ក្រោយការតែងតាំងលោកស្រី កឹម មនោវិទ្យា កូនស្រីលោក កឹម សុខា អតីតមេបក្សប្រឆាំងមួយរូបដែលធ្លាប់ជាប់ពន្ធនាគារ និងការឃុំឃាំងនៅក្នុងលំនៅស្ថាន ជាប្រេសិតពិសេសរបស់នាយករដ្ឋមន្ត្រី មានព័ត៌មានអេចអូចចេញច្រើន ។ ប៉ុន្តែដើម្បីជាតិ និងមាតុភូមិ នរណាក៏ដោយឲ្យតែអាចបម្រើជាតិ និងមាតុប្រទេសបាន យើងគួរតែស្វាគមន៍
ការតែងតាំងនេះ បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីលោកស្រី បានជួបជាមួយ សម្តេចធិបតី ហ៊ុន ម៉ាណែត កាលពីថ្ងៃទី១៤ ខែសីហា និងជួបសម្តេចតេជោ ហ៊ុន សែន ប្រធានព្រឹទ្ធសភា ៣ថ្ងៃក្រោយមក ។
នៅក្រោយជំនួបនៅថ្ងៃនោះ ប្រមុខរាជរដ្ឋាភិបាល បានសរសេរនៅលើទំព័រហ្វេសប៊ុកផ្ទាល់ខ្លួនថា«ក្នុងនាមជាអ្នកនយោបាយជំនាន់ថ្មីដូចគ្នា គឺមានកិច្ចការមួយចំនួន ដែលយើងអាចរួមសហការគ្នាធ្វើ ដើម្បីឧត្តមប្រយោជន៍របស់ប្រទេសជាតិយើង ជាពិសេសនៅលើឆាកអន្តរជាតិ» ។
ដោយឡែកសម្តេចតេជោ វិញក៏បង្ហោះផងដែរថា នៅថ្ងៃទី១៧ ខែសីហា សម្តេចបានទទួល លោក កឹម សុខា ភរិយា រួមទាំងលោកស្រី កឹម មនោវិទ្យា ។ សម្ដេចតេជោ ហ៊ុន សែន បានបញ្ជាក់ថា លោក កឹម សុខា បានទៅសួរសុខទុក្ខសម្ដេច មុនពេលលោក កឹម សុខា ទៅសួរសុខទុក្ខពលរដ្ឋភៀសសឹក ។
សម្តេចតេជោ បានចែករំលែកថា ថ្ងៃនោះលោក រួមជាមួយលោកស្រី និងកូនស្រី បានមកសួរសុខទុក្ខសម្តេច ម្តងទៀតហើយ បានជជែកគ្នារហូត៣ម៉ោង ដោយនិយាយច្រើនជាមួយលោកស្រី កឹម មនោវិទ្យា។ សម្តេចតេជោ បានបន្តថា លោកស្រី កឹម មនោវិទ្យា ពិតជាធនធានមនុស្សដ៏ល្អសម្រាប់ជាតិ ។
ក្រោយការចែករំលែកដោយប្រមុខរដ្ឋាភិបាល និងប្រធានព្រឹទ្ធសភាមក លោកស្រី កឹម មនោវិទ្យា ក៏ទទួលបានតួនាទីជាប្រេសិតពិសេសរបស់នាយករដ្ឋមន្ត្រី ។
ការតែងតាំងនេះ ត្រូវបានអ្នកវិភាគខ្លះអះអាងថា នេះជាការបង្ហាញស្មារតីសាមគ្គីភាពជាតិខ្មែរ ដោយសារតែទោះបីជាអ្នកនយោបាយមាននិន្នាការផ្ទុយគ្នាយ៉ាងណា ក៏នៅតែអាចរួបរួមគ្នាបាន ដោយយកផលប្រយោជន៍ជាតិជាធំ ។ ខណៈដែលអ្នកខ្លះបង្ហាញថា នេះគឺជាការចុះចាញ់ខាងនយោបាយមួយ រីឯអ្នកផ្សេងទៀតក៏បានបញ្ចេញទស្សនៈផ្សេងៗតាមការយល់ឃើញរៀងៗខ្លួន។ ប៉ុន្តែទោះជាយ៉ាងណាក៏ដោយ នៅក្នុងនាមជាខ្មែរប្រសិនបើមានគុណតម្លៃនិងសមត្ថភាព ការសម្រេចចិត្តចូលមកអង្គុយធ្វើការជាមួយគ្នា ដើម្បីផលប្រយោជន៍របស់រាស្ត្រនិងប្រទេសមិនមែនជារឿងចុះចាញ់ឫបរាជ័យឡើយ ។
