អាជ្ញាធរអ៊ុយក្រែននិយាយថា រលកនៃការវាយប្រហារដោយមីស៊ីលរបស់រុស្ស៊ីពេញមួយយប់ បានសម្លាប់មនុស្សយ៉ាងហោចណាស់ប្រាំនាក់ នៅក្នុងរដ្ឋធានីគៀវ និងតំបន់ជុំវិញ។ នេះបើយោងតាមការចុះផ្សាយរបស់ BBC News ។
យោងតាមសេវាសង្គ្រោះបន្ទាន់ រដ្ឋអ៊ុយក្រែន (DSNS) អគារផ្ទះល្វែង និងឃ្លាំងត្រូវបានវាយប្រហារនៅក្នុង «ការវាយប្រហារដ៏ធំ» កាលពីថ្ងៃព្រហស្បតិ៍ ។ យ៉ាងហោចណាស់មានមនុស្ស 23នាក់បានរងរបួសនៅក្នុងការវាយប្រហារនេះ ។ អាជ្ញាធរកំពុងប្រញាប់ប្រញាល់ជួយសង្គ្រោះអ្នកដែលជាប់នៅក្រោមគំនរបាក់បែកនៃអគារដែលត្រូវបានបំផ្លាញ ខណៈដែលក្រុមការងារបានទាញយកអ្នករស់រានមានជីវិតម្នាក់ចេញពីគំនរបាក់បែករួចហើយ ។
ទន្ទឹមនឹងនេះ កងទ័ពប៉ូឡូញបានប្រកាសថា ខ្លួននឹងចាប់ផ្តើម «ប្រតិបត្តិការអាកាសចរណ៍យោធាបង្ការ» ចំពេលមានការវាយប្រហាររបស់រុស្ស៊ីលើអ៊ុយក្រែន។ លោក Vitali Klitschko អភិបាលក្រុង Kyiv បាននិយាយថា មន្ទីរពេទ្យកុមារមួយកន្លែង ត្រូវបានខូចខាតនៅក្នុងការវាយប្រហារពេលយប់ ជាកន្លែងបង្អួចត្រូវបានបំបែក និងរថយន្តត្រូវបានដុតបំផ្លាញនៅក្បែរនោះ ។
អភិបាលក្រុងរូបនេះបាននិយាយថា មជ្ឈមណ្ឌលឧស្សាហកម្មមួយនៅក្នុងស្រុក Solomyanskyi ភាគនិរតីនៃទីក្រុងគៀវ ក៏ត្រូវបានវាយប្រហារដោយមីស៊ីលផងដែរ ។
លោក Tymur Tkachenko អភិបាលតំបន់ Kyiv បាននិយាយថា ការវាយប្រហារមួយនៅក្នុងស្រុក Brovary នៃតំបន់ Kyiv បានសម្លាប់បុរសម្នាក់ និងរបួសម្នាក់ទៀត ។ រដ្ឋបាលតំបន់បានចេញសេចក្តីជូនដំណឹងមួយនៅយប់មុននេះ ដោយព្រមានប្រជាជនឱ្យជ្រកកោន ។ វាបានបន្តថា «ប្រតិបត្តិការការពារដែនអាកាសអាចធ្វើទៅបាននៅក្នុងតំបន់នោះ» ។
ចែករំលែកព័តមាននេះ