៦០០គ្រួសារលើកគ្នាតវ៉ាមុខសាលាខេត្ត រដ្ឋបាលខេត្តសៀមរាប សុំឱ្យបងប្អូនរក្សាភាពស្ងៀមស្ងាត់ ដើម្បីឱ្យអាជ្ញាធរខេត្តធ្វើការដោះស្រាយ
- សៀមរាប
ខេត្តសៀមរាប ៖ នា ថ្ងៃទី ២៤ ខែ សីហា ឆ្នាំ ២០២៦នេះ នៅមុខសាលាខេត្តសៀមរាប តំណាងប្រជាពលរដ្ឋប្រមាណជាង៦០០ គ្រួសារ រស់នៅភូមិ មណ្ឌល៣ សង្កាត់ស្លក្រាម ក្រុង ខេត្តសៀមរាប កើតទុក្ខមិន សុខចិត្តដោយអាជ្ញាធរជាតិអប្សរា បានកំណត់ផែនទីទីតាំងប្រើប្រាស់ដីធ្លី ក្នុងភូមិមណ្ឌល៣ ពីតំបន់លឿងបច្ចុប្បន្នឱ្យទៅជាតំបន់ក្រហម ។
ក្នុងសកម្មភាពតវ៉ានេះ តំណាងប្រជាពលរដ្ឋជាង៦០០ គ្រួសារ បាននាំគ្នាមកស្នើសុំឱ្យអាជ្ញាធរខេត្តសៀមរាប ដែលជាអាណាព្យា បាលខ្លួន ជួយធ្វើអន្តរាគមន៍ ក្នុងការសុំឱ្យអាជ្ញាធរជាតិអប្សរា ធ្វើការដកភូមិមណ្ឌលបីចេញពីតំបន់ក្រហម ឲ្យជាតំបន់លឿងវិញ ។
ដើម្បីរំលត់នូវក្តីក្តៅក្រហាយរបស់បងប្អូនប្រជាពលរដ្ឋនោះ គណៈអភិបាលខេត្តបានចាត់តាំងឲ្យ លោក ឌុច គឹមដន នាយករងរដ្ឋបាលសាលា ខេត្តសៀមរាប រួមនឹងលោក នាយកទីចាត់ការអន្តរវិស័យ និងមន្ត្រីជួបធ្ចើការសម្របសម្រួលជាមួយតំណាងប្រជាពលរដ្ឋទាំង៦០០គ្រួសារ ។
ក្នុងនាមរដ្ឋបាលខេត្ត លោក ឌុច គឹមដន បានធ្វើការពន្យល់ណែនាំបងប្អូន ព្រមទាំងបានលើកនូវសាវតានៃការស្នើ សុំ របស់ប្រជាពលរដ្ឋភូមិមណ្ឌល៣ និងការងាររបស់ក្រុម ការងារក្រសួង និង ការកំណត់ប្រភេទតំបន់ ដែលមានការពាក់ព័ន្ធទៅនឹងតំបន់រមណីយដ្ឋានអង្គរ ព្រមទាំងលើកឡើងពីនីតិវិធីច្បាប់ទៀតផង ។
លោកក៏បានបញ្ជាក់ថា ភូមិសាស្ត្រ នេះ ស្ថិតនៅក្នុងតំបន់គ្រប់គ្រងដោយអាជ្ញាធរជាតិអប្សរា ដែលកំណត់ដោយព្រះរាជក្រឹត្យ និងគ្រប់គ្រងដោយអង្គការយូនីស្កូ ទៀតផង ។ លោកក៏បានបន្តទៀតថា ក្នុងរយៈពេលនេះ ស្នើសុំបងប្អូនរក្សានូវភាពស្ងៀមស្ងាត់ មិនត្រូវធ្វើការសាងសង់ដោយគ្មានច្បាប់ទន្លាប់ឡើយ ដែលធ្វើឱ្យមានផលប៉ះពាល់ខូចខាតទ្រព្យ សម្បត្តិបងប្អូន នៅពេលដែលក្រុមសណ្តាប់ធ្នាប់អាជ្ញាធរជាតិអប្សរាចុះធ្វើការរុះរើសំណង់ខុសច្បាប់ ។ ម្យ៉ាងទៀត មុនពេលបងប្អូនធ្វើ ការសាងសង់ សូមបងប្អូនត្រូវធ្វើការដាក់ពាក្យច្បាប់អនុញ្ញាតសាងសង់ ដោយត្រូវរងចាំដល់មានច្បាប់ថ្មីចេញជាស្ថាបពរ ។
ក្នុងនោះលោកក៏បានលើកផងដែរ អំពីអនុសាសន៍ណែនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អំពីនីតិវិធីដោះស្រាយនូវទុក្ខលំបាករបស់ប្រជាពលរដ្ឋ ដែលស្ថិតក្នុងតំបន់អប្សរាផងដែរ ។ លោកនាយករងរដ្ឋបាលសាលាខេត្ត ក៏បានបញ្ជាក់ថា រាល់សំណើរបស់ បងប្អូនដាក់ជូនគណៈអភិបាលខេត្ត ត្រូវបានគណៈអភិបាល ខេត្តបានទទួលហើយ និង រងចាំយកទៅធ្វើការត្រួតពិនិត្យ ពិភាក្សា នៅក្នុងអង្គវេទិការអន្តរក្រសួងនៅខែខាងមុខនេះ ក្នុងការដោះ ស្រាយជូនបងប្អូន ។
លោកបានបន្តទៀតថា សូមបងប្អូននៅពេលក្រោយ បើមានបញ្ហាអ្វីសូមបងប្អូនរៀបចំចាត់តំណាងរបស់ខ្លួន ដើម្បីដោះស្រាយទៅតាមសន្តិវិធី ដើម្បីជៀសវាងនូវការប្រមូលផ្តុំគ្នា ធ្វើឲ្យប៉ះពាល់ពេលវេលាការងារបងប្អូន និង សណ្តាប់ធ្នាប់សាធារណៈ ព្រមទាំងប៉ះពាល់ដល់សោភ័ណភាពក្រុងទេសចរណ៍ទៀតផង ។
ក្នុងនោះដែរតំណាងប្រជាពលរដ្ឋ ដែលបានចូលជួបរដ្ឋបាលសាលាខេត្ត ក៏បានសម្តែងនូវអំណរគុណ ដល់រដ្ឋបាលខេត្ត ដែលបានធ្វើ ការបកស្រាយបំភ្លឺពីទុក្ខកង្វល់របស់ប្រជា ពលរដ្ឋទាំង៦០០គ្រួសារ ដែលធ្វើឱ្យបងប្អូនមានការជឿជាក់លើការដឹកនាំរបស់រាជរដ្ឋា ភិបាល ដែលមានសម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