អាជ្ញាធរចុះរៀបចំសណ្តាប់ធ្នាប់ផ្សារអ្នកលឿង បើមិនធ្វើតាមទេលែងយោគយល់ហើយ
- ព្រៃវែង
ខេត្តព្រៃវែង ៖ នៅព្រឹកថ្ងៃទី 18 សីហា អាជ្ញាធរស្រុកពាមរក៍ បានដឹកនាំកម្លាំងជាច្រើននាក់ ចុះរៀបចំសណ្ដាប់ធ្នាប់ផ្សារអ្នកលឿង ដោយដេញក្រុមអាជីវករលក់បន្លែត្រីសាច់ នៅលើផ្លូវបេតុងស្ទឹងខៀវ ឲ្យចូលលក់ក្នុងផ្សារថ្មីទើបសង់រួច ដើម្បីបើកផ្លូវបេតុងឲ្យធំទូលាយ ងាយស្រួលធ្វើចរាចរណ៍ ពិសេសពេលមានអគ្គីភ័យកើតឡើងអាចឲ្យឡានទឹកបើកចូលរួច ។ ក្នុងពេលចុះដេញនេះ គេឃើញក្រុមអាជីវករលក់បន្លែត្រីសាច់ជាច្រើននាក់ បានស្ម័គ្រចិត្តរើអីវ៉ាន់ចូលទៅលក់ក្នុងផ្សារ តាមការណែនាំរបស់អាជ្ញាធរ ប៉ុន្តែក៏មានអាជីវករមួយចំនួនទៀតបានផ្ទុះប្រតិកម្ម និងធ្វើការតវ៉ា មិនព្រមទៅលក់ក្នុងផ្សារថ្មី ដែលអាជ្ញាធររៀបចំនោះទេ ។
ក្រុមអាជីវករដែលជំទាស់តវ៉ា ភាគច្រើនជាម្ចាស់ផ្ទះដែលនៅសងខាងផ្លូវបេតុង ដោយពួកគាត់អះអាងថា គាត់លក់ដូរមុខផ្ទះរបស់គាត់ មិនធ្វើឲ្យប៉ះពាល់ដល់ផ្លូវទេ ហើយបើឱ្យគាត់ទៅលក់ក្នុងផ្សារ ត្រូវបង់លុយឱ្យគេ គាត់មិនទៅទេ ។ ចំណែកអាជីវករមួយចំនួនទៀត ដែលលក់នៅលើផ្លូវបេតុង ហើយមិនទាន់រើចេញ បានឲ្យដឹងថា ពួកគាត់លក់លើផ្លូវបេតុងមុខផ្ទះគេ ត្រូវបង់លុយឲ្យគេ បើទៅលក់ក្នុងផ្សារក៏ត្រូវបង់លុយឲ្យថៅកែផ្សារ គឺលក់កន្លែងណាក៏បង់លុយដែរ ។ ប៉ុន្តែមូលហេតុដែលគាត់មិនទាន់ទៅលក់ក្នុងផ្សារ ព្រោះខ្លាចលក់មិនដាច់ដូចនៅកន្លែងចាស់ ដូច្នេះហើយទើបនៅរារែកចាំមើលគេឯងសិនទៅ ។ ដោយឡែកអាជ្ញាធរស្រុកពាមរក៍បានឲ្យដឹងថា មុនពេលចុះអនុវត្តវិធានការក្តៅនេះ អាជ្ញាធរស្រុកធ្លាប់បានប្រកាសផ្សព្វផ្សាយជូនដំណឹងដល់អាជីវករទាំងអស់ដែលលក់នៅលើផ្លូវបេតុងជុំវិញផ្សារអ្នកលឿង ឱ្យរើចូលទៅលក់ក្នុងផ្សារថ្មី ដែលនៅក្បែរគ្នានោះ ច្រើនខែមកហើយ ប៉ុន្តែក្រុមអាជីវករមិនព្រមទៅសោះ ទើបអាជ្ញាធរត្រូវចុះអនុវត្តទាំងបង្ខំនៅពេលនេះ ។
អាជ្ញាធរស្រុកពាមរក៍ បានបញ្ជាក់ថា ផ្សារថ្មីដែលរៀបចំឲ្យអាជីវករចូលទៅលក់ មានទីតាំងធំទូលាយល្អ មានប្រព័ន្ធទឹកភ្លើងគ្រប់គ្រាន់ និងមានដំបូលការពារថ្ងៃក្តៅ និងមេឃភ្លៀង បានយ៉ាងល្អទៀតផង ហើយសំខាន់ពេលចូលទៅលក់ក្នុងខែដំបូង ម្ចាស់ផ្សារគេ free ឲ្យមិនយកលុយទេ ។ ប៉ុន្តែក្រុមអាជីវករមួយចំនួនដែលនៅស្ទាក់ស្ទើររារែក គឺដោយសារមានអាជីវករជាម្ចាស់ផ្ទះ នៅចាក់ផ្លុំពីក្រោយ ព្រោះម្ចាស់ផ្ទះជួលដីមុខផ្ទះឲ្យគេលក់ បានចំណូលច្រើនដែរ បើគេរើចេញទៅលក់ក្នុងផ្សារអស់ ម្ចាស់ផ្ទះទាំងនោះក៏បាត់ចំណូលអស់ច្រើនដែរ ។ អាជ្ញាធរស្រុកពាមរក៍ បានបញ្ជាក់ថា នៅព្រឹកថ្ងៃ 18 សីហានេះ អាជ្ញាធរគ្រាន់តែចុះដេញអាជីវករធម្មតាប៉ុណ្ណោះ ប៉ុន្តែចាប់ពីថ្ងៃទី 19 សីហា ទៅអាជ្ញាធរនឹងអនុវត្តវិធានការក្តៅ លែងយោគយល់ បើអាជីវករណានៅរឹងទទឹង បន្តលក់លើផ្លូវបេតុងទៀត អាជ្ញាធរនិងចាប់រើបោះដាក់រទេះដឹកចេញតែម្ដង ៕
ចែករំលែកព័តមាននេះ