ទីក្រុងកៀវ៖ ថ្ងៃនេះ អ៊ុយក្រែនវាយប្រហារដោយដ្រូននៅក្នុងទ្រង់ទ្រាយធំបំផុតមួយទៅលើប្រទេសរុស្ស៊ី។ អ៊ុយក្រែនបញ្ជូនដ្រូនជិត៨០០គ្រឿងទៅវាយប្រហាររុស្ស៊ីនៅក្នុងរយៈពេលត្រឹមតែ២ថ្ងៃប៉ុណ្ណោះ។ ចំណែករុស្ស៊ីក៏បាញ់មីស៊ីលចូលភូមិមួយនៅតំបន់ខាគីវរបស់អ៊ុយក្រែន បណ្ដាលឱ្យស្លាប់មនុស្សយ៉ាងតិចដប់នាក់ និងរបួស៨នាក់។ ប្រទេសទាំង២កំពុងជាប់គាំងទៅមុខមិនរួច ថយក្រោយមិនរួចនៅក្នុងសង្គ្រាម។ ដូច្នេះ ពួកគេច្រើនវាយប្រហាររយៈចម្ងាយឆ្ងាយតាមផ្លូវអាកាស។ មួយឆ្នាំកន្លងទៅនេះ អ៊ុយក្រែនខិតខំផលិតដ្រូនក្នុងស្រុក និងបញ្ជូនទៅវាយប្រហារឆ្ងាយៗនៅក្នុងទឹកដីរុស្ស៊ី។ ការរីកចម្រើនបច្ចេកវិទ្យាផលិតដ្រូនធ្វើឱ្យរដ្ឋាភិបាលប្រទេសនានា រួមទាំងក្រុមហ៊ុនផលិតគ្រឿងបរិក្ខារយោធាចាប់អារម្មណ៍យ៉ាងខ្លាំង។
មន្ត្រីរដ្ឋាភិបាលអ៊ុយក្រែនចង់ធ្វើឱ្យរុស្ស៊ីមានអារម្មណ៍សោកស្ដាយចំពោះទង្វើរបស់ពួកគេដែលដុតបញ្ឆេះសង្គ្រាម និងចង់ដាក់សម្ពាធឱ្យលោកពូទីនយល់ព្រមចូលតុចរចាដើម្បីបញ្ចប់សង្គ្រាម។ ប៉ុន្តែរហូតមកដល់ពេលនេះ លោកពុំដែលបង្ហាញសញ្ញាចង់បិទបញ្ចប់សង្គ្រាមម្ដងណាឡើយលុះត្រាតែគេធ្វើតាមការទាមទាររបស់លោក។ រដ្ឋមន្ត្រីការបរទេសអ៊ុយក្រែន លោកអានឌ្រី ស៊ីប៊ីហា ថ្លែងថាលោកពូទីនបន្តអូសបន្លាយសង្គ្រាមឱ្យឆាបឆេះកាន់តែយូរ ជាជាងទទួលយកសំណើនៃបទឈប់បាញ់ និងបិទបញ្ចប់សង្គ្រាមដ៏បង្ហូរឈាម។ ក្រសួងការពារជាតិរុស្ស៊ីថ្លែងថាប្រព័ន្ធការពារដែនអាកាសរបស់ខ្លួនបានបាញ់ទម្លាក់ដ្រូនរបស់អ៊ុយក្រែន៧៩១គ្រឿងនៅលើទីតាំងមួយចំនួននៃប្រទេសរុស្ស៊ី, នៅលើឧបទ្វីបគ្រីមៀ, នៅសមុទ្រខ្មៅ និងសមុទ្រអាហ្សូស (Azov)។
នេះជាការវាយប្រហារទ្រង់ទ្រាយធំលំដាប់ទី២ដោយដ្រូនរបស់អ៊ុយក្រែនទៅលើរុស្ស៊ីចាប់តាំងពីខែមករា ឆ្នាំ២០២៥។ អភិបាលក្រុងម៉ូស្គូ លោកសឺហ្គេ សូប៊ីយ៉ានីន ថ្លែងថាអ៊ុយក្រែនបញ្ជូនដ្រូនជាង៦០០គ្រឿងហោះសំដៅទីក្រុងនេះ។ ក្នុងនោះ ដ្រូន១៨០គ្រឿងត្រូវបានបាញ់ទម្លាក់។ លោកនិយាយដោយខ្លីៗតែត្រឹមនេះដោយមិនបរិយាយលម្អិតពេកទេ។ រុស្ស៊ីអះអាងថាគ្មានអ្នកស្លាប់ ឬរបួសដោយសារការវាយប្រហារលើកនេះឡើយ។ នៅតំបន់ខ្សែក្រវាត់ទីក្រុងម៉ូស្គូ មនុស្សបីនាក់រងរបួស។ ការវាយប្រហារនោះបង្កជាភ្លើងឆេះដេប៉ូស្តុកទុកទំនិញមួយកន្លែងរបស់ក្រុមហ៊ុនវីលបឺរី (Wildberries) ដែលជាក្រុមហ៊ុនលក់ទំនិញអនឡាញធំជាងគេរបស់រុស្ស៊ី។ អ៊ុយក្រែនច្រើនដាក់គោលដៅវាយប្រហារឃ្លាំងទំនិញរបស់ក្រុមហ៊ុនរុស្ស៊ីព្រោះខ្លួនជឿជាក់ថាក្រុមហ៊ុនទាំងនោះជួយជ្រោមជ្រែងយោធារបស់រុស្ស៊ី។
ក្រុមហ៊ុនវីលបឺរីអះអាងថាខ្លួនរងគ្រោះត្រឹមតែបន្តិចបន្តួចប៉ុណ្ណោះ។ អ៊ុយក្រែនចោទប្រកាន់ថារុស្ស៊ីប្រើប្រាស់យុទ្ធសាស្ត្រវាយប្រហារដ៏ឃោរឃៅទៅលើជនស៊ីវិល។ មីស៊ីលរុស្ស៊ីមួយគ្រាប់វាយប្រហារភូមិឈ្មោះប៉ិចឆឹននីហ៊ី (Pechenihy) នៃតំបន់ខាគីវ បណ្ដាលឱ្យស្លាប់ជនស៊ីវិលដប់នាក់។ នេះបើយោងតាមលោកអូឡេ ស៊ីនីហ៊ូប៉ូវ (Oleh Syniehubov) ជាមេបញ្ជាការយោធាប្រចាំតំបន់ខាគីវ។ មនុស្ស១៧នាក់ទៀតរងរបួសដោយសារការវាយប្រហារនោះ។ លោកហ្សេឡិនស្គីចាត់ទុកថានេះជាការវាយប្រហារដ៏ឃោរឃៅទៅលើជនស៊ីវិល និងបំផ្លិចបំផ្លាញផ្ទះដប់ខ្នង, ហាងកាហ្វេមួយកន្លែង, ប៉ុស្តិ៍ប្រៃសណីយ៍, ហាងលក់ទំនិញ និងឡានយ៉ាងតិច៧គ្រឿង។ លោកហ្សេឡិនស្គីថាយើងត្រូវតែសងសឹកចំពោះការវាយប្រហាររបស់រុស្ស៊ី។ រុស្ស៊ីក៏វាយប្រហារតំបន់ស៊ូមីរបស់អ៊ុយក្រែនបណ្ដាលឱ្យស្លាប់មនុស្សបីនាក់ និងរបួសបីនាក់ផងដែរ៕ ប្រភព៖ AP
ចែករំលែកព័តមាននេះ