រាជធានភ្នំពេញ ៖ មន្ត្រីក្រសួងការបរទេស លោក ថូ សំណាង ដែលគ្រួសារកំពុងប្រកាសស្វែងរកថា បាត់ខ្លួននោះ តាមពិតលោក ត្រូវបានអង្គភាពប្រឆាំងអំពើពុករលួយ (ACU) នាំខ្លួនទៅសួរចម្លើយពាក់ព័ន្ធបទល្មើសអនឡាញស្គេម Online Scams ។
ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ត្រូវបានបានបណ្តាញព័ត៌មានក្នុងស្រុក ស្រង់សំដីផ្សាយនៅយប់ថ្ងៃទី២០ ខែសីហា ឆ្នាំ២០២៦ថា ករណីលោក ថូ សំណាង កំពុងត្រូវបាន ACU ស្តាប់ចម្លើយពាក់ព័ន្ធបទល្មើសអនឡាញស្គេម ។
ឯកឧត្តមទេសរដ្ឋមន្ត្រី បានបញ្ជាក់ទៀតថា លោក ថូ សំណាង បានសារភាពលួចយកសន្លឹកទិដ្ឋការប្រភេទ C និង Cex ប្រើប្រាស់ខុសច្បាប់ ជាង ៦,០០០សន្លឹក ហើយចំណែកសន្លឹកនៅសល់ ៤ពាន់សន្លឹក ACU កំពុងតាមរក ដែលគាត់បានថា បានកម្ទេចចោល ។
ជាមួយគ្នានោះដែរ ឯកឧត្តមទេសរដ្ឋមន្ត្រី ត្រូវបានស្រង់សំដីថ្លែងបញ្ជាក់បន្ថែមថា៖ “យើងរកឃើញសន្លឹកទិដ្ឋាការរបស់ដែលគាត់បានបញ្ចេញដោយខុសច្បាស់ ត្រូវបានជនបរទេសអនឡាញស្គេម ប្រើបាស់” ។
សូមបញ្ជាក់ថា លោក ថូ សំណាង ត្រូវបានព្រះមហាក្សត្រ ចេញព្រះរាជក្រឹត្យបញ្ចប់មុខតំណែងពី អគ្គនាយក នៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន នៃក្រសួងការបរទេស និងសហប្រតិបត្តិការអន្តរជាតិ ហើយតែងតាំងលោកជាទីប្រឹក្សាក្រសួងជំនួសវិញ មានឋានៈ ស្មើអគ្គនាយក ។
នៅយប់ថ្ងៃទី២០ សីហា ២០២៦ តាមបណ្តាញសង្គម មានការចែកចាយព័ត៌មាន នៃការបាត់ខ្លួនលោក ថូ សំណាង ក្រោយក្រុមគ្រួសារបានទៅដាក់ពាក្យបណ្តឹងនៅប៉ុស្តិ៍នគរបាលជ្រោយចង្វារ និងប្រកាសស្វែងរក ៕
ចែករំលែកព័តមាននេះ