រាជធានីភ្នំពេញ ៖ នារសៀលថ្ងៃទី២៤ ខែសីហា ឆ្នាំ២០២៦ លោក ឆាយ ហុង ព្រះរាជអាជ្ញារង និងជាអ្នកនាំពាក្យអយ្យការអមសា លាដំបូងរាជធានីភ្នំពេញ បានឲ្យដឹងថា ករណីនេះ ជនសង្ស័យ៣នាក់ ដែលអង្គភាពប្រឆាំងអំពើពុករលួយឃាត់ខ្លួន បញ្ជូនមកស្ថាប័នអយ្យការ តំណាងអយ្យការបានសម្រចចោទប្រកាន់តាមនីតិវិធីបើកការស៊ើបសួរលើ ៖
១.ឈ្មោះ ថូ សំណាង ពីបទ.បំផ្លាញដោយចេតនា និងគៃបំបាត់ដោយទុច្ចរិតបទ.រំលោភអំណាច និងបទ.សម្អាតប្រាក់តាមមាត្រា ៦០១ នៃក្រមព្រហ្មទណ្ឌ មាត្រា ៣២ មាត្រា ៣៥ កថាខណ្ឌទី២ នៃច្បាប់ស្តីពីការប្រឆាំងអំពើពុករលួយ មាត្រា ៣ និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឆ្នាំ២០២០។
២.ឈ្មោះ ណុប រដ្ឋា ចោទប្រកាន់ពីបទ.សមគំនិត ក្នុងអំពើបំផ្លាញដោយចេតនា និងគៃបំបាត់ដោយទុច្ចរិត បទ.រំលោភអំណាច និងបទ.សម្អាតប្រាក់ តាមមាត្រា ២៩ មាត្រា៦០១ នៃក្រមព្រហ្ម ទណ្ឌ មាត្រា៣២ មាត្រា៣៥ កថាខណ្ឌទី២ នៃច្បាប់ស្តីពីការប្រឆាំងអំពើពុករលួយ មាត្រា ៣ និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឆ្នាំ២០២០។
៣.ឈ្មោះ យស់ រ៉ាណេ ចោទប្រកាន់ពីបទ.សមគំនិត ក្នុងអំពើបំផ្លាញដោយចេតនា និងគៃបំបាត់ដោយទុច្ចរិត និងបទ.សម្អាតប្រាក់ តាមមាត្រា ២៩ មាត្រា៦០១ នៃក្រមព្រហ្មទណ្ឌ មាត្រា ៣២ នៃច្បាប់ស្តីពីការប្រឆាំងអំពើពុករលួយ មាត្រា៣ និងមាត្រា៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឆ្នាំ២០២០។
បន្ទាប់ពីតំណាងអយ្យការធ្វើការចោទប្រកាន់ជនសង្ស័យទាំង៣នាក់ ជាផ្លូវការហើយ សំណុំរឿងបានចាត់បញ្ជូនទៅខាងចៅក្រមស៊ើបសួរ សម្រេចឃុំខ្លួនជនត្រូវចោទដាក់ពន្ធនាគារជាបណ្តោះអាសន្ន ដើម្បីបើកការស៊ើបអង្កេតបន្ត ឈានទៅដល់សវនាការជំនុំ ជម្រះលើអង្គសេចក្តីទាំងមូល ។
សូមជម្រាបថា អង្គភាពប្រឆាំងអំពើពុករលួយ (ACU) នៅរសៀលថ្ងៃទី២៣ ខែសីហា ឆ្នាំ២០២៦ បានបញ្ជូនលោក ថូ សំណាង ដែលជាមេខ្លោង និងគូកន ២នាក់ទៀត គឺលោក ណុប រដ្ឋា និងលោក យស់ រ៉ាណេ ទៅកាន់អយ្យការអមសាលាដំបូងរាជធានីភ្នំពេញ ដើម្បីសាកសួរបន្តនីតិវិធីតាមផ្លូវច្បាប់ ។
បើតាមលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានប្រាប់បណ្តាញព័ត៌មានក្នុងស្រុកថា ACU នឹងបញ្ជូនជនសង្ស័យ ថូ សំ ណាង ជាមេខ្លោង និងគូកន២នាក់ទៀត ឈ្មោះ ណុប រដ្ឋា និងឈ្មោះ យស់ រ៉ាណេ ទៅអយ្យការអមសាលាដំបូងរាជធានី នារសៀលនេះ ម៉ោង៤ ថ្ងៃទី២៣ ខែសីហា ឆ្នាំ២០២៦ ។
សូមបញ្ជាក់ថា លោក ថូ សំណាង អតីតអគ្គនាយក នៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន នៃក្រសួងការបរទេស និងសហប្រតិបត្តិការអន្តរជាតិ ត្រូវបានអង្គភាពប្រឆាំងអំពើពុក រលួយ នាំខ្លួនយកទៅសាកសួរពាក់ព័ន្ធនឹងបទល្មើស Online Scams ។
លោកទេសរដ្ឋមន្ត្រី ឱម យ៉ិនទៀង បានបញ្ជាក់ទៀតថា “លោក ថូ សំណាង បានសារភាពលួចយកសន្លឹកទិដ្ឋការប្រភេទ C និង Cex ប្រើប្រាស់ខុសច្បាប់ ជាង៦,០០០សន្លឹក ហើយចំណែកសន្លឹកនៅសល់ ៤ពាន់សន្លឹក ACU កំពុងតាមរកដែលគាត់ថា បានកំទេចចោល” ។
លោកទេសរដ្ឋមន្ត្រី ថ្លែងបញ្ជាក់ថែមទៀតថា “យើងរកឃើញសន្លឹកទិដ្ឋាការរបស់ដែលគាត់បានបញ្ចេញដោយខុសច្បាស់ ត្រូវបានជនបរទេស Online Scams ប្រើបាស់” ។
គួរជម្រាបផងដែរថា លោក ថូ សំណាង ត្រូវសម្តេចតេជោ ហ៊ុន សែន ប្រមុខរដ្ឋស្តីទី កាលពីថ្ងៃទី២៨ ខែមេសា ឆ្នាំ២០២៦ ចេញព្រះរាជក្រឹត្យបញ្ចប់មុខតំណែងពីអគ្គនាយក នៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន នៃក្រសួងការបរទេស និងសហប្រតិបត្តិការអន្តរជាតិ ហើយតែងតាំងលោកជាទីប្រឹក្សាក្រសួងជំនួសវិញ មានឋានៈស្មើអគ្គនាយក ៕
ចែករំលែកព័តមាននេះ