ព្រឹកស្អែក ព្រះមហាក្សត្រនឹងស្តេចយាងព្រះរាជពិធីសម្ពោធ«វិមានសាមគ្គីភាពនៃព្រឹទ្ធ សភា»
- ភ្នំពេញ
រាជធានីភ្នំពេញ ៖ ព្រឹទ្ធសភានៃព្រះរាជាណាចក្រកម្ពុជានឹងប្រារព្ធព្រះរាជពិធីសម្ពោធ«វិមានសាមគ្គីភាព» នៃព្រឹទ្ធសភា ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត នាព្រឹកថ្ងៃសុក្រ ទី២១ ខែសីហា ឆ្នាំ២០២៦ វេលាម៉ោង៩:០០នាទី នៅវិមានព្រឹទ្ធសភា ។ នេះបើប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា ។
ដើម្បីឱ្យការប្រារព្ធពិធីសម្ពោធអគារព្រឹទ្ធសភាថ្មីនេះ ប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀសការកកស្ទះចរាចរណ៍ នៅថ្ងៃទី២១ សីហា អាជ្ញាធរ នឹងបញ្ចៀសចរាចរណ៍ចំពោះយានយន្ត គ្រប់ប្រភេទ លើកំណាត់មហាវិថីព្រះនរោត្តម (ចាប់ពីស្តុបជលផល ដល់ស្ពានអាកាស ក្បាលថ្នល់ និងបរិវេណជុំវិញទីតាំងប្រារព្ធពិធី) ចាប់ពីវេលាម៉ោង៥ព្រឹក រហូតដល់បញ្ចប់កម្មវិធី ។ នេះបើតាមរដ្ឋបាលរាជធានីភ្នំពេញ ដែលបានបន្តដោយសុំឱ្យប្រជាពលរដ្ឋទាំងអស់យោគយល់ និងបញ្ចៀសការធ្វើដំណើរឆ្លងកាត់កំណាត់ផ្លូវខាងលើ ។
សូមជម្រាបថា អគារព្រឹទ្ធសភាថ្មីនេះ មានកម្ពស់៤ជាន់ និងទំហំ៧៩ម៉ែត្រ គុណនឹង ៤៧ម៉ែត្រ ត្រូវបានបើកការដ្ឋានសាងសង់ កាលពីថ្ងៃទី៩ សីហា ឆ្នាំ២០២៤ ។ ការដ្ឋានសាងសង់អគារនេះ ត្រូវបានបិទបញ្ចប់កាលពីដើមឆ្នាំ២០២៦ ។ ព្រឹទ្ធសភាបញ្ជាក់ថា ការកសាងអគារព្រឹទ្ធសភាថ្មីនេះ គឺប្រើប្រាស់ថវិការបស់បណ្ដាសប្បុរសជន ប៉ុន្តែពុំបញ្ជាក់ពីទំហំទឹកប្រាក់ដែលត្រូវបានចំណាយឡើយ ៕
ចែករំលែកព័តមាននេះ