សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី កាលពីថ្ងៃទី១៩ សីហា បានដកតំណែងអ្នកទទួលខុសត្រូវជាន់ខ្ពស់ម្នាក់នៃវិមានប្រធានាធិបតី លោកស្រីអ៉ីរីណាមូដ្រា បន្ទាប់ពីការប្រកាសរបស់បណ្ដាស្ថាប័នប្រឆាំងអំពើពុករលួយរបស់ប្រទេសពីប្រតិបត្តិការមួយសំដៅលើបណ្ដាសមាជិកខុន្ទកាល័យប្រធានាធិបតី និងសមាជិកសភាអ៊ុយក្រែនមួយរូបមក ។
ប្រតិបត្តិការនោះ កើតមានបន្ទាប់ពីការរិះគន់ដ៏ខ្លាំង របស់អតីតរដ្ឋមន្ត្រីការពារប្រទេស លោកមីខាអ៉ីលឡូហ្វេដូរ៉ូវ ដែលត្រូវដកតំណែងកាលពីខែកក្កដា ។ អតីតរដ្ឋមន្ត្រីរូបនោះ បានបរិហារពីអំពើពុករលួយនៅអ៊ុយក្រែន ហើយអំពាវនាវឲ្យមានការបោះឆ្នោតប្រធានាធិបតី ។ តាមផ្នែកប្រឆាំងអំពើពុករលួយអ៊ុយក្រែនថា បណ្ដាជនសង្ស័យបានលាងលុយកខ្វក់១៥០លានHRYVNIAS (ប្រមាណជា២,៨លានអឺរ៉ូ) ក្នុងគោលបំណងយកទៅបង់ប្រាក់ធានា ដល់ជនជាប់ចោទម្នាក់ក្នុងរឿងពុករលួយចម្បងមួយផ្សេងទៀត ដែលនាំឲ្យកក្រើកអ៊ុយក្រែនកាលពីឆ្នាំទៅមិញ ។
រឿងនោះទាក់ទិននឹងការពង្វាងយកមូលនិធិដ៏ធំក្នុងផ្នែកថាមពល ដែលនាំទៅដល់ការលាលែងចេញពីតំណែង របស់រដ្ឋមន្ត្រីយុត្តិធម៌និងរដ្ឋមន្ត្រីថាមពល និងការចាកចេញពីខុន្ទកាល័យប្រធានាធិបតី ដៃស្ដាំរបស់លោកហ្សេឡេនស្គីលោកអានឌ្រីអ៉ីល័រម៉ាក់ ដែលចាត់ទុកថា ជាមនុស្សដ៏មានឥទ្ធិពលម្នាក់ក្នុងចំណោមមនុស្សមានឥទ្ធិពលរបស់អ៊ុយក្រែន។
ដោយឡែកអ៊ុយក្រែន និងរុស្ស៊ី កាលពីថ្ងៃទី១៩ សីហា បានដោះដូរឈ្លើយសឹកគ្នាម្ខាងៗ ១០៣នាក់។ នេះជាការប្រកាសរបស់ប្រទេសទាំង២ ក្នុងក្របខណ្ឌកិច្ចសហការតែមួយគត់នោះ។ ក្នុងចំណោមឈ្លើយសឹកដែលត្រូវដោះដូរគ្នានោះ មានបណ្ដាទាហានអ៊ុយក្រែនដែលជាអ្នកការពារទីក្រុងម៉ារីអ៊ូប៉ូល ជាក្រុងកំពង់ផែអ៊ុយក្រែនដែលរុស្ស៊ី វាយដណ្ដើមយកបានក្រោយការឡោមព័ទ្ធវាយប្រហារអស់ពេលដ៏យូរមក ។
តាមប្រធានាធិបតីអ៊ុយក្រែនថា ទាហានលោកប្រមាណ៧០០០នាក់ទៀតកំពុងឃុំទុកនៅរុស្ស៊ី ។ ចំណែកជនស៊ីវិលអ៊ុយក្រែនជាង១៥.០០០នាក់ ក៏កំពុងស្ថិតក្នុងបណ្ដាពន្ធគាររុស្ស៊ីដែរ ។ រីឯមនុស្សយ៉ាងតិច៦នាក់ស្លាប់ និង៣៣នាក់រងរបួស កាលពីយប់ថ្ងៃទី១៩ មក២០ សីហា នៅក្រុងគៀវ ហើយមនុស្សម្នាក់ទៀតស្លាប់ក្នុងតំបន់ជាយក្រុងនេះដោយសារការវាយប្រហាររបស់
រុស្ស៊ី ៕
ចែករំលែកព័តមាននេះ