ដេញថ្លៃទាបពេក សង្ស័យលទ្ធផលសំណង់គ្មានគុណភាព
- ស្ទឹងត្រែង
ខេត្តស្ទឹងត្រែង៖ រដ្ឋបាលឃុំកុំភុន ស្រុកសេសាន បានរៀបចំកិច្ចប្រជុំប្រកួតប្រជែង ទទួលសំណើដេញថ្លៃនិងបើកស្រោមសំបុត្រគម្រោងឃុំឆ្នាំ២០២៦ នាព្រឹកថ្ងៃទី២១ ខែសីហា ឆ្នាំ២០២៦ នៅសាលាឃុំកុំភុន ដោយមានក្រុមហ៊ុនចំនួន ៥ ចូលរួមប្រកួតប្រជែង។
ផ្អែកតាមលទ្ធផលនៃការបើកស្រោមសំបុត្រគម្រោងសាងសង់ផ្លូវក្រាលក្រួសធម្មជាតិ ប្រវែង ៣,៨៥ គីឡូម៉ែត្រ (ទទឹង ៥ម៉ែត្រ) រួមទាំងការសាងសង់លូមូលទោល ៥កន្លែង (មុខកាត់ ០,៦ម ចំនួន ៤កន្លែង និងមុខកាត់ ០,៨ម ចំនួន ១កន្លែង)ព្រមទាំងការដាក់ស្លាកសញ្ញាគម្រោង និងការថែទាំរយៈពេល ៦ខែ៖ថវិកាប៉ាន់ស្មានរបស់ឃុំ៖ ១៧០,៣០៤,០៥៣ រៀល តម្លៃឈ្នះដេញថ្លៃ (ក្រុមហ៊ុន ជាមករា ស៊ីអេសអ័រ) ១១១,៧០០,០០០ រៀល (តំណាងដោយលោក ជា មករា) ថវិកាសន្សំសំចៃបាន៖ ៥៨,៦០៤,០៥៣ រៀល (ស្មើនឹង៣៤.៤១%) ការរំពឹងទុកនាពេលខាងមុខនៃសមិទ្ធផលតាមរយៈថវិកាដែលនៅសល់ពីការដេញថ្លៃនេះ ប្រជាពលរដ្ឋនិងអង្គការសង្គមស៊ីវិលក្នុងមូលដ្ឋាន សម្តែងនូវការអបអរសាទរ និងរំពឹងយ៉ាងមុតមាំថា រដ្ឋបាលឃុំនឹងអនុវត្តនីតិវិធីបន្តគម្រោង ដើម្បីយកថវិកាសន្សំបានជិត ៦០លានរៀលនេះ ទៅពង្រីកសមិទ្ធផលបន្ថែម (គុណនឹង ១.៥២ដង) រួមមាន៖ផ្លូវក្រួសធម្មជាតិ (កម្រាស់ ១៥០មម) កើនពី ៣,៨៥០ ម៉ែត្រ ដល់ ៥,៨៦៩ ម៉ែត្រប្រព័ន្ធលូ៖ កើនការសាងសង់លូមូលទោលបន្ថែមសរុប រហូតដល់ ៨ កន្លែង ។ នេះបើការគណនាឡើងបឋមដោយក្រុមហ៊ុនអ្នកទទួលការទូទៅ ។
ទន្ទឹមនឹងក្តីរីករាយចំពោះការសន្សំសំចៃថវិកាជាតិ ប្រជាពលរដ្ឋមួយចំនួនក៏បានសម្តែងកង្វល់ជុំវិញតម្លៃដេញថ្លៃដែលធ្លាក់ចុះទាបខ្លាំង ដោយបារម្ភក្រែងមានផលប៉ះពាល់ដល់គុណភាព និងបទដ្ឋានបច្ចេកទេសនៃការសាងសង់។ ដោយសារយោងតាមការជាក់ស្តែងកន្លងមកការដេញថ្លៃប្រកួតប្រជែងក្នុងតម្លៃទាប តែគុណភាពនិងសោភ័ណ្ឌភាព ធ្លាក់ចុះជាច្រើនគម្រោងរួចទៅហើយដែរ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