រាជធានីភ្នំពេញ ៖ បន្ទាប់ពីត្រូវបានព្រះករុណាព្រះបាទសម្តេចនរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា តែងតាំងជាប្រេសិតពិសេសរបស់សម្តេចបវរធិបតីហ៊ុន ម៉ាណែត នាយករដ្ឋមន្ត្រីកម្ពុជា កញ្ញា កឹម មនោវិទ្យា បានចាប់ផ្តើមធ្វើការងារផ្នែកការទូតដោយបានជួយពិភាក្សាការងារជាមួយឯកអគ្គរដ្ឋទូតសហភាពអ៊ឺរ៉ុបប្រចាំកម្ពុជា ជជែកពីស្ថានការណ៍ព្រំដែនកម្ពុជា-ថៃ ។
យោងតាមគេហទំព័រហ្វេសប៊ុករបស់ សហភាពអឺរ៉ុប បានឱ្យដឹងថា នៅថ្ងៃទី២០ ខែសីហា ឆ្នាំ២០២៦ ឯកអគ្គរដ្ឋទូតសហភាពអឺរ៉ុប (EU) លោក Igor Driesmans បានជួបពិភាក្សាការងារជាមួយកញ្ញា កឹម មនោវិទ្យា ប្រេសិតពិសេសរបស់សម្តេចធិបតីនាយករដ្ឋមន្ត្រី ខណៈភាគីទាំងពីរបានផ្លាស់ប្តូរទស្សនៈលើការវិវត្តន៍ថ្មីៗទាក់ទងនឹងស្ថានការណ៍ព្រំដែនកម្ពុជា-ថៃ ។
នាឱកាសនោះ ភាគីទាំងពីរ បានផ្លាស់ប្តូរទស្សនៈលើការវិវត្តន៍ថ្មីៗទាក់ទងនឹងស្ថានការណ៍ព្រំដែនកម្ពុជា-ថៃ ព្រមទាំងកិច្ចការវិនិយោគផងដែរ ។
សូមរំលឹកថា កញ្ញាកឹម មនោវិទ្យា ជាកូនស្រីរបស់លោក កឹម សុខា ត្រូវបានតែងតាំងជាប្រេសិតពិសេសរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី មានឋានៈស្មើរដ្ឋមន្ត្រី កាលពីថ្ងៃទី១៧ ខែសីហា ឆ្នាំ២០២៦ ។ ក្នុងពិធីសំណេះសំណាលជាមួយអាចារ្យ អាចារិនី ទូទាំងប្រទេសលើកទី១១ ថ្ងៃទី១៩ សីហា សម្តេចធិបតី ហ៊ុន ម៉ាណែត បានមានប្រសាសន៍ថា ការតែងតាំងលោកស្រី កឹម មនោវិទ្យា ជាប្រេសិតពិសេស គឺដើម្បីជួយរាជរដ្ឋាភិបាល លើបញ្ហាព្រំដែន និងការងារវិនិយោគ ៕
ចែករំលែកព័តមាននេះ