កូរ៉េខាងជើង-ជប៉ុន ៖ ប្រទេសកូរ៉េខាងជើង កាលពីថ្ងៃទី២២ សីហា បានរិះគន់យ៉ាងខ្លាំងចំពោះគម្រោងជប៉ុន ដែលសំដៅបង្កើនយ៉ាងច្រើនថវិកាយោធា ដោយចោទថា ក្រុងតូក្យូកំពុងរៀបចំសង្គ្រាមឈ្លានពាន ។
តាមទូរទស្សន៍ NHK និងសារព័ត៌មានជប៉ុនដទៃៗទៀតថា ក្រសួងការពារជាតិជប៉ុនបច្ចុប្បន្នបានស្នើថវិកាការពារដ៏ច្រើនសន្ធឹកសន្ធាប់សម្រាប់ឆ្នាំខាងមុខ ក្នុងទំហំទឹកប្រាក់ដល់៨៩០០ពាន់លានយន់(៤៨ពាន់លានអឺរ៉ូ)។ សំណើថវិកានោះ ជាថ្មីម្ដងទៀតពិតជាមានច្រើនមហាសាលជាប្រវត្តិសាស្ត្រ ។ នេះបើតាមការលើកឡើងរបស់ទីភ្នាក់ងារព័ត៌មានផ្លូវការកូរ៉េខាងជើងKCNA ។
KCNAបន្តថា ក៏ទោះបីសំណើថវិកានោះ មិនទាន់សម្រេចជាស្ថាពរ តែវាបង្ហាញយ៉ាងច្បាស់ថា ជាការបង្កើនដ៏គ្រោះថ្នាក់់ថវិកាសង្គ្រាម ដែលនឹងបង្កើតវិបត្តិថ្មីៗក្នុងតំបន់ និងលើពិភពលោក។ នោះនឹងជាការបង្កើនការចំណាយខាងយោធាដ៏ច្រើន ដែលនឹងនាំទៅរកការពង្រឹងកម្លាំងយោធា ដើម្បីត្រៀមធ្វើសង្គ្រាមឈ្លានពានមួយ ។
ជប៉ុនចាប់ផ្ដើមងាកចេញបណ្ដើរៗពីជំហរសន្តិភាពនិយម ដែលខ្លួនប្រកាន់យកចាប់ពីក្រោយសង្គ្រាមលោកលើកទី២មក ដោយបានបង្កើនការចំណាយខាងយោធា ពង្រឹងបណ្ដាកិច្ចព្រមព្រៀងខាងកិច្ចការពារ និងកំពុងដាក់ពង្រាយបណ្ដាមីស៊ីលរយៈឆ្ងាយនៅតាមបណ្ដាកោះដាច់ស្រយាលរបស់ខ្លួន ៕
==Kyodo
ចែករំលែកព័តមាននេះ