នាវាកងទ័ពជើងទឹកអង់គ្លេស១គ្រឿងចូលចតមូលដ្ឋានសមុទ្ររាមប្រកបដោយសុវត្ថិភាព ដើម្បីពង្រឹងចំណងសាមគ្គីភាព មិត្តភាព និងកិច្ចសហប្រតិបត្តិការរវាងកងទ័ពជើងទឹកនៃប្រទេសទាំងពីរ
- ព្រះសីហនុ
ខេត្តព្រះសីហនុ ៖ ព្រឹកថ្ងៃទី២០ ខែសីហា ឆ្នាំ២០២៦ លោកឧត្តមនាវីត្រី អ៊ិន សុខេមរា មេបញ្ជាការរងមូលដ្ឋានសមុទ្ររាម ព្រមទាំងនាយនាវីជាច្រើនរូប បានអញ្ជើញទទួលស្វាគមន៍នាវាកងទ័ពជើងទឹកអង់គ្លេសចំនួន០១គ្រឿង ដែលមានឈ្មោះ HMS TAMAR លេខP233 ជាប្រភេទនាវាល្បាត ដឹកនាំដោយលោកវរនាវីទោ TOM Lindsey មេបញ្ជាការនាវាប្រចាំតំបន់ឥណ្ឌូ-ប៉ាស៊ីហ្វិក បានដឹកនាំនាវាចូលសំចតនៅកំពង់ផែមូលដ្ឋានសមុទ្ររាម រយៈពេល០៨ថ្ងៃ គឺចាប់ពីថ្ងៃទី២០ ដល់ថ្ងៃទី២៧ ខែសីហា ឆ្នាំ២០២៦ ក្នុងដំណើរអញ្ជើញមកបំពេញទស្សនកិច្ច ដើម្បីពង្រឹងចំណងមិត្តភាព និងកិច្ចសហប្រតិបត្តិការល្អរវាងកងទ័ពជើងទឹកនៃប្រទេសទាំងពីរកម្ពុជា-អង់គ្លេស.។
លក្ខណៈបច្ចេកទេសនាវា HMS TAMAR លេខP233 មានបណ្ដោយ៩០ម៉ែត្រនិងទទឹង ១៣ម៉ែត្រ ជម្រៅទឹក៤.៣ម៉ែត្រទម្ងន់ផ្ទុក ២ ០០០តោនកម្ពស់ ៣៣ម៉ែត្រ មាននាវិកសរុបចំនួន៦១នាក់ ដឹកនាំដោយលោកមេបញ្ជាការនាវា លោកវរនាវីទោ TOM Lindsey។
លោកឧត្តមនាវីត្រី អ៊ិន សុខេមរា មេបញ្ជាការរងមូលដ្ឋានសមុទ្ររាម បានទទួលស្វាគមន៍មេបញ្ជាការនាវា និងនាវិកនៃនាវាកងទ័ពជើងទឹកចក្រភពអង់គ្លេស ដែលបានដឹកនាំនាវាចូលចតធ្វើទស្សនៈកិច្ចនៅព្រះរាជាណាចក្រកម្ពុជា និងសូមជូនពរឪ្យនាវិកនៃនាវាកងទ័ពជើងទឹកអង់គ្លេសធ្វើដំណើកម្សាន្តនៅខេត្តព្រះសីហនុទទួលបានសុវត្ថិភាពគ្រប់គ្នា។
ក្នុងការស្នាក់នៅប្រទេសកម្ពុជា គណៈប្រតិភូកងទ័ពជើងទឹកអង់គ្លេស មានកម្មវិធីចូលជួបសម្តែងការគួរសមជាមួយលោកមេបញ្ជាការមូលដ្ឋានសមុទ្ររាម ចូលជួបសម្ដែងការគួរសមជាមួយលោក អភិបាលខេត្តព្រះសីហនុនិងថ្នាក់ដឹកនាំក្រសួងការពារជាតិមួយ ព្រមទាំងមានកម្មវិធីហ្វឹកហ្វឺនរួមគ្នាកម្មវិធីសង្គ្រោះបឋមនិងលេងកីឡាមិត្តភាពរវាងកងទ័ពជើងទឹកនៃប្រទេសទាំងពីរផងដែរ ៕
ចែករំលែកព័តមាននេះ