គា.ស់ផ្ទះលួ.ចលុយបានជិត ២លានរៀល រត់គេចខ្លួនជិត ១០ថ្ងៃ ត្រឡប់មកក្រវែលម្តងទៀត ត្រូវអស់លក្ខណ៍
- កំពង់ស្ពឺ
ខេត្តកំពង់ស្ពឺ៖ ជនសង្ស័យចំនួន២នាក់ ត្រូវបានកម្លាំងនគរបាលស្រុកសាមគ្គីមុនីជ័យធ្វើការស្រាវជ្រាវឃាត់ខ្លួនបាន ខណៈដែលជនសង្ស័យបានធ្វើសកម្មភាពគាស់ទ្វារផ្ទះប្រជាពលរដ្ឋចូលលួចលុយអស់ជិត២លានរៀល បានសម្រេចហើយរត់គេចខ្លួនជិត១០ថ្ងៃ ជិះម៉ូតូមកក្រវែលម្តងទៀត។ អ្នកជិតខាងឃើញតេប្រាប់ម្ចាស់ដែលបានដាក់ពាក្យបណ្ដឹងឲ្យសមត្ថកិច្ចជួយអន្តរាគមន៍ស្រាវជ្រាវអនុវត្តតាមផ្លូវច្បាប់ស្រាប់ ក៏ឃាត់ខ្លួនបានតែម្តង។
ការឃាត់ខ្លួនជនសង្ស័យបានធ្វើឡើងកាលពី វេលាម៉ោង១០និង៣០នាទីព្រឹកថ្ងៃទី២៣ ខែសីហា ឆ្នាំ២០២៦ នៅចំណុចក្នុងភូមិព្រៃជុំ ឃុំយុទ្ធសាមគ្គី ស្រុកសាមគ្គីមុនីជ័យ ខេត្តកំពង់ស្ពឺ។
នគរបាលស្រុកសាមគ្គីមុនីជ័យបាននិយាយដឹងថាជនសង្ស័យដែលឃាត់ខ្លួនទី១-មានឈ្មោះ វ៉ាន់ ផានិត ភេទប្រុស អាយុ២១ឆ្នាំមុខរបរមិនពិតប្រាកដ រស់នៅក្នុងភូមិព្រៃជុំ ឃុំយុទ្ធសាមគ្គី ស្រុកសាមគ្គីមុនីជ័យ ខេត្តកំពង់ស្ពឺ និងទី២-មានឈ្មោះ ខន សុភណ្ឌ ភេទប្រុស អាយុ២៦ឆ្នាំមុខរបរមិនពិតប្រាកដ រស់នៅក្នុងភូមិកោះ ឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺ។
ចំណែកម្ចាស់ផ្ទះមានឈ្មោះ គិរីវុឌ្ឈ សិលា ភេទប្រុស អាយុ៣១ឆ្នាំ រស់នៅក្នុងភូមិត្រពាំងមាន ឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺ ។
នគរបាលស្រុកសាមគ្គីមុនីជ័យបានបន្តឲ្យដឹងទៀតថា មុនពេលឃាត់ខ្លួនជនសង្ស័យទាំង២នាក់ខាងលើ គឺនៅថ្ងៃទី១៧ខែសីហា ឆ្នាំ២០២៦កន្លងទៅ នៅចំណុចភូមិត្រពាំងមាន ឃុំក្រាំងចេក ស្រុកសាមគ្គីមុនីជ័យ មានករណីលួចទ្រព្យសម្បត្តិប្រជាពលរដ្ឋមួយកើតឡើង បង្ករដោយជនសង្យ័យមិនអត្តសញ្ញណ បានធ្វើសកម្មភាពចូលគាស់លួចទ្រព្យសម្បត្តិនៅផ្ទះរបស់ឈ្មោះ គិរីវុឌ្ឈ សិលា ភេទប្រុស អាយុ ៣១ ឆ្នាំ រស់នៅភូមិឃុំកើតហេតុខាងលើ។ ជនសង្ស័យបានធ្វើសកម្មភាពគាស់ទ្វារផ្ទះលួចយកលុយអស់លុយចំនួន១លាន៥២មុឺនរៀលនិងរុះរើអីវ៉ាន់នៅក្នុងផ្ទះជនរងគ្រោះថែមទៀតផង។
