ខេត្តបាត់ដំបង ៖ នៅថ្ងៃទី១៩ ខែសីហា ឆ្នាំ២០២៦ មន្ត្រីអធិការកិច្ចម្ហូបអាហារ នៃសាខាកិច្ចការពារអ្នកប្រើប្រាស់ និងការប្រកួតប្រជែងខេត្តបាត់ដំបង បានសហការជាមួយមន្ទីរពាណិជ្ជកម្មខេត្តបាត់ដំបង ដោយនាំយករថយន្តមន្ទីរពិសោធន៍ចល័តផ្នែកម្ហូបអាហារ ធ្វើការចុះត្រួតពិនិត្យទំនិញ គ្រឿងឧបភោគ បរិភោគ ទំនិញវេចខ្ចប់ស្រេច ដែលដាក់តាំងលក់នៅផ្សារបឹងឈូក ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង បានចំនួន១៦តូប ព្រមទាំងបានចែកជូននូវផ្ទាំងរូបភាពផ្សព្វផ្សាយបានចំនួន ១៨សន្លឹក ស្តីពីការស្វែងយល់អំពីការជ្រើសរើសម្ហូបអាហារ ដែលមានសុវត្ថិភាពជូនដល់អាជីវករលក់ដូរផងដែរ ។
មន្ត្រីជំនាញបានយកសំណាកគំរូ ពពុះសណ្តែក បាញ់ឌុក បាញ់ចានឿក និងលតស្វិត ចំនួន៧សំណាកគំរូ មកវិភាគរកសារធាតុគីមីហាមឃាត់។ ជាលទ្ធផលរកឃើញម្ហូបអាហារមានសារធាតុគីមីហាមឃាត់បូរ៉ាក់ Borax រួមមាន ៖
-ពពុះសណ្តែក ចំនួន ២២ គីឡូក្រាម
-បាញ់ឌុក ចំនួន ០១ គីឡូក្រាម
-បាញ់ចានឿក ចំនួន ០២ គីឡូក្រាម
-លតស្វិត ចំនួន ០៣ គីឡូក្រាម ។
សរុបចំនួន ២៨ គីឡូក្រាម ។
មន្ត្រីជំនាញ បានធ្វើការដកហូតទំនិញទាំងនោះយក មករក្សាទុកនៅសាខា ក.ប.ប. ខេត្តបាត់ដំបង ដើម្បីកម្ទេចចោលតាមនីតិវិធី ៕
ចែករំលែកព័តមាននេះ