ទីក្រុងកៀវ៖ អង្គភាពប្រឆាំងអំពើពុករលួយនៅប្រទេសអ៊ុយក្រែនប្រកាសថាខ្លួនត្រៀមស៊ើបអង្កេតមន្ត្រីជាន់ខ្ពស់នៅក្នុងខុទ្ទកាល័យរបស់លោកហ្សេឡិនស្គី។ ការថ្លែងដូច្នេះធ្វើឡើងមួយថ្ងៃបន្ទាប់ពីអតីតរដ្ឋមន្ត្រីការពារជាតិអ៊ុយក្រែនដែលត្រូវលោកហ្សេឡិនដកតំណែងកាលពីពេលថ្មីៗនេះបានអំពាវនាវឱ្យមានការបោះឆ្នោតថ្នាក់ជាតិឆាប់ៗនេះទោះបីសង្គ្រាមបន្តកើតមានយ៉ាងណាក្ដី។ ស្ថានការណ៍ប្រែប្រួលនយោបាយនៅអ៊ុយក្រែនជាសញ្ញាមិនល្អទេសម្រាប់លោកហ្សេឡិនស្គី។ ក្រុមអ្នកស៊ើបអង្កេតបន្តប្រតិបត្តិការបើកកកាយរកក្រុមទុច្ចរិតដែលគេសង្ស័យថាដឹកនាំដោយអតីតអ្នកតំណាងរាស្ត្រ និងអ្នកតំណាងរាស្ត្រដែលកំពុងមានតំណែង។ បញ្ហានេះក៏សង្ស័យជាប់ពាក់ព័ន្ធនឹងមន្ត្រីជាន់ខ្ពស់នៅក្នុងខុទ្ទកាល័យប្រធានាធិបតី និងបុគ្គលជាច្រើនរូបទៀតផងដែរ។ នេះបើយោងតាមសេចក្ដីប្រកាសរបស់អង្គភាពប្រឆាំងអំពើពុករលួយ និងការិយាល័យរដ្ឋអាជ្ញាប្រឆាំងអំពើពុករលួយ។
ស្ថាប័នទាំង២នេះបញ្ជាក់ថាខ្លួននឹងបញ្ចេញរបាយការណ៍លម្អិតពាក់ព័ន្ធនឹងលទ្ធផលនៃការស្រាវជ្រាវ។ ការបញ្ចេញអាថ៌កំបាំងនេះជារឿងថ្មីមួយទៀតដែលរឹតតែដាក់ទម្ងន់ទៅលើអាជីពនយោបាយរបស់លោកហ្សេឡិនស្គីស្របពេលដែលលោកកំពុងជាប់គាំងនៅក្នុងដំណើរការស៊ើបអង្កេតដាច់ដោយឡែកមួយទៀតទៅលើអំពើពុករលួយនៅក្នុងចំណោមមន្ត្រីជាន់ខ្ពស់។ សូមរំលឹកថាកាលពីឆ្នាំ២០២៥ នាយអគ្គសេនាធិការកងទ័ពអ៊ុយក្រែន លោកអានឌ្រី យេម៉ាក (Andriy Yermak) បានសម្រេចចិត្តលាលែងពីតំណែង ហើយក្រោយមកត្រូវបានដាក់ចូលទៅក្នុងបញ្ជីជនសង្ស័យប្រព្រឹត្តអំពើពុករលួយពាក់ព័ន្ធនឹងការកេងកិបលុយកាក់នៅក្នុងគម្រោងសាងសង់អគារប្រណីត។ នោះជាស្រមោលខ្មៅតាមលងបន្លាចលោកហ្សេឡិនស្គី។
នៅឆ្នាំដដែលនោះ អ៊ុយក្រែនក៏ផ្ទុះរឿងអាស្រូវពាក់ព័ន្ធនឹងអំពើឆបោកនៅក្នុងក្រុមហ៊ុននុយក្លេអ៊ែររបស់រដ្ឋ ហើយនាំទៅដល់ការចុះចេញពីតំណែងនៃរដ្ឋមន្ត្រីយុត្តិធម៌ និងរដ្ឋមន្ត្រីថាមពល។ បញ្ហាពុករលួយធ្វើឱ្យសហភាពអឺរ៉ុបរារែកចិត្តក្នុងការទទួលយកអ៊ុយក្រែនជាសមាជិករបស់ខ្លួន។ លោកហ្សេឡិនស្គីបានទទួលរងសម្ពាធជាបណ្ដើរៗតាំងពីមុននេះទៅទៀត។ ពោលគឺលោកទទួលរងសម្ពាធកាលពីខែកក្កដា នៅពេលលោកដកតំណែងអតីតរដ្ឋមន្ត្រីការពារជាតិ លោកមីខៃឡូ ហ្វេដូរ៉ូស (Mykhailo Fedorov) ដែលជាសហជីវិនរួមរស់ជាមួយគ្នាយូរអង្វែង និងជាសម្ព័ន្ធមិត្តដ៏ជិតស្និទ្ធរបស់លោក។ បំណងប្រាថ្នារបស់លោកហ្សេឡិនស្គីគឺការផ្សះផ្សាគ្នាឡើងវិញរវាងអតីតរដ្ឋមន្ត្រីរូបនេះ និងអគ្គបញ្ជាការកងទ័ពអ៊ុយក្រែនដែលឈ្លោះគ្នាជាចំហ។ ប៉ុន្តែនៅទីបញ្ចប់ លោកសម្រេចចិត្តដកតំណែងអ្នកទាំង២។
ចំណាត់ការនេះនាំឱ្យមានចលនាតវ៉ានៅតាមដងវិថីនានាពីសំណាក់ក្រុមអ្នកគាំទ្រលោកហ្វេដូរ៉ូស។ សម្រាប់លោកហ្សេឡិនស្គី ត្រឹមតែរយៈពេលមួយឆ្នាំ លោកពើបប្រទះនឹងបញ្ហាដើរធាក់ថយរហូតដល់ទៅ២ករណី។ ពោលគឺបញ្ហានេះកើតឡើងបន្ទាប់ពីលោកលូកដៃចូលក្នុងអំណាចរបស់អង្គភាពប្រឆាំងអំពើពុករលួយកាលពីពាក់កណ្ដាលឆ្នាំ២០២៥។ លោកហ្វេដូរ៉ូសបានបង្ហោះវីឌីអូនៅលើយូធូបកាលពីយប់មិញដោយអំពាវនាវឱ្យរៀបចំការបោះឆ្នោតប្រធានាធិបតីសាជាថ្មី។ ការអំពាវនាវនេះប៉ះពាល់ដោយផ្ទាល់ចំពោះលោកហ្សេឡិនស្គីដែលបន្តកាន់អំណាចទាំងមិនបោះឆ្នោតក្រោមហេតុផលថាប្រទេសជាតិកំពុងកើតមានសង្គ្រាម។ លោកហ្វេដូរ៉ូសថ្លែងថាយើងត្រូវតែស្វែងរកយន្តការដែលស្របច្បាប់ ប្រកបដោយសុវត្ថិភាព និងមានភាពប្រាកដនិយមដើម្បីអនុញ្ញាតឱ្យអ៊ុយក្រែនស្ដារលទ្ធិប្រជាធិបតេយ្យឱ្យបានពេញលេញឡើងវិញ។
យោងតាមអតីតរដ្ឋមន្ត្រីការពារជាតិរូបនេះ អ៊ុយក្រែនកំពុងប្រឈមនឹងវិបត្តិប្រទាក់ក្រឡាគ្នាពាក់ព័ន្ធនឹងប្រព័ន្ធដឹកនាំរដ្ឋ។ លោកលើកទឡ្ហីករណ៍ថារបបដឹកនាំសព្វថ្ងៃខិតខំការពារខ្លួន និងទប់ស្កាត់មិនឱ្យមានការផ្លាស់ប្ដូរ។ លោកក៏ប្រកាសថ្កោលទោសអំពើពុករលួយនៅក្នុងចំណោមមន្ត្រីរដ្ឋាភិបាលអ៊ុយក្រែនដោយមិនបញ្ចេញឈ្មោះបុគ្គលរូបណាទេ។ លោកថាអំពើពុករលួយធ្វើឱ្យអ៊ុយក្រែនចុះខ្សោយថាមពលក្នុងការធ្វើសង្គ្រាម។ ខុទ្ទកាល័យរបស់លោកហ្សេឡិនស្គីសូមមិនធ្វើអត្ថាធិប្បាយទៅលើការចោទប្រកាន់ទាំងនេះទេ។ ប៉ុន្តែសំណើរបស់លោកហ្វេដូរ៉ូសក៏សមហេតុផលម៉្យាងដែរ។ កាលពីពេលកន្លងមក លោកពូទីនប្រកែកមិនព្រមចូលតុចរចាជាមួយអ៊ុយក្រែនទេក្រោមហេតុផលថាលោកហ្សេឡិនស្គីមិនមែនជាមេដឹកនាំស្របច្បាប់ និងមិនមែនជាអ្នកមានសិទ្ធិសម្រេចនៅក្នុងកិច្ចព្រមព្រៀងណាមួយឡើយព្រោះលោកបានផុតអាណត្តិតាំងពីឆ្នាំ២០២៤៕ ប្រភព៖ AP
ចែករំលែកព័តមាននេះ