អ្នកបើកបរដែលល្មើសច្បាប់កុំភ្លេច សមត្ថកិច្ចនឹងត្រួតពិនិត្យ ហើយពង្រឹងការអនុវត្តច្បាប់ចរាចរណ៍ផ្លូវគោកឡើងវិញនៅថ្ងៃទី១ ខែកញ្ញាខាងមុខ ជាពិសេសនៅក្នុងភូមិសាស្ត្រនៃខេត្តរាជធានី ដែលមានអត្រាគ្រោះថ្នាក់ចរាចរណ៍ខ្ពស់ទាំង៥ ។
បើតាមអ្នកនាំពាក្យរងក្រសួងមហាផ្ទៃបានបង្ហើប ការត្រួតពិនិត្យឡើងវិញនូវការអនុវត្តច្បាប់ចរាចរណ៍នឹងអនុវត្តនៅក្នុងភូមិសាស្ត្រខេត្ត៥ ដែលមានអត្រាគ្រោះថ្នាក់ចរាចរណ៍ច្រើនជាងគេ គឺរាជធានីភ្នំពេញ ខេត្តព្រះសីហនុ កណ្ដាល កំពង់ស្ពឺ និងខេត្តស្វាយរៀង ។ គម្រោងនេះកើតមាន ក្រោយពេលដែលមានការស្នើរសុំពីឧបនាយករដ្ឋមន្ត្រីនិងរដ្ឋមន្ត្រីក្រសួងមហាផ្ទៃ ហើយ សម្តេចធិបតី ហ៊ុន ម៉ាណែត ក៏បានផ្តល់ភ្លើងខៀវហើយដែរ ។
នៅពេលដែលការអនុវត្តច្បាប់ចរាចរណ៍ត្រូវបានអនុញ្ញាតឲ្យអនុវត្តឡើងវិញនៅខេត្តរាជធានីទាំង៥នេះ គឺផ្តោតសំខាន់ទៅលើអំពើល្មើសដែលបង្កឱ្យមានគ្រោះថ្នាក់ រួមមាន ការបើកបរលើសល្បឿនកំណត់ ការបើកបរក្នុងស្ថានភាពស្រវឹង ការមិនគោរពសញ្ញាសិទ្ធិអាទិភាព និងភ្លើងស្តុប ព្រមទាំងការដឹកជញ្ជូនទំនិញសំពីងសំពោង។
ការត្រួតពិនិត្យ និងរឹតបន្តឹងការអនុវត្តច្បាប់ចរាចរណ៍ផ្លូវគោក បានផ្អាកចាប់តាំងពីផ្ទុះអរិភាពព្រំដែនជាមួយនឹងថៃ កាលពីខែកក្កដា ឆ្នាំ២០២៥មក ។ កន្លងមកក្រសួងមហាផ្ទៃក៏បានប៉ុនប៉ងបើកការត្រួតពិនិត្យឡើងវិញជាបន្តបន្ទាប់ ប៉ុន្តែចេះតែពន្យាពេល ដោយសារតែបញ្ហារសេមរសាមផ្សេងៗ ដោយរួមទាំងការរិះគន់ពីមហាជន ក៏បានផ្អាក ឬលើកពេលជាបន្តបន្ទាប់ ។
ការត្រួតពិនិត្យចរាចរណ៍មិនគួរលើកពេលទៀតឡើយ ហើយក៏មិនគួរអនុវត្តតែនៅ៥ខេត្តរាជធានីនេះដែរ គឺគួរតែធ្វើឲ្យបានពេញផ្ទៃប្រទេស ពីព្រោះបទល្មើសចរាចរណ៍ដែលកំណត់គោលដៅនិងសកម្មភាពខាងលើ ឃើញមានបាតុភាពនេះសឹងតែគ្រប់កន្លែង ហើយគ្រោះថ្នាក់ចរាចរណ៍ក៏ឃើញមានកើតមានឡើងគ្រប់តែកន្លែងផងដែរ ។
ក្នុងឆមាសទី១ ឆ្នាំ២០២៦នេះ សមត្ថកិច្ចក្រសួងមហាផ្ទៃ បានឲ្យដឹងថា គ្រោះថ្នាក់ចរាចរណ៍កើតឡើងសរុប ១.២៧៩លើក បណ្ដាលឱ្យមនុស្សស្លា.ប់ ៧៧៣នាក់ និងរបួសធ្ងន់ ស្រាលសរុប ១.៩៤៤នាក់។ មូលហេតុដែលបង្កឱ្យមានគ្រោះថ្នាក់រួមមាន បើកបរលើសល្បឿនកំណត់មាន៤៦ភាគរយ មិនគោរពសិទ្ធិអាទិភាពមាន២២ភាគរយ មិនប្រកាន់ស្ដាំមាន១២ភាគរយ ប្រជែងគ្រោះថ្នាក់មាន៧ភាគរយ បត់មិនប្រយ័ត្នមាន៦ភាគរយ បើកបរក្នុងស្ថានភាពស្រវឹងមាន៤ភាគរយ មិនគោរពសញ្ញាចរាចរណ៍មាន២ភាគរយ និងកត្តាយានយន្ត១ភាគរយ។
ផ្អែកតាមស្ថានភាពបែបនេះ ការត្រួតពិនិត្យ និងរឹតបន្តឹងការអនុវត្តច្បាប់ចរាចរណ៍គួរតែអនុវត្តពេញផ្ទៃប្រទេស ហើយមហាជនក៏នឹងមិនប្រតិកម្មឡើយ ប្រសិនបើសមត្ថកិច្ចអនុវត្តទៅតាមច្បាប់ដោយត្រឹមត្រូវ មាននីតិវិធីច្បាស់លាស់ ហើយមិនអនុវត្តលើស ។ អ្វីដែលរឹតតែថ្នាំងថ្នាក់ ហើយមហាជនកន្លងមកតែងតែរិះគន់ខ្លាំងបំផុតនោះ គឺប្រើប្រាស់ច្បាប់ដើម្បីច្នៃចេញជាឱកាសបង្កើតវិធីសាស្ត្ររកចំណូលបម្រើផលប្រយោជន៍ផ្ទាល់ខ្លួន និង បក្សពួក ។
បញ្ហានេះហើយដែលមហាជនមានកង្វល់ ហើយបន្តឃ្លាំមើលជាបន្តបន្ទាប់ចំពោះការអនុវត្តច្បាប់របស់មន្ត្រីសមត្ថកិច្ច ។ នៅក្នុងករណីដែលសមត្ថកិច្ចអនុវត្តតួនាទីនិងភារកិច្ចដោយយកស្មារតីច្បាប់ជាគោលការណ៍និងយកផលប្រយោជន៍និងសុវត្ថិភាពប្រជាពលរដ្ឋជាសំអាង នោះពលរដ្ឋនឹងយល់ ហើយគោរពនិងអនុវត្តតាមតួនាទីនិងភារកិច្ចនោះយ៉ាងខ្ជាប់ខ្ជួន ។
សរុបមក ការរឹតបន្តឹង និងអនុវត្តច្បាប់ចរាចរណ៍ផ្លូវគោកឡើងវិញ គឺជាការចាំបាច់ និងមិនគួរត្រូវបានពន្យារពេលបន្តទៀតឡើយ ព្រោះសុវត្ថិភាពនៅលើដងផ្លូវពាក់ព័ន្ធដោយផ្ទាល់ទៅនឹងជីវិត និងទ្រព្យសម្បត្តិរបស់ប្រជាពលរដ្ឋ ។ ទន្ទឹមជាមួយគ្នានេះ ការអនុវត្តច្បាប់គួរធ្វើឡើងដោយឈរលើគោលការណ៍ច្បាប់ តម្លាភាព យុត្តិធម៌ និងមិនរើសអើង ដោយផ្តោតជាចម្បងលើការកាត់បន្ថយបទល្មើសដែលជាមូលហេតុនៃគ្រោះថ្នាក់ ដូចជា ការបើកបរលើសល្បឿន ការបើកបរក្នុងស្ថានភាពស្រវឹង ការមិនគោរពសិទ្ធិអាទិភាព និងសញ្ញាចរាចរណ៍។
ប្រសិនបើសមត្ថកិច្ចអនុវត្តតួនាទីដោយគោរពនីតិវិធី និងមិនយកការអនុវត្តច្បាប់ទៅធ្វើជាមធ្យោបាយរកផលប្រយោជន៍ផ្ទាល់ខ្លួន នោះការគាំទ្រ និងការគោរពច្បាប់ពីសំណាក់ប្រជាពលរដ្ឋក៏នឹងកាន់តែមានភាពរឹងមាំ។
អាស្រ័យហេតុនេះ ការរឹតបន្តឹងច្បាប់ចរាចរណ៍មិនគួរមានគោលដៅត្រឹមតែការផាកពិន័យ ឬចាប់អ្នកល្មើសនោះទេ ប៉ុន្តែគួរមានគោលដៅធំជាងនេះ គឺការកែប្រែឥរិយាបថអ្នកប្រើប្រាស់ផ្លូវ កាត់បន្ថយគ្រោះថ្នាក់ និងការពារជីវិតប្រជាពលរដ្ឋ។ ការអនុវត្តច្បាប់ដោយត្រឹមត្រូវពីសំណាក់សមត្ថកិច្ច គួបផ្សំនឹងការគោរពច្បាប់ពីប្រជាពលរដ្ឋ នឹងក្លាយជាមូលដ្ឋានសំខាន់ក្នុងការកសាងវប្បធម៌គោរពច្បាប់ និងធ្វើឱ្យផ្លូវថ្នល់របស់កម្ពុជាកាន់តែមានសុវត្ថិភាពសម្រាប់មនុស្សគ្រប់រូប ៕
ចែករំលែកព័តមាននេះ