ទីក្រុងវ៉ាស៊ីនតោន៖ លោកដូណាល់ត្រាំមានប្រសាសន៍ថាលោកចង់ជួបមុខលោកគីមជុងអ៊ុននៅចុងឆ្នាំនេះ។ ប៉ុន្តែបំណងប្រាថ្នារបស់គាត់តែងតែទទួលបានការធ្វើព្រងើយកន្តើយម្ដងហើយម្ដងទៀតពី សំណាក់ទីក្រុងព្យុងយ៉ាង។ ព្យុងយ៉ាងថាអាចធ្វើបែបនេះបានលុះត្រាតែមានលក្ខខណ្ឌដ៏តឹងរ៉ឹងមួយចំនួន។ ដូច្នេះ បើទុកជាលោកទាំង២មានទំនាក់ទំនងស្អិតល្មួតជាមួយគ្នាយ៉ាងណាក្ដី ក៏មិនមែនចេះតែជួបគ្នាបានដោយងាយស្រួលនោះឡើយ។ កាលពីដើមសប្ដាហ៍នេះ លោកត្រាំនៅសុខៗស្រាប់តែសម្រេចចិត្តកាត់បន្ថយសមយុទ្ធយោធារួមគ្នារវាងកូរ៉េខាងត្បូង និងអាមេរិក។ លោកថាសមយុទ្ធនេះមិនបានចំណេញអ្វីទេក្រៅពីបង្កអរិភាពជាមួយកូរ៉េខាងជើង។ កាលពីថ្ងៃពុធ លោកប្រកាសចង់ជួបគ្នាជាមួយលោកគីមជុងអ៊ុន។ លោកត្រាំកំពុងអន្ទះសាចង់ចាប់ផ្ដើមការចរចានុយក្លេអ៊ែរសាជាថ្មីជាមួយកូរ៉េខាងជើងដើម្បីទទួលបានការចាប់អារម្មណ៍ជាថ្មីពីសហគមន៍អន្តរជាតិ។ នេះបើយោងតាមប្រភពម្នាក់ដែលដឹងអំពីការពិភាក្សាគ្នាសង្ខេបរវាងមន្ត្រីរដ្ឋាភិបាលកូរ៉េខាងត្បូង និងអាមេរិក។
មិនមានសញ្ញាណាមួយថាសង្គ្រាមអ៊ីរ៉ង់ដែលអូសបន្លាយពេលជិតកន្លះឆ្នាំទៅហើយនោះអាចនឹងបិទបញ្ចប់ទៅវិញនៅពេលឆាប់ៗនេះទេ។ លោកត្រាំនៅតែចង់បោះដៃទៅរកកូរ៉េខាងជើងជានិច្ចទោះបីដឹងថារដ្ឋាភិបាលប្រទេសនេះបន្តជួយជ្រោមជ្រែងរុស្ស៊ីនៅក្នុងសង្គ្រាមអ៊ុយក្រែនដោយផ្ដល់ជាកងទ័ព គ្រាប់រំសេវ និងគ្រឿងបរិក្ខារដទៃទៀតយ៉ាងណាក្ដី។ រដ្ឋាភិបាលកូរ៉េខាងត្បូងបច្ចុប្បន្ននេះហាក់ដូចជាយល់ស្របតាមយុទ្ធសាស្ត្ររបស់លោកត្រាំ។ ប៉ុន្តែមន្ត្រីជាន់ខ្ពស់នៅទីក្រុងសេអ៊ូលនៅតែមិនទាន់អស់ចិត្តនៅឡើយទេដែលលោកត្រាំកាត់បន្ថយសមយុទ្ធយោធា។ លោកត្រាំអាចនឹងអញ្ជើញទៅចូលរួមកិច្ចប្រជុំកំពូលអេប៉ិចនៅទីក្រុងស៊ឹនចិននាចុងឆ្នាំនេះ។ បើដូច្នេះមែន វាជាការបង្កើតឱកាសជួបគ្នានៃមេដឹកនាំនៅក្នុងតំបន់ ប្រសិនបើកូរ៉េខាងជើងទទួលយកការបោះដៃរបស់លោកត្រាំដើម្បីជួបគ្នាជាថ្មី។ នេះបើយោងតាមប្រភពខាងលើ។ អ្នកនាំពាក្យក្រសួងការបរទេសអាមេរិកបញ្ជាក់ថារដ្ឋាភិបាលរបស់ខ្លួននៅតែបើកចំហជានិច្ចសម្រាប់ការសន្ទនាគ្នាជាមួយកូរ៉េខាងជើងដោយមិនកំណត់បុរេលក្ខខណ្ឌ។
សេតវិមានសូមមិនធ្វើអត្ថាធិប្បាយពាក់ព័ន្ធនឹងបញ្ហានេះទេ ចំណែកខុទ្ទកាល័យប្រធានាធិបតីកូរ៉េខាងត្បូងក៏មិនឆ្លើយតបនឹងសំណួររបស់អ្នកសារព័ត៌មានដែរ។ ដោយឡែក ក្រសួងការបរទេសកូរ៉េខាងត្បូងសូមឱ្យពិនិត្យមើលសេចក្ដីថ្លែងការណ៍កាលពីមុននេះដែលសង្ឃឹមថាពាក្យសម្ដីរបស់ត្រាំអាចនឹងនាំទៅដល់ការសន្ទនាគ្នាជាសាច់ការជាមួយទីក្រុងព្យុងយ៉ាង។ លោកលីមអ៊ូលឈូលជាគ្រូបង្រៀននៅវិទ្យាស្ថានសិក្សាអំពីអាស៊ីបូព៌ានៃសាកលវិទ្យាល័យគ្យុងណាម។ លោកថ្លែងថាចម្លើយតបពីកូរ៉េខាងជើងហាក់ដូចជានៅឆ្ងាយឯជើងមេឃ។ ទន្ទឹមនឹងនោះ ពួកគេកោតសរសើរថាទំនាក់ទំនងឯកជនរវាងលោកគីម និងលោកត្រាំមានលក្ខណៈល្អប្រសើរ។ មានន័យថាពួកគេបែងចែកដាច់ពីគ្នារវាងទំនាក់ទំនងផ្ទាល់ខ្លួន និងការចូលរួមពិភាក្សាគ្នាថ្នាក់ជាតិ។ លោកលីមយល់ថាទំនាក់ទំនងផ្ទាល់ខ្លួនទំនងជាមិនអាចយកទៅឡូកឡំជាមួយផលប្រយោជន៍ជាតិ ឬកិច្ចខិតខំប្រឹងប្រែងដើម្បីពង្រឹងសមត្ថភាពការពារជាតិនោះឡើយ។ និយាយមួយបែបទៀតថាទីក្រុងព្យុងយ៉ាងចាត់ទុកនយោបាយការទូតដែលប្រើប្រាស់ទំនាក់ទំនងផ្ទាល់ខ្លួនជាបង្អែក វាមានកម្រិតកំណត់របស់វា ហើយមិនអាចលប់លើនយោបាយជាអាទិភាពរបស់ជាតិជាដាច់ខាត។
លោកស្រីគីមយូជុងដែលជាប្អូនស្រីលោកគីមជុងអ៊ុនធ្លាប់រិះគន់ខ្លាំងៗចំពោះការធ្វើសមយុទ្ធយោធារួមគ្នាដែលមានឈ្មោះថាខែលការពារសេរីភាពអ៊ូលឈី។ លោកស្រីសមយុទ្ធនេះបង្ហាញអំពីចរិតឈ្លានពាន។ ម៉្យាងទៀត អាមេរិកនៅតែប្រកាន់នយោបាយយកគ្នាជាសត្រូវចំពោះកូរ៉េខាងជើង។ កាលពីថ្ងៃព្រហស្បតិ៍ កូរ៉េខាងជើងបាញ់មីស៊ីលដប់គ្រាប់ចេញពីសមុទ្រខាងកើត ហើយត្រូវអ្នកវិភាគចាត់ទុកថាជាការប្រឆាំងជំទាស់នឹងសមយុទ្ធយោធា។ ទូរទស្សន៍កូរ៉េខាងជើងបានដកស្រង់ពាក្យសម្ដីរបស់លោកស្រីគីមយូជុងមកផ្សាយថាបើអាមេរិកចង់បង្ហាញឥរិយាបថល្អរកគ្នា ពួកគេនឹងមិនទទួលបានចម្លើយតប (ពីកូរ៉េខាងជើង) ដូចដែលពួកគេប្រាថ្នាចង់បាននោះទេ។ កូរ៉េខាងជើងបានដាក់លក្ខខណ្ឌច្បាស់ៗទៅអាមេរិកប្រសិនបើចង់ជួបគ្នា។ ក្នុងនោះ មានដូចជាអាមេរិកត្រូវកែសម្រួលគោលនយោបាយអរិភាពរបស់ខ្លួនចំពោះកូរ៉េខាងជើង, អាមេរិកត្រូវទទួលស្គាល់ថាកូរ៉េខាងជើងបានក្លាយជារដ្ឋនុយក្លេអ៊ែរ ឬយ៉ាងហោចណាស់ត្រូវប្រកាសថាអាមេរិកលែងចង់កាត់រំសាយកម្មវិធីនុយក្លេអ៊ែររបស់កូរ៉េខាងជើង។
លោកហុងមីនជាអ្នកស្រាវជ្រាវជាន់ខ្ពស់នៅវិទ្យាស្ថានកូរ៉េដើម្បីការបង្រួបបង្រួមជាតិ។ លោកយល់ថាកូរ៉េខាងជើងក៏ហាក់ដូចជាចង់បោះដៃទៅរកអាមេរិកដើម្បីសន្ទនាគ្នាដែរដោយយោងតាមពាក្យសម្ដីរបស់លោកស្រីគីមយូជុង។ គោលដៅស្នូលទំនងជាចង់ជំរុញឱ្យអាមេរិកបង្ហាញជំហររបស់ខ្លួនឱ្យបានច្បាស់លាស់ជាងនេះ។ លោកកត់សម្គាល់ថាទីក្រុងព្យុងយ៉ាងមិនចង់និយាយអំពីឈ្មោះប្រទេសអ៊ីរ៉ង់ទេដើម្បីកុំឱ្យមានបញ្ហាល្អក់កករនឹងគ្នាជាមួយលោកត្រាំ។ សេចក្ដីថ្លែងការណ៍របស់លោកស្រីគីមយូជុងទំនងជាមិនច្រានចោលទាំងស្រុងទេនូវលទ្ធភាពនៃការសន្ទនាគ្នា។ សេចក្ដីថ្លែងការណ៍នេះក៏ជាទីចាប់អារម្មណ៍សម្រាប់ប្រទេសជប៉ុនផងដែរដែលកំពុងខិតខំកសាងកម្លាំងយោធារបស់ខ្លួនឡើងវិញ និងពង្រឹងទំនាក់ទំនងជាមួយអាមេរិក និងកូរ៉េខាងត្បូង។ ជប៉ុនក្លាយជាចំណុចដែលគួរឱ្យរង្គាសចិត្តសម្រាប់កូរ៉េខាងជើង។ លោកហុងមីនយល់ថាទីក្រុងព្យុងយ៉ាងហាក់ដូចជាបង្ហាញសេណារីយោចង់ជួបគ្នាតតួតែ២នាក់រវាងវ៉ាស៊ីនតោន និងព្យុងយ៉ាងដោយផាត់ចោលកូរ៉េខាងត្បូង ហើយចាត់ទុកជប៉ុនជាគូបដិបក្សយោធា៕ ប្រភព៖ Reuters
ចែករំលែកព័តមាននេះ