ទីក្រុងសេអ៊ូល៖ លោកដូណាល់ត្រាំបានចេញបញ្ជាឱ្យមន្ទីរបញ្ចកោណកាត់បន្ថយទំហំនៃសមយុទ្ធយោធារួមគ្នារវាងអាមេរិក និងកូរ៉េខាងត្បូងចាប់ពីពេលនេះតទៅដោយសