ទីក្រុងប៉េកាំង ៖ អត្រាអត់ការងារធ្វើក្នុងចំណោមយុវជន នៅតាមទីប្រជុំជនរបស់ប្រទេសចិន បានកើនឡើងដល់ ១៧,៩% ក្នុងខែកក្កដា ដែលជាកម្រិតខ្ពស់បំផុតចាប់តាំងពីខែសីហា ឆ្នាំ២០២៥ មក និងបានកើនឡើងពីអត្រា ១៤,៩% កាលពីខែមិថុនាកន្លងទៅ។ នេះបើតាមប្រភពពី Reuters និង China Press។
យោងតាមទិន្នន័យដែលចេញផ្សាយដោយការិយាល័យស្ថិតិជាតិចិន កាលពីថ្ងៃទី១៩ ខែសីហា ឆ្នាំ២០២៦ បានឱ្យដឹងថា អត្រាអ្នកអត់ការងារធ្វើនៅក្នុងចំណោមយុវជន ដែលមានអាយុចាប់ពី ១៦ ដល់ ២៤ ឆ្នាំ (មិនរាប់បញ្ចូលសិស្ស-និស្សិត) បានកើនឡើងដល់ ១៧,៩% ពោលជាការកើនឡើង ៣% ធៀបនឹងខែមុន។
ចំណែកអត្រាអ្នកអត់ការងារធ្វើសម្រាប់ក្រុមអាយុ ២៥ ដល់ ២៩ ឆ្នាំ បានកើនឡើងដល់ ៧,២% ពោលជាការកើនឡើង ០,១% ធៀបនឹងខែមុន ដោយបានត្រឡប់ទៅរកកម្រិតកាលពីខែឧសភាវិញ ខណៈពេលដែលអត្រាអ្នកអត់ការងារធ្វើសម្រាប់ក្រុមអាយុ ៣០ ដល់ ៥៩ ឆ្នាំ បានធ្លាក់ចុះមកត្រឹម ៣,៩% ដែលជាកម្រិតទាបបំផុតក្នុងឆ្នាំនេះ។
នៅក្នុងខែកក្កដា គឺជារដូវកាលដ៏មមាញឹកបំផុតសម្រាប់និស្សិតបញ្ចប់ការសិក្សានៅថ្នាក់មហាវិទ្យាល័យ ដើម្បីឈានជើងចូលក្នុងទីផ្សារការងារ។ កាលពីខែកក្កដា ឆ្នាំមុន អត្រាអ្នកអត់ការងារធ្វើក្នុងចំណោមយុវជនចិនមានចំនួន ១៧,៨% ហើយបានបន្តកើនឡើងដល់ ១៨,៩% នៅក្នុងខែសីហា ដែលជាចំណុចខ្ពស់បំផុតក្នុងរយៈពេល១ឆ្នាំកន្លងមកនេះ មុនពេលធ្លាក់ចុះជាបន្តបន្ទាប់។
ចំនួននិស្សិតបញ្ចប់ការសិក្សាមកពីមហាវិទ្យាល័យ និងសាកលវិទ្យាល័យទូទៅនៅទូទាំងប្រទេសចិនក្នុងឆ្នាំ ២០២៦ ត្រូវបានរំពឹងថានឹងកើនឡើងដល់ ១២,៧ លាននាក់ ពោលជាការកើនឡើងប្រមាណ ៤៨ ម៉ឺននាក់ បើធៀបនឹងឆ្នាំ ២០២៥។ កត្តានេះ រួមផ្សំជាមួយនឹងនិស្សិតបញ្ចប់ការសិក្សាដែលមិនទាន់មានការងារធ្វើពីឆ្នាំមុនៗ និស្សិតវិលត្រឡប់មកពីបរទេស និងអ្នកដែលប្រឡងធ្លាក់ចូលរៀនថ្នាក់ក្រោយឧត្តមសិក្សា ឬប្រឡងធ្លាក់មន្ត្រីរាជការ ដែលនេះនឹងបង្កើតជាសម្ពាធយ៉ាងខ្លាំង អំឡុងរដូវកាលស្វែងរកការងារធ្វើនារដូវក្តៅនៅក្នុងប្រទេសមហាអំណាចសេដ្ឋកិច្ចលំដាប់ទី ២ ពិភពលោកមួយនេះ៕
ចែករំលែកព័តមាននេះ