សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំ កាលពីថ្ងៃទី១៩ សីហា បានគំរាមពីការចាត់វិធានការសេដ្ឋកិច្ចខ្លាំងក្លាបំផុត ចំពោះគ្រប់ប្រទេសដែលជួយអ៉ីរ៉ង់ ក្នុងការខិតខំធ្វើសង្គ្រាមនិងបង្កើនការគាបសង្កត់លើអ៉ីរ៉ង បន្ទាប់ពីច្រើនខែនៃជម្លោះដែលមិនអាចឲ្យអ៉ីរ៉ង់ព្រមចុះញ៉ម ។
តាមបណ្ដាញសង្គម TRUTH SOCIAL លោកត្រាំសរសេរថា ខ្ញុំប្រកាសថា គ្រប់ប្រទេសទាំងអស់ ដែលអនុញ្ញាតដល់បណ្ដា
ស្ថាប័នហិរញ្ញវត្ថុរបស់ខ្លួន បណ្ដាសហគ្រាសបណ្ដាព្រលានយន្តហោះ ឬបណ្ដាស្ថាប័នរដ្ឋាភិបាលខ្លួន ផ្ដល់ជំនួយសង្គ្រោះអ៉ីរ៉ង់ក្នុងរូបភាពណាមួយ នោះខ្លួនឯងនឹងប្រឈមមុខការរឹតដ្បិតខាងសេដ្ខកិច្ចដ៏សែនទារុណ ។
ក្នុងសារដ៏វែងមួយលោកត្រាំប្រកាស ពីប្រតិបត្តិការសេដ្ឋកិច្ច ដែលម៉ឺងម៉ាត់បំផុតពុំធ្លាប់មាន និងទាមទារឲ្យបញ្ឈប់ការរត់ពន្ធប្រេងជាថ្នូរនឹងរូបិយប័ណ្ណ និងការផ្ទេរប្រាក់ ។ លោកមិនបានលើកឈ្មោះប្រទេសណាមួយជាពិសេសឡើយ ហើយក៏មិនផ្ដល់ភាពលម្អិតលើបណ្ដាវិធានការ ឬបណ្ដាទណ្ឌកម្មដែរ ។
កាលពីសប្ដាហ៍កន្លងទៅ រដ្ឋមន្ត្រីរតនាគារអាមេរិក លោក SCOTT BRESSENT ធ្លាប់បានគំរាមអ៉ីរ៉ង់ ពីការធ្វើឲ្យប្រទេសនេះ ស្ថិតនៅឯកោទាំងស្រុងខាងសេដ្ឋកិច្ច ដែលពិភពលោកមិនដែលឃើញ ។ រវាងការបាត់បង់ប្រជាប្រិយភាពនៃជម្លោះលើឆាកនយោបាយអាមេរិក ហើយបណ្ដាគ្រាប់រំសេវក្នុងស្តុកកាន់តែខើច ព្រោះប្រើច្រើនខ្លាំងពេក ក្នុងការវាយប្រហារអ៉ីរ៉ង់ ប្រធានាធិបតីអាមេរិកហាក់ដូចជានាពេលថ្មីៗនេះងាកទៅរកវិធីសាស្ត្រដែលកាន់តែទាក់ទាញជាងផែនការយោធា។
បន្ទាប់ពីការវាយប្រហាររបស់អាមេរិក និងអ៉ីស្រាអែល ប្រឆាំងអ៉ីរ៉ង់ពីថ្ងៃទី២៨ កុម្ភៈ មក ក្រុងតេហេរ៉ង់បានតបតវិញ តាមរយៈការវាយប្រហារលើបណ្ដាប្រទេសជិតខាង ជាសម្ព័ន្ធមិត្ត់អាមេរិក និងបិទខ្ទប់ច្រកសមុទ្រហ័រមូស ។ ទន្ទឹមនេះ អាមេរិកក៏ហ៊ុមព័ទ្ធបណ្ដាកំពង់ផែអ៉ីរ៉ង់ផងដែរ ។ ទោះបីជាមានការចុះថយនៃការវាយប្រហារគ្នា តែភាពតានតឹងក្នុងតំបន់នៅតែខ្លាំង ដល់ខែទី៦នៃជម្លោះ ។
អេមីរ៉ាត់អារ៉ាប់រួម កាលពីថ្ងៃទី១៨ សីហា បានចោទប្រកាន់អ៉ីរ៉ង់ថា បាញ់មីស៊ីលបាលីស្ទិក២គ្រាប់ទៅកាន់សមុទ្រ ដែលសំដៅលើការធ្វើនាវាចរណ៍ តែក្រុងតេហេរ៉ង់បាបដិសេធ ។ ក្រសួងការបរទេសអេមីរ៉ាត់អារ៉ាប់ រួមប្រកាសពីការផ្អាកធ្វើពាណិជ្ជកម្ម
រហូតដល់មានបទបញ្ជាជាថ្មី រាល់ការដោះដូរពាណិជ្ជកម្មជាមួយអ៉ីរ៉ង់ និងការទូទាត់ហិរញ្ញវត្ថុជាមួយអ៉ីរ៉ង់៕
ចែករំលែកព័តមាននេះ