឹក និងឧតុនិយមខេត្តកំពង់ស្ពឺ បានចុះដាក់ម៉ាស៊ីនបូមទឹកចល័ត៦៥ សេស ចំនួន១គ្រឿង ដើម្បីបូមទឹកជួយសង្គ្រោះដំណាំស្រូវរបស់ប្រជាពលរដ្ឋ ស្ថិតនៅភូមិថ្លុកឈើទាល សង្កាត់សុព័រទេព ក្រុងច្បារមន ខេត្តកំពង់ស្ពឺ ។ ដើម្បីជួយសង្គ្រោះស្រូវរបស់ប្រជាពលរដ្ឋ ដែលកំពុងខ្វះខាតទឹក និងក្រៀមស្វិតបណ្ដើរៗនោះ។ មន្ទីរធនធានទឹកមានតែម៉ាស៊ីនចល័ត៦៥សេះ នេះធ្វើការអន្តរាគមន៍បូមទឹកចែកចាយដាក់តាមប្រឡាយមេងាយស្រួលដល់ប្រជាពលរដ្ឋ ដាក់ម៉ាស៊ីនតូចៗដើម្បីបូមទឹកបន្ត ទៅដាក់តាមស្រែរបស់ពួកគាត់ដើម្បីសង្គ្រោះស្រូវដែលកំពុងជួបការខ្វះទឹក ក្រៀមស្វិតបណ្ដើរៗហើយនោះ។
លោក ញ៉ាញ់ ជាបហ៊ង ប្រធានមន្ទីរធនធានទឹកនិងឧតុនិយមខេត្តកំពង់ស្ពឺបានបន្តឲ្យដឹងទៀតថា ប្រជាពលរដ្ឋមានការស្នើសុំ ដោយពិបាកក្នុងការដាក់ម៉ាស៊ីនធំ មន្ទីរក៏សម្រេចដាក់ម៉ាស៊ីនចល័ត៦៥សេស បូមទម្លាក់ទៅប្រឡាយមេ ដើម្បីងាយស្រួលដល់ប្រជាពលរដ្ឋបូមដាក់ស្រែរបស់ពួកគាត់បន្តដោយខ្លួនគាត់ ម៉ាស៊ីនតូចៗ។ ទីតាំងខាងលើនេះគឺមានតាំងពីយូរណាស់មកហើយ រាល់ពេលដែលជួបគ្រោះរាំងស្ងួត មន្ទីរធនធានទឹកនិងឧតុនិយមខេត្តកំពង់ស្ពឺតែងតែ ដាក់ម៉ាស៊ីនចល័ត៦៥សេះ បូមចែកចាយជារៀងរាល់ឆ្នាំ៕
ចែករំលែកព័តមាននេះ