ទីក្រុងវ៉ាស៊ីនតោន៖ លោកដូណាល់ត្រាំមានប្រសាសន៍កាលពីយប់មិញថាអ៊ីរ៉ង់នឹងមិនទទួលយកលក្ខខណ្ឌនៃកិច្ចព្រមព្រៀងដើម្បីបញ្ចប់សង្គ្រាមទេ។ លោកថាអ៊ីរ៉ង់គួរតែទម្លាក់អាវុធចុះចាញ់ឱ្យហើយទៅខណៈដែលការចរចាគ្នាហាក់ដូចជានៅទ្រឹងមួយកន្លែង។ ពួកគេនឹងមិនព្រមទទួលយកកិច្ចព្រមព្រៀងដែលលោកយល់ថាមានសារសំខាន់នោះទេ។ មើលចុះ, យើងស្ថិតនៅទីនោះ (អ៊ីរ៉ង់) ដើម្បីហេតុផលតែម៉្យាងគឺមិនអនុញ្ញាតឱ្យអ៊ីរ៉ង់មានអាវុធនុយក្លេអ៊ែរជាដាច់ខាត។ នៅពេលអ្នកសារព័ត៌មានសួរថាតើអាមេរិកនឹងបន្តសុពលភាពកិច្ចព្រមព្រៀងនៃបទឈប់បាញ់ជាបណ្ដោះអាសន្ន ឬយ៉ាងណា? លោកត្រាំឆ្លើយតបថាលោកនឹងមិនធ្វើបែបនេះទេ។
សូមរំលឹកថាកិច្ចព្រមព្រៀងបណ្ដោះអាសន្ននោះធ្វើឡើងកាលពីខែមិថុនា។ កិច្ចព្រមព្រៀងនេះអំពាវនាវឱ្យគ្រប់ភាគីផ្អាកសកម្មភាពយោធាជាបន្ទាន់ និងជាអចិន្ត្រៃយ៍នៅគ្រប់សមរភូមិទាំងអស់។ ប៉ុន្តែមិនបានប៉ុន្មានផង កិច្ចព្រមព្រៀងក៏បរាជ័យទៅវិញ។ លោកត្រាំប្រកាសកាលពីថ្ងៃទី៧ ខែកក្កដាថាកិច្ចព្រមព្រៀងនេះបានឈានដល់ទីបញ្ចប់ហើយ ហើយក្រសួងការបរទេសអ៊ីរ៉ង់ប្រកាសថាខ្លួនសូមផ្អាកអនុវត្តតាមកិច្ចព្រមព្រៀងនេះ។ មូលហេតុសំខាន់ដោយសារអ៊ីរ៉ង់វាយប្រហារកប៉ាល់ដឹកទំនិញនៅច្រកសមុទ្រហ័រម៉ូសដោយចោទប្រកាន់ថាកប៉ាល់ទាំងនោះមិនព្រមអនុវត្តតាមការចង្អុលបង្ហាញរបស់អ៊ីរ៉ង់។ ដោយសារខឹងសម្បារនឹងទង្វើនេះ លោកត្រាំបញ្ជាឱ្យវាយប្រហារអ៊ីរ៉ង់ជាថ្មី។ យោងតាមអនុស្សារណៈយោគយល់គ្នានោះ អ៊ីរ៉ង់ និងអាមេរិកប្ដេជ្ញាថានឹងបន្តការចរចាគ្នារហូតដល់មានកិច្ចព្រមព្រៀងជាស្ថាពរ។ ក្នុងនោះក៏រួមបញ្ចូលទាំងការចរចាពាក់ព័ន្ធនឹងកម្មវិធីនុយក្លេអ៊ែររបស់អ៊ីរ៉ង់ផងដែរ។
អនុស្សារណៈនេះមានរយៈពេលអតិបរមា៦០ថ្ងៃ ហើយអាចនឹងបន្តសុពលភាពអាស្រ័យទៅលើការព្រមព្រៀងរបស់ភាគីទាំង២។ ប៉ុន្មានម៉ោងមុននេះ លោកត្រាំថ្លែងប្រាប់ទូរទស្សន៍ហ្វក់ (Fox) ថាអ៊ីរ៉ង់គួរលើកទង់សសូមចុះចាញ់ឱ្យហើយទៅ។ ប្រទេសអូម៉ង់ និងអ៊ីរ៉ង់កំពុងចរចាគ្នាដើម្បីសម្រេចឱ្យបានកិច្ចព្រមព្រៀងអនុញ្ញាតឱ្យកប៉ាល់ដឹកទំនិញឆ្លងកាត់ច្រកហ័រម៉ូសឡើងវិញ។ ហេតុនេះ លោកត្រាំសូមព្រមានទុកជាមុនថាប្រសិនបើអូម៉ង់ហ៊ានព្រមព្រៀងស្ងាត់ៗតែ២នាក់ជាមួយអ៊ីរ៉ង់ យើងនឹងទម្លាក់គ្រាប់បែកទៅលើពួកគេឱ្យណាណីម្ដង។ ចំពោះសំណួរថាតើលោកបាត់បង់ការអត់ធ្មត់ចំពោះប្រទេសអូម៉ង់ ឬយ៉ាងណា? លោកត្រាំឆ្លើយតបថាអត់ទេ! លោកគ្រាន់តែគិតថាពួកគេធ្វើមិនបានល្អ។ យើងនឹងចាត់ការពួកគេយ៉ាងសមស្របបំផុត។
ជម្លោះដណ្ដើមគ្នាកាន់កាប់ច្រកសមុទ្រហ័រម៉ូសធ្វើឱ្យតម្លៃប្រេងឥន្ទនៈហក់ឡើងខ្ពស់ និងធ្វើឱ្យលោកត្រាំទទួលរងសម្ពាធ។ មជ្ឈដ្ឋានខ្លះបង្ខំឱ្យលោកបិទបញ្ចប់សង្គ្រាមឱ្យបានឆាប់ព្រោះសង្គ្រាមនេះលែងមានប្រជាប្រិយភាពតទៅទៀតហើយនៅប្រទេសអាមេរិក។ ម៉្យាងទៀត ការបោះឆ្នោតសភានៅអាមេរិកក៏កាន់តែខិតចូលមកដល់។ ទោះជាយ៉ាងណាក្ដី លោកត្រាំអះអាងថាការបោះឆ្នោតនោះគ្មានជះឥទ្ធិពលទៅលើការសម្រេចចិត្តជាយុទ្ធសាស្ត្ររបស់រដ្ឋាភិបាលលោកទេ។ លោកថាការបោះឆ្នោតពាក់កណ្ដាលអាណត្តិនេះមិនពាក់ព័ន្ធនឹងការសម្រេចចិត្តរបស់លោកឡើយ។ កាលពីមុននេះបន្តិច លោកបានបង្ហោះសារនៅលើបណ្ដាញសង្គមថាគោលដៅធំបំផុតរបស់យើងគឺ «អ៊ីរ៉ង់មិនអាចមានអាវុធនុយក្លេអ៊ែរជាដាច់ខាត»៕ ប្រភព៖ Reuters
ចែករំលែកព័តមាននេះ