នៅក្នុងនាមជាអ្នកដែលសិក្សានៅបរទេស ហើយរស់នៅបរទេសមួយរយៈពេលកន្លងមកនេះ លោកស្រី ត្រូវបានរំពឹងថា នឹងអាចកាន់កាប់តួនាទីនេះប្រសើរបំផុត ពីព្រោះថា ប្រេសិតពិសេសនេះ មានតួនាទីជាអ្នកនាំសារ ចរចាសម្រុះសម្រួល ស្វែងរកចំណុចរួម និង រាយការណ៍ទៅនាយករដ្ឋមន្ត្រីដោយផ្ទាល់បាន ។ តួនាទីនេះ អាចជួយនាយករដ្ឋមន្ត្រីបានច្រើន រាប់តាំងពីបញ្ហាជម្លោះព្រំដែន ការពង្រឹងទំនាក់ទំនងអន្តរជាតិ ក៏ដូចជាកិច្ចការជាតិនានាបាន ទោះបីជាមិនមានសិទ្ធិអំណាចនៅក្នុងការសម្រេចចិត្តក៏ដោយចុះ ។
ផ្អែកតាមទឡ្ហីករណ៍ខាងលើ ការតែងតាំងលោកស្រី កឹម មនោវិទ្យា ជាប្រេសិតពិសេសរបស់នាយករដ្ឋមន្ត្រី គួរត្រូវបានមើលឃើញក្នុងទស្សនៈទូលំទូលាយជាងការប្រកួតប្រជែង ឬការចុះចាញ់ផ្នែកនយោបាយ ។ ប្រសិនបើ ការចូលរួមរបស់លោកស្រីអាចប្រើប្រាស់បទពិសោធន៍ ចំណេះដឹង និងទំនាក់ទំនងរបស់ខ្លួន ដើម្បីជួយដល់ការចរចា ការសម្រុះសម្រួល ការពង្រឹងទំនាក់ទំនងអន្តរជាតិ និងការការពារផលប្រយោជន៍ជាតិ នោះ ការទទួលយកតួនាទីនេះអាចចាត់ទុកជាការចូលរួមបម្រើជាតិ។
ក្រៅពីនោះ នៅក្នុងបរិបទដែលប្រទេសត្រូវការការរួបរួម និងការប្រើប្រាស់ធនធានមនុស្ស គ្រប់ភាគី ដែលមានប្រវត្តិ ឬទស្សនៈនយោបាយខុសគ្នា អាចចូលរួមធ្វើការជាមួយគ្នា ដោយដាក់ផលប្រយោជន៍ជាតិ និងប្រជារាស្ត្រជាអាទិភាព គឺជារឿងដែលគួរឱ្យលើកទឹកចិត្ត។ តម្លៃពិតនៃការតែងតាំងនេះ មិនគួរវាស់ត្រឹមតែតួនាទី ឬសារនយោបាយ នៅពេលតែងតាំងនោះទេ។ ប៉ុន្តែគួរវាស់តាម លទ្ធផលជាក់ស្តែងនៃការងារ សមត្ថភាពក្នុងការសម្រុះសម្រួល និងអត្ថប្រយោជន៍ដែលប្រទេសជាតិទទួលបាន។
សរុបទៅ ប្រសិនបើលោកស្រី កឹម មនោវិទ្យា អាចបំពេញតួនាទីជាស្ពានភ្ជាប់ទំនាក់ទំនង ជួយបញ្ជូនសារ ស្វែងរកចំណុចរួម និងរួមចំណែកដោះស្រាយបញ្ហាដែលប៉ះពាល់ដល់ផលប្រយោជន៍ជាតិបាន នោះការចូលមករួមការងារជាមួយគ្នា មិនគួរត្រូវបានចាត់ទុកថាជា «ការចុះចាញ់» ឬ«ការបរាជ័យ» របស់ភាគីណាមួយឡើយ ។
ផ្ទុយទៅវិញ វាអាចក្លាយជាឧទាហរណ៍មួយបង្ហាញថា ភាពខុសគ្នាផ្នែកទស្សនៈនយោបាយអាចរក្សាទុកនៅជ្រុងម្ខាងបាន នៅពេលផលប្រយោជន៍ជាតិ និងមាតុភូមិត្រូវបានដាក់នៅជាចំណុចរួម ហើយយកផលប្រយោជន៍ជាតិ និងប្រជារាស្ត្រជាគោល ៕
ចែករំលែកព័តមាននេះ