នគរបាលរាជធានីថា ដំណោះស្រាយគ្រោះថ្នាក់ចរាចរណ៍មិនអាចប្រើហិ.ង្សាបានទេ
- ភ្នំពេញ
ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានប្រកាសជាចំហថា ដំណោះស្រាយគ្រោះថ្នាក់ចរាចរណ៍មិនអាចយកហិង្សាទៅប្រើប្រាស់បានទេ ។ គឺត្រូវប្រើច្បាប់ ។
លោកបានបញ្ជាក់នៅលើបណ្តាញសង្គម នៅថ្ងៃទី២០ ខែសីហា ឆ្នាំ២០២៦ថា «ខ្ញុំសូមជម្រាបជូនមហាជន មេត្តាគោរពជូនជ្រាបថា ករណីដែលបានបង្ហោះក្នុងបណ្ដាញសង្គមនោះថា មានករណីគ្រោះថ្នាក់ចរាចរណ៍កើតឡើង និងមានហិង្សានោះ ខ្ញុំបានចាត់ទៅ លោក ហេង រតនា ស្នងការរងទទួលផែនចរាចរណ៍ស្រាវជ្រាវភ្លាមៗ» ។
លោកឧត្តមសេនីយបានបញ្ជាក់បន្តទៀតថា ករណីហិង្សាដោយសារតែគ្រោះថ្នាក់ចរាចរណ៍ជាករណីបទល្មើសព្រហ្មទណ្ឌ ។ជាមួយគ្នានោះ លោកឧត្តមសេនីយ ក៏បានអញ្ជើញជនរងគ្រោះដែលរងនូវអំពើហិង្សាពេលមានគ្រោះថ្នាក់ចរាចណ៍មកដាក់ពាក្យបណ្ដឹងនៅសមត្ថកិច្ចជំនាញនៃស្នងការដ្ឋាននគរបាលរាជធានី ។
លោកបានបន្តទៀតថា អ្នកក្លាហានដែលយកអំពើហិង្សាដោះស្រាយបញ្ហាគ្រោះថ្នាក់ចរាចរណ៍ សមត្ថកិច្ចជំនាញចរាចរណ៍ឃាត់បានហើយនឹងប្រគល់ទៅផែនព្រហ្មទណ្ឌបន្តនីតិវិធី។
លោកបានសង្កត់ធ្ងន់ថា «ខ្ញុំបាននិយាយហើយ គ្រួសារមានវិន័យ ប្រទេសមានច្បាប់ មិនត្រូវប្រើអារម្មណ៍យកមកដោះស្រាយនោះទេ។ ដើម្បីរក្សាសុន្តិសុខសណ្ដាប់ធ្នាប់ត្រូវចូលរួមគោរពច្បាប់ទាំងអស់គ្នា»។
ចែករំលែកព័តមាននេះ