ខេត្តត្បូងឃ្មុំ ៖ អាជ្ញាធរខេត្តត្បូងឃ្មុំ ចុះពិនិត្យស្ថានភាពទឹកទន្លេមេគង្គលិចផ្លូវបេតុងនៅស្រុកអូររាំងឪ ដែលកំពុងក្លាយជារមណីយដ្ឋានទេសចរណ៍ចល័ត ។
ជាក់ស្តែងបើយោងតាផេក រដ្ឋបាលស្រុកអូររាំងឪ ខេត្តត្បូងឃ្មុំ បានប្រកាសថា នាថ្ងៃទី២១ ខែសីហានេះថា ៖ រសៀលថ្ងៃទី២០ ខែសីហា ឆ្នាំ២០២៦ ឯកឧត្តម ម៉ៅ ឌុង អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប៉ែន កុសល្យ អភិបាលខេត្ត អមដំណើរដោយលោក ជា ណារ៉ុន អភិបាលស្រុក និងក្រុមការងារស្រុក ឃុំ ភូមិ អញ្ជើញចុះពិនិត្យស្ថានភាពជាក់ស្ដែងទឹកទន្លេមេគង្គ នៅផ្លូវបេតុងនៅខាងក្រោយវត្តទួលឃ្លាំង ស្ថិតក្នុងភូមិទួលឃ្លាំង ឃុំព្រះធាតុ ស្រុកអូររាំងឪ ដែលត្រូវបានទឹកទន្លេមេគង្គឡើងលិចផ្លូវ ។ ផ្លូវនេះជាផ្លូវតភ្ជាប់ទៅកាន់ភូមិទួលគរ ឃុំទន្លេបិទ ស្រុកត្បូងឃ្មុំ និងជាច្រកធ្វើដំណើររបស់ប្រជាពលរដ្ឋក្នុងតំបន់ ។
ជាមួយគ្នានេះ ក្នុងរយៈពេលប្រមាណ ៣ថ្ងៃកន្លងមកនេះ តំបន់នេះ ក៏មានប្រជាពលរដ្ឋមកលេងកម្សាន្ត និងលក់ដូរយ៉ាងច្រើនកុះករ ដោយសារទេសភាពទឹកទន្លេឡើង បង្កើតជាបរិយាកាសទាក់ទាញ ដែលអាចចាត់ទុកជាលក្ខណៈ «រមណីយដ្ឋានទេសចរណ៍ចល័ត» នៅតាមដងទន្លេមេគង្គ។
ទន្ទឹមនឹងនេះ សូមបងប្អូនប្រជាពលរដ្ឋ និងអ្នកធ្វើដំណើរទាំងអស់ បង្កើនការប្រុងប្រយ័ត្នខ្ពស់ក្នុងរដូវទឹកឡើង ជាពិសេសនៅតំបន់ផ្លូវដែលមានទឹកលិច និងតំបន់ជាប់មាត់ទន្លេ ដើម្បីចៀសវាងហានិភ័យ និងធានាសុវត្ថិភាពក្នុងពេលធ្វើដំណើរ និងកម្សាន្ត ៕
ចែករំលែកព័តមាននេះ