នគរបាលស្រុកសាមគ្គីមុនីជ័យបានបន្តឲ្យដឹងទៀតថា÷ បើតាមការឱ្យដឹងពីម្ចាស់ផ្ទះខាងលើ មុនពេលកើតហេតុ មានប្រជាពលរដ្ឋរាយការណ៍ប្រាប់ម្ចាស់ផ្ទះថាឃើញឃើញជនសង្ស័យឈ្មោះ វ៉ាន់ ផានិត (ហៅវ័ន) ភេទប្រុស អាយុ២១ឆ្នាំ រស់នៅភូមិព្រៃជុំ ឃុំយុទ្ធសាមគ្គី ស្រុកសាមគ្គីមុនីជ័យ ជាមុខសញ្ញាចាស់ដែលធ្លាប់ចូលធ្វើសកម្មភាពគាស់ផ្ទះកើតហេតុខាងលើ បានជិះម៉ូតូក្រវែលនៅផ្ទះកើតហេតុខាងលើទៀត។ ដោយជនរងគ្រោះជាម្ចាស់ផ្ទះបានដាក់ពាក្យបណ្តឹងរួចហើយនោះ ប្តឹងទៅលើជនសង្ស័យឱ្យសមត្ថកិច្ចតាមធ្វើការស្រាវជ្រាវស្វែងរកចាប់ខ្លួន យកមកចាត់ការបន្តតាមផ្លូវច្បាប់នោះ។
នៅវេលាម៉ោង១០និង៣០នាទីព្រឹកថ្ងៃទី២៣ ខែសីហា ឆ្នាំ២០២៦កម្លាំងជំនាញនៃអធិការដ្ឋាននគរបាលស្រុកសាមគ្គីមុនីជ័យបានធ្វើការស្រាវជ្រាវឈានទៅធ្វើការឃាត់ខ្លួនជនសង្ស័យម្នាក់មាន ឈ្មោះ វ៉ាន់ ផានិត (ហៅវ័ន្ត) ភេទប្រុស អាយុ២១ឆ្នាំមុខរបរមិនពិតប្រាកដ រស់នៅក្នុងភូមិព្រៃជុំ ឃុំយុទ្ធសាមគ្គី ស្រុកសាមគ្គីមុនីជ័យ។ ក្រោយឃាត់ខ្លួនជនសង្ស័យបានឆ្លើយសារភាពថា រូបខ្លួនពិតជាបានធ្វើសកម្មភាពគាស់ទ្វារផ្ទះរបស់ជនរងគ្រោះលួចលុយពិតប្រាកដមែន ដោយឈ្មោះខន សុភណ្ឌ ភេទប្រុស អាយុ២៦ឆ្នាំ រស់នៅក្នុងភូមិកោះ ឃុំក្រាំងចេក ស្រុកសាមគ្គីមុនីជ័យ ជាអ្នកចូលទៅធ្វើសកម្មភាពគាស់ទ្វារផ្ទះ ចំណែករូបគេជាអ្នកនៅចាំមើលផ្លូវពីក្រោយផ្ទះ ពេលធ្វើសកម្មភាពរួចរូបគេនិងបក្ខពួកបានយកលុយទៅទិញថ្នាំជក់និងដើរចាយស៊ីផឹកជាមួយគ្នាអស់លុយអាលីងហើយ។
នគរបាលស្រុកសាមគ្គីមុនីជ័យបានបញ្ជាក់ឲ្យដឹងថា ក្រោយឃាត់ខ្លួនជនសង្ស័យ បានធ្វើការដកហូតវត្ថុតាងរួមមាន កាំបិតប៉័ងតោដងដែកចំនួន១ ចបជីកដែកចំនួន១និងម៉ូតូចំនួន១គ្រឿងម៉ាកហុងដា ធុនសេ១២៥ ពណ៌ខ្មៅ ស៊េរីឆ្នាំ២០២០ គ្មានផ្លាកលេខ ។
បច្ចុប្បន្ន ក្រុមជនសង្ស័យរួមជាមួយនឹងវត្ថុតាងនគរបាលបានកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការផ្ទាល់តាមផ្លូវច្បាប់។
សមត្ថកិច្ចក្នុងខេត្តកំពង់ស្ពឺបានធ្វើការអំពាវនាវដល់ប្រជាពលរដ្ឋ សូមបងប្អូនប្រជាពលរដ្ឋចូលរួមសហការជាមួយសមត្ថកិច្ច ប្រសិនបើមានការសង្ស័យ ឬឃើញសកម្មភាពខុសច្បាប់ សូមរាយការណ៍ជូនសមត្ថកិច្ចដែលនៅជិតបំផុត ដើម្បីចាត់វិធានការទាន់ពេលវេលាផងដែរ ៕
ចែករំលែកព័តមាននេះ