ក្រោយបា.ក់ស្រុត! ផ្លូវជាតិលេខ៧៦ ត្រូវបានស្ដារឡើងវិញយ៉ាងល្អប្រសើរ រួមចំណែកលើកស្ទួយសេដ្ឋកិច្ចខេត្តមណ្ឌលគិរី
- មណ្ឌលគិរី
ខេត្តមណ្ឌលគិរី ៖ អស់រយៈពេលបីឆ្នាំមកហើយ ដែលព្រឹត្តិការណ៍ក៏កម្រអំពីគ្រោះធម្មជាតិបាក់ស្រុតផ្លូវជាតិលេខ៧៦ កាលដើមខែសីហា ឆ្នាំ២០២៣កន្លងផុតទៅ បង្កការភ្ញាក់ផ្អើលនិងបានកាត់ផ្តាច់ចរាចរណ៏ចេញចូលទីរួមខេត្តមណ្ឌលគិរី តាមច្រកស្រុកកែវសីមាទាំងស្រុង ។
យ៉ាងណាមិញបច្ចុប្បន្នគិតត្រឹមថ្ងៃទី២៤ ខែសីហា ឆ្នាំ២០២៦ ជាងបីឆ្នាំក្រោយកើតមានគ្រោះធម្មជាតិបាក់ស្រុតផ្លូវជាតិលេខ៧៦ គេសង្កេតឃើញថា ក្រោមការយកចិត្តទុកដាក់របស់ប្រមុខរាជរដ្ឋាភិបាលកម្ពុជា ជាពិសេសក្រសួងសាធារណការ និងដឹកជញ្ជូន និងរដ្ឋបាលខេត្តមណ្ឌលគិរី ដែលមានមន្ទីរសាធារណការ និងដឹកជញ្ជូនខេត្តជាសេនាធិការផ្ទាល់ បានបន្តសកម្មភាពស្ថាបនាកែសម្រួលផ្លូវជាតិលេខ៧៦នេះងាយស្រួលបើកបរ ទាក់ទាញភ្ញៀវទេសចរ និងងាយដឹកជញ្ជូនទំនិញគ្រប់ប្រភេទ ដែលសំខាន់ជាងគេនោះគឺ ការដឹកផលិតផលកសិកម្មនានាក្នុងខេត្តចេញទៅលក់លើទីផ្សារ ដែលបានធ្វើឲ្យGDPសម្រាប់មនុស្សម្នាក់ៗមានចំណូល ២ ៤៦៦ដុល្លាក្នុងមួយឆ្នាំ ។
សូមរំឮកថា កំណាត់ផ្លូវជាតិលេខ ៧៦ ត្រង់ចំណុចអូរងើយ (PK ៩៤+០០០ ដល់ PK ៩៤+១៥០) ស្ថិតក្នុងឃុំសែនមនោរម្យ ស្រុកអូររាំង ខេត្តមណ្ឌលគិរី ដែលធ្លាប់បានរងការបាក់ស្រុតយ៉ាងធ្ងន់ធ្ងរ កាលពីយប់ថ្ងៃទី ០១ ខែសីហា ឆ្នាំ ២០២៣ ព្រោះតែមានភ្លៀងធ្លាក់យ៉ាងគំហុក ជាប់ៗគ្នាជាច្រើនថ្ងៃនៅតំបន់ភូមិភាគឦសាន បានធ្វើឱ្យស្រទាប់ដីខាងក្រោមនៃកំណាត់ផ្លូវជាតិលេខ ៧៦ ត្រង់ចំណុចអូរងើយ មានភាពសើមខ្លាំង និងហូរច្រោះគ្រឹះយ៉ាងធ្ងន់ធ្ងរ។ ហេតុការណ៍នេះបានបណ្តាលឱ្យដីផ្លូវបាក់រអិលធ្លាក់ចូលទៅក្នុងជ្រោះ ប្រវែងប្រមាណ ១៥០ ម៉ែត្រ និងជម្រៅបាក់ស្រុតចន្លោះពី ៣ ទៅ ១៥ ម៉ែត្រ ដោយបានកាត់ផ្តាច់ការធ្វើដំណើរទាំងស្រុង។
ភ្លាមៗកាលណោះ ក្រសួងសាធារណការ និងដឹកជញ្ជូន សហការជាមួយរដ្ឋបាលខេត្តមណ្ឌលគិរី បានសម្រេចបិទការចរាចរណ៍ជាបណ្តោះអាសន្ន ដើម្បីការពារសុវត្ថិភាពរបស់អ្នកធ្វើដំណើរ និងបានណែនាំឱ្យបង្វែរទិសដៅចរាចរណ៍ទៅប្រើប្រាស់ផ្លូវផ្សេងជំនួសវិញ។ ដើម្បីសម្រួលដល់ការដឹកជញ្ជូន និងការធ្វើដំណើររបស់ប្រជាពលរដ្ឋ ក៏ដូចជាភ្ញៀវទេសចរ ។ ក្រុមការងារបច្ចេកទេសបានចុះអន្តរាគមន៍យ៉ាងឆាប់រហ័ស ដោយបានឈូសឆាយ និងស្ថាបនា «ផ្លូវវាងបណ្តោះអាសន្ន» ប្រវែងប្រហែល ១ ០០០ ម៉ែត្រ នៅក្បែរទីតាំងកើតហេតុ។ ផ្លូវវាងនេះត្រូវ បានរៀបចំឱ្យមានសុវត្ថិភាព មានការដាក់ផ្លាកសញ្ញាចរាចរណ៍ និងភ្លើងបំភ្លឺច្បាស់លាស់ មុននឹងបើកឱ្យចរាចរណ៍។ការបើកសម្រួលផ្លូវវាងបណ្តោះអាសន្ន នៅថ្ងៃទី ០៧ ខែសីហា ឆ្នាំ ២០២៣ (ត្រឹមតែ ៧ ថ្ងៃបន្ទាប់ពីកើតហេតុបាក់ស្រុត) ។
ក្រោយកិច្ចខិតខំប្រឹងប្រែងយ៉ាងសកម្មរបស់ក្រុមការងារបច្ចេកទេស នៃមន្ទីរសាធារណការ និងដឹកជញ្ជូនខេត្តមណ្ឌលគិរី ដែលមានលោក រស់ គីមធន ជាប្រធានមន្ទីរដឹកនាំការងារចុះផ្ទាល់ និងអាជ្ញាធរពាក់ព័ន្ធ កំណាត់ផ្លូវដែលរងការខូចខាតត្រូវ បានស្ថាបនា និងជួសជុលរួចរាល់ជាស្ថាពរ ដោយបើកឱ្យសាធារណជនធ្វើដំណើរឆ្លងកាត់ឡើងវិញនាថ្ងៃទី០៥ ខែមករា ឆ្នាំ ២០២៤ ក្រោយការសាងសង់ជួសជុលកំណាត់ផ្លូវដើមឡើងវិញ (ប្រវែង ៤២៥ ម៉ែត្រ រួមទាំងការក្រាលកៅស៊ូ DBST ១០០%) ត្រូវបានបញ្ចប់ជាស្ថាពរ និងបានបើកឱ្យធ្វើចរាចរណ៍ជាធម្មតាសម្រាប់យានយន្តគ្រប់ប្រភេទ។
ការតភ្ជាប់នូវកំណាត់ផ្លូវជាតិដែលបានបាក់ស្រុតនេះ មិនត្រឹមតែស្តារឡើងវិញនូវខ្សែច្រវាក់ដឹកជញ្ជូនរបស់ខេត្តមណ្ឌលគិរីប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ក្នុងការជំរុញខឿនសេដ្ឋកិច្ច ការធ្វើពាណិជ្ជកម្ម និងវិស័យទេសចរណ៍នៅក្នុងតំបន់ភូមិភាគឦសានទាំងមូលឱ្យមានភាពល្អប្រសើរឡើងវិញផងដែរ៕
ចែករំលែកព័តមាននេះ