បុរសម្នាក់ចូលផឹកស៊ីក្នុងហាងខារ៉ាអូខេ «ផ្លាទីនឹមKTV» ស្រវឹ.ងបា.ញ់ផ្អើល
- សៀមរាប
ខេត្តសៀមរាប ៖ កងកម្លាំងនគរបាលខេត្ត បានឃាត់ខ្លួនជនម្នាក់ដែលប្រើប្រាស់អាវុធខុសច្បាប់នៅក្នុងហាងខារ៉ាអូខេនៃមណ្ឌលកម្សាន្ត«ផ្លាទីនឹម KTV» ស្ថិតក្នុងភូមិសាលាកន្សែង សង្កាត់ស្វាយដង្គំ ដោយការបាញ់គំរាមបង្កឲ្យការភ្ញាក់ផ្អើលពេញក្រុងសៀមរាប ។
ប្រភពព័ត៌មាននគរបាលខេត្តថា ដោយមានការសម្របសម្រួលនីតិវិធីពីឯកឧត្តម សៀង សុខ ព្រះរាជអាជ្ញានៃអយ្យការអមសាលាដំបូងខេត្ត កម្លាំងនគរបាលផែនការងារព្រហ្មទណ្ឌខេត្ត សហការជាមួយកម្លាំងអន្តរាគមន៍ និងតម្រួតបទបញ្ជា ដោយសហការជាមួយសន្តិសុខ និងអ្នកគ្រប់គ្រងមណ្ឌលកម្សាន្ត ផ្លាទីនឹម KTV បានឃាត់ខ្លួនជនម្នាក់ដែលបានគំរាមបាញ់សម្លាប់អ្នកបម្រើស្រីក្នុងបន្ទប់ខារ៉ាអូខេ កាលពីវេលាម៉ោងប្រមាណ២រំលងអធ្រាត្រឈានចូលថ្ងៃទី១៨ ខែសីហា ឆ្នាំ២០២៦ ។
ជាមួយនឹងការឃាត់ខ្លួននេះ សមត្ថកិច្ចក៏បានដកហូត កាំភ្លើងខ្លី១ដើមម៉ាកប្រាហា លេខZ៥១៦៦២០ បង់កាំភ្លើង១ គ្រាប់៤២គ្រាប់(ក្នុងបង់៣គ្រាប់) អត្តសញ្ញាណប័ណ្ណសញ្ជាតិខ្មែរ១សន្លឹក នាឡិកាដៃ១គ្រឿង ទូរស័ព្ទដៃ២គ្រឿង ប្រាក់ ១៥ ៤០០រៀល ថ្នាំគ្រាប់ពណ៌ខៀវ២គ្រាប់ បារី១កញ្ចប់ ដែកកេះ១ ទឹកអប់១ដប និងប៊ិក១ដើម ហើយបាននាំយកមកសាកសួរនៅស្នងការដ្ឋាននគរបាលខេត្ត ។
មុនពេលកើតហេតុ នៅល្ងាចថ្ងៃទី១៧ ខែសីហា ឆ្នាំ២០២៦ ខ្មាន់កាំភ្លើងរូបនេះ បានចូលទៅបន្ទប់ឈ្មោះ«ស្វាយលើ» នៃមណ្ឌលកម្សាន្ត ផ្លាទីនឹម KTV ដោយកុម្មង់ស្រាបៀរផឹក និងបានហៅស្រីអ្នកបម្រើការ៥នាក់មកផឹកកំដរជាមួយ ។ រហូតដល់វេលារំលងអធ្រាត្រ ដោយសារស្រវឹងជោកជាំ ជននេះបានដកកាំភ្លើងខ្លីភ្ជង់ស្រីអ្នកបម្រើការឱ្យដកទូរស័ព្ទដៃ និងវិទ្យុទាក់ទងបោះចោលទៅលើឥដ្ឋការ៉ូឱ្យអស់ពីខ្លួន ហើយអង្គុយចុះដោយគំរាមថា «បើមាននរណាម្នាក់ផ្តល់ព័ត៌មានទៅខាងក្រៅ ឬមានអ្នកផ្សេងមកបើកទ្វារបន្ទប់នោះ ខ្លួននឹងបាញ់សម្លាប់ចោលតែម្តង» ។
លុះដល់វេលាម៉ោងប្រមាណ១រំលងអធ្រាត្រឈានចូលថ្ងៃទី១៨ ខែសីហា ឆ្នាំ២០២៦ ជននេះបានយកកាំខ្លីបាញ់ឡើងលើ៣គ្រាប់ តែមិនបណ្តាលឱ្យមានអ្នករងរបួសឡើយ នៅក្នុងបន្ទប់នោះ ។ បន្ទាប់មក ក៏អង្គុយលើសាឡុងដៃស្តាំកាន់កាំភ្លើង ដៃឆ្វេងទាញយកគ្រាប់ពីក្នុងហោប៉ៅ ក្នុងគោលបំណងបញ្ចូលគ្រាប់បន្ថែម ដោយគំរាមអ្នកអង្គុយកំដរថា «ពួកឯងមានគ្នា៥នាក់ អញបាញ់អស់៣គ្រាប់ ត្រូវការបញ្ចូលគ្រាប់ទៀត» ។
នៅពេលខ្មាន់កាំភ្លើងកំពុងប្រើដៃទាំងពីរ យកគ្រាប់កាំភ្លើងមកបញ្ចូលក្នុងបង់ ដោយទុកកាំភ្លើងលើតុ ស្ត្រីម្នាក់ក្នុងចំណោម៥នាក់នោះ បានស្ទុះទៅប្រវាយប្រតប់ ហើយនាំគ្នារត់ចេញពីបន្ទប់អស់ ។ បានមួយសន្ទុះ កម្លាំងនគរបាលក៏ឆ្មក់ចូលដល់ រួចឃាត់ខ្លួនជនជាខ្មាន់កាំភ្លើងនេះភ្លាមតែម្តង ។
នៅចំពោះមុខសមត្ថកិច្ច ខ្មាន់កាំភ្លើងរូបនេះ ឆ្លើយថា ខ្លួនឈ្មោះ ព្រំ ពិសិដ្ឋ អាយុ៤៦ឆ្នាំ មុខរបរទិញ-លក់រថយន្តនៅភ្នំពេញ មានស្រុកកំណើតនៅសង្កាត់ស្វាយរៀង ក្រុងស្វាយរៀង ខេត្តស្វាយរៀង ទីលំនៅបច្ចុប្បន្នផ្ទះលេខ៤៦A ផ្លូវលេខ២៧៨ ភូមិ៣ សង្កាត់បឹងកេងកងទី២ ខណ្ឌចំការមន រាជធានីភ្នំពេញ ធ្លាប់ជាប់ពន្ធនាគារនៅខេត្តកណ្តាលរយៈពេល៣ឆ្នាំ និង៦ខែ ពាក់ព័ន្ធនឹងករណីក្លែងឯកសារសាធារណៈ ប្រព្រឹត្តនៅរាជធានីភ្នំពេញ កាលពីឆ្នាំ២០១០ ។
ជននេះឆ្លើយទៀតថា រូបខ្លួនពិតជាបានប្រព្រឹត្តសកម្មភាពដូចការរៀបរាប់ខាងលើមែនមូលហេតុមកពីស្រវឹងខ្លាំង គ្រប់គ្រងខ្លួនឯងមិនបាន ។ ចំណែកកាំភ្លើងរបស់ខ្លួន ពុំបានចុះបញ្ជី និងពុំមានប័ណ្ណសម្គាល់ឡើយ រីឯគ្រាប់កាំភ្លើងវិញ គឺខ្លួនបានទិញនៅហាងមួយកន្លែង ខាងលិចផ្សារថ្មី រាជធានីភ្នំពេញ កាលពីអំឡុងឆ្នាំ២០២៣កន្លងទៅ ។
ជនសង្ស័យជាខ្មាន់កាំភ្លើង និងវត្ថុតាង ត្រូវបាននគរបាលផែនការងារព្រហ្មទណ្ឌកម្រិតធ្ងន់ខេត្ត កសាងសំណុំរឿងបញ្ជូនទៅសាលាដមបូង ដើម្បីផ្តន្ទាទោសតាមផ្លូវច្បាប់ ។
ជាដំបូន្មាន ខ្លួនឯងគ្មានតួនាទីសូម្បីតែបន្តិច ក្នុងការប្រើប្រាស់កាំភ្លើង តែបែរជាលួចប្រើដោយខុសច្បាប់ ។ ការមានទោសលើកនេះ គឺដោយសារការប្រើកាំភ្លើងខុសច្បាប់នេះឯង បើកុំមានកាំភ្លើងជាប់ខ្លួនប្រហែលមិនស្គាល់គុកទេ ៕
ចែករំលែកព័តមាននេះ