រាជធានីភ្នំពេញ ៖ ក្រសួងបរិស្ថាន បានឱ្យដឹងថា នៅក្នុងខែកក្កដា ឆ្នាំ២០២៦ បន្តសហការជាមួយដៃគូពាក់ព័ន្ធ ចុះពិនិត្យនិងបង្ក្រាបបទល្មើសនៅតាមតំបន់ការពារធម្មជាតិ ដើម្បីបង្កើនភាពបៃតង ធានានិរន្តរភាពបរិស្ថាន និងលើកកម្ពស់ជីវភាពសហគមន៍មូលដ្ឋាន ដោយការបង្ក្រាបបទល្មើសសត្វព្រៃ និងការពារធនធានធម្មជាតិសំខាន់ៗ សរុបចំនួន២៣ករណី ក្នុងនោះបានកសាងសំណុំ រឿង(អញ្ញាតជន) ដើម្បីបញ្ជូនទៅតុលាការ បានចំនួន១ករណី ។
ក្រសួងបរិស្ថាន បានលើកឡើងថា ក្រុមការងារគម្រោងការពារធម្មជាតិ នៅតំបន់ជួរភ្នំក្រវាញ ដែលមានក្រសួងបរិស្ថាន សហការជាមួយអង្គការសម្ព័ន្ធមិត្តសត្វព្រៃ កងរាជអាវុធហត្ថលើផ្ទៃប្រទេស រួមជាមួយរដ្ឋបាលខេត្ត និងមន្ទីរបរិស្ថានខេត្តកំពង់ស្ពឺ ខេត្តពោធិ៍សាត់ ខេត្តបាត់ដំបង និងខេត្តកោះកុង នៅក្នុងខែកក្កដា ឆ្នាំ២០២៦ បានអនុវត្តវិធានការតឹងរ៉ឹង ចុះល្បាតបានចំនួន៨៦លើក ដើម្បីទប់ស្កាត់បទល្មើសព្រៃឈើ ការបង្ក្រាបបទល្មើសសត្វព្រៃ និងការពារធនធានធម្មជាតិសំខាន់ៗ សរុបចំនួន ២៣ករណី ក្នុងនោះបានកសាងសំណុំរឿង(អញ្ញាតជន) ដើម្បីបញ្ជូនទៅតុលាការ បានចំនួន១ករណី ។
ក្នុងចំណោមបទល្មើសបង្កាបបានមានបទល្មើសព្រៃឈើ មានចំនួន១៤ករណី បទល្មើសសត្វព្រៃ មានចំនួន០៨ករណី និងបទល្មើសនេសាទខុសច្បាប់ចំនួន១ករណី។ លើសពីនេះ ក្រុមការងារបានដកហូតវត្ថុតាង រួមមានរណាយន្តតូចធំ ចំនួន១៦គ្រឿង គោយន្តចំនួន១គ្រឿង កាំភ្លើងកែច្នៃ ចំនួន៥ដើម អន្ទាក់ខ្សែ ចំនួន៤៦២ខ្សែ និងសម្ភាប្រព្រឹត្តបទល្មើសមួយចំនួនទៀត ។
សូមបញ្ជាក់ថា ជារួមនៅទូទាំងប្រទេស នៅក្នុងខែកក្កដាកន្លងមកនេះ ក្រសួងបរិស្ថាន បានពង្រឹងការងារគ្រប់គ្រង និងពង្រឹងការអនុវត្តច្បាប់ ដើម្បនិរន្តរភាពបរិស្ថាន។ មន្ត្រីឧទ្យានុរក្ស បានចុះពិនិត្យនិងបង្ក្រាបបានផ្ទៃដីកាប់រានខុសច្បាប់ ក្នុងតំបន់ការពារធម្មជាតិ សរុបទំហំ ២១,២៦ហិកតា ក្នុងនោះកសាងសំណុំរឿងទៅតុលាការសរុបទំហំ ២,៨៩ហិកតា និងផ្ទៃដីបង្ក្រាបដោយក្រុមការងារចម្រុះសរុបទំហំ ១៨,៣៧ហិកតា។ ក្រុមការងារបានចុះល្បាត ចំនួន ១២៦០លើក (ថយចុះ ៥៣លើក) និងបង្ក្រាបបទល្មើសធនធានធម្មជាតិចំនួន ១៤៧ករណី (ថយចុះ ៥ករណី)ធៀប នឹងខែមិថុនា ឆ្នាំ២០២៦ រួមមាន ៖ បទល្មើសព្រៃឈើចំនួន ៥៣ករណី បទល្មើសសត្វព្រៃចំនួន ៣៤ករណី បទល្មើសដីធ្លីចំនួន ៣៨ករណី បទល្មើសនេសាទចំនួន ១៨ករណី និងបទល្មើសធនធានរ៉ែចំនួន ៤ករណី។
ក្នុងពេលជាមួយគ្នានេះ ក្រុមការងារបានចាត់វិធានការច្បាប់ និងបានអនុវត្តរៀបចំកំណត់ហេតុបទល្មើសចំនួន ៦៥ករណី បានកសាងសំណុំរឿងបញ្ជូនទៅតុលា ការចំនួន៦ករណី និងបានបញ្ជូនជនសង្ស័យចំនួន៦នាក់ ទៅតុលាការចាត់ការតាមនីតិវិធីច្បាប់៕
ចែករំលែកព័តមាននេះ