រាជធានីភ្នំពេញ ៖ គណៈបញ្ជាការឯកភាពខណ្ឌចំការមន បន្តការបង្ក្រាបទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ចំនួន ២កន្លែងផ្សេងគ្នា ក្នុងភូមិសាស្ត្រខណ្ឌចំការមន ។
ប្រតិបត្តិការបោសសម្អាតនេះ ធ្វើឡើងកាលពីថ្ងៃទី២០ ខែសីហា ឆ្នាំ២០២៦ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ក្រោមការដឹកនាំពីលោក កៀង ល័ក្ស អភិបាល នៃគណៈអភិបាលខណ្ឌចំការមន និងមានការសម្របសម្រួលផ្លូវច្បាប់ពីលោក ទិន សុចិត្រា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
ជាលទ្ធផលចំពោះទីតាំងចំនួន ០២ខាងលើ សមត្ថកិច្ចបានឆែកឆេរ រកឃើញ កុំព្យូទ័រ All-in-One ចំនួន ២៣៥គ្រឿង, ទូរសព្ទដៃចំនួន ១,៧៦១គ្រឿង, ម៉ូនីទ័រ ៦គ្រឿង, ស៊ីភីយូ (CPU) ៣គ្រឿង និងស៊ីមកាតបរទេសមួយចំនួនធំ (រាប់ម៉ឺនស៊ីម) ហើយបានឃាត់ខ្លួនជនសង្ស័យ ៧នាក់ រួមមាន (ខ្មែរ ៣នាក់ និងជនជាតិចិន ៤នាក់) ។
បច្ចុប្បន្ន ជនសង្ស័យទាំង ០៧នាក់ ព្រមទាំងវត្ថុតាងទាំងអស់ ត្រូវបានប្រគល់ជូន ស្នងការដ្ឋាននគរបាលរាជធានីភ្នំពេញ ដើម្បីបន្តតាមនីតិវិធីច្បាប់ ៕
ចែករំលែកព័តមាននេះ