ក្រសួងសាធារណការ និងដឹកជញ្ជូន ចុះធ្វើយុទ្ធនាការអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោក នៅស្រុកស្វាយអន្ទរ ខេត្តព្រៃវែង
- ព្រៃវែង
ខេត្តព្រៃវែង ៖ យុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក ការពាក់មួកសុវត្ថិភាព និងការបង្កើនសុវត្ថិភាព តាមរយៈការបើកភ្លើងស្វ័យប្រវត្តិពេលថ្ងៃ (AHO) ត្រូវបានក្រសួងសាធារណការ និងដឹកជញ្ជូន សហការជាមួយក្រុមហ៊ុនម៉ូតូហុងដា រៀបចំធ្វើឡើងនៅព្រឹកថ្ងៃទី១៩ សីហា ក្នុងស្រុកស្វាយអន្ទរ ខេត្តព្រៃវែង។
យុទ្ធនាការផ្សព្វផ្សាយសុវត្ថិភាពចរាចរណ៍ផ្លូវគោកនេះ ធ្វើឡើងក្នុងគោលបំណង ដើម្បីកាត់បន្ថយអត្រាគ្រោះថ្នាក់ចរាចរណ៍ ពង្រឹងការយល់ដឹងអំពីច្បាប់ចរាចរណ៍ផ្លូវគោកនៅកម្ពុជា ដាស់តឿនស្មារតីដល់អ្នកបើកបរម៉ូតូទាំងអស់ ឱ្យយកចិត្តទុកដាក់លើកត្តាសុវត្ថិភាពសំខាន់ៗ ដូចជា ការពាក់មួកសុវត្ថិភាពឱ្យបានត្រឹមត្រូវ បើកបរដោយការទទួលខុសត្រូវនិងគោរពច្បាប់ ជាពិសេសត្រូវយល់ដឹងពីប្រព័ន្ធបើកភ្លើងចង្កៀងមុខដោយស្វ័យប្រវត្តិ ឬហៅថាការបើកភ្លើងពេលថ្ងៃ (AHO – Automatic Headlight On)។
ប្រព័ន្ធ AHO នេះ ត្រូវបានគេដឹងថា អាចជួយបង្កើនលទ្ធភាពមើលឃើញរវាងអ្នកបើកបរ និងអ្នកប្រើប្រាស់ផ្លូវដទៃទៀត ដែលអាចកាត់បន្ថយគ្រោះថ្នាក់យ៉ាងមានប្រសិទ្ធភាព ជាពិសេសក្នុងស្ថានភាពអាកាសធាតុប្រែប្រួល ដូចជាមានភ្លៀងធ្លាក់ ចុះអ័ព្ទ ឬមេឃងងឹត។
លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានមានប្រសាសន៍ថា យុទ្ធនាការផ្សព្វផ្សាយសុវត្ថិភាពចរាចរណ៍ផ្លូវគោកនេះ ពិតជាមានសារៈសំខាន់ណាស់ ដោយជួយឲ្យប្រជាពលរដ្ឋមានការយល់ដឹងកាន់តែច្រើន អំពីច្បាប់ចរាចរណ៍ ដែលរួម ចំណែកជួយកាត់បន្ថយអត្រាគ្រោះថ្នាក់ចរាចរណ៍ ឲ្យនៅកម្រិតកាន់តែទាប។
លោកជំទាវបានបន្តថា យុទ្ធនាការនេះ មិនត្រឹមតែផ្តល់ចំណេះដឹងផ្នែកច្បាប់ប៉ុណ្ណោះទេ ប៉ុន្តែថែមទាំងបានបង្កើតបរិយាកាសរីករាយតាមរយៈកម្មវិធីសំណួរចម្លើយកម្សាន្ត ដើម្បីទទួលបានរង្វាន់មួកសុវត្ថិភាព និងសម្ភារៈផ្សេងៗ ដែលធ្វើឱ្យការអប់រំកាន់តែជ្រាបចូលទៅក្នុងចិត្តរបស់ប្រជាពលរដ្ឋផងដែរ ៕
ចែករំលែកព័តមាននេះ