តើឆ្នាំនេះ កម្ពុជាអាចទទួលឥទ្ធិពលពីព្យុះប៉ុន្មានទៅ ?
- ភ្នំពេញ
កាលពីឆ្នាំទៅកម្ពុជាបានទទួលឥទ្ធិពលពីព្យុះជិត៣០ នៅក្នុងមួយឆ្នាំ ខណៈដែលមធ្យមភាគរាល់ឆ្នាំត្រឹមរង្វង់២៥ព្យុះប៉ុណ្ណោះ ប៉ុន្តែនៅឆ្នាំនេះ មិនទាន់មានការប៉ាន់ប្រមាណនៅឡើយទេ ខណៈដែលក្រសួងធនធានទឹក និងឧតុនិយម បានប្រកាសថា ព្យុះទី១៩ និង២០ បានមកសឹងតែព្រមគ្នា ខណៈព្យុះទី១៩ មិនទាន់អស់ឥទ្ធិពលនៅឡើយ ។
ក្រសួងបានជូនដំណឹង នៅថ្ងៃទី២២ ខែសីហា ឆ្នាំ២០២៦ថា សម្ពាធទាបដែលកើតមាននៅលើសមុទ្រចិនខាងត្បូង បានវិវត្តទៅជាព្យុះទី១៩ ឈ្មោះ ណារ៉ា និងព្យុះទី២០ ឈ្មោះ ហ្គាណាវី រួមជាមួយនឹងព្យុះទី១៨ ឈ្មោះ សូដេល ។
ក្រោមឥទ្ធិពលនៃព្យុះទាំងនេះ លើរបបខ្យល់មូសុងនិរតីដែលបក់លើឈូងសមុទ្របេងហ្គាល សមុទ្រអាន់ដាម៉ាន់ សមុទ្រចិនខាងត្បូង អាងទន្លេមេគង្គ សមុទ្រកម្ពុជា និងកម្ពុជាទោះបីជាកម្ពុជាមិនស្ថិតនៅលើគន្លងផ្ទាល់ ប៉ុន្តែធាតុអាកាស ចាប់ពីថ្ងៃទី២២ ដល់ថ្ងៃទី២៩ ខែសីហា នៅតំបន់វាលទំនាបអាចមានភ្លៀង ធ្លាក់ជាមួយខ្យល់កន្ត្រាក់ និងផ្គររន្ទះគ្រប ដណ្តប់លើផ្ទៃដី៣០ភាគរយ តំបន់ខ្ពង់រាប ៥០ភាគរយ ហើយតំបន់មាត់សមុទ្រ ៦០ភាគរយផងដែរ ។
គួររំលឹកថា កាលពីឆ្នាំ២០២៥ កម្ពុជាបានរងឥទ្ធិពលព្យុះសរុប ប្រមាណជា២៧ព្យុះ ហើយនៅក្នុងចំណោមព្យុះទាំងនោះ មានព្យុះខ្លះបានពន្លិចតំបន់ជាច្រើននៅក្នុងប្រទេសវៀតណាម ថៃ ឡាវ មីយ៉ាន់ម៉ា ជាដើម ប៉ុន្តែកម្ពុជាមានឥទ្ធិពលដែរ ប៉ុន្តែមិនធ្ងន់ធ្ងរ ៕
ចែករំលែកព័តមាននេះ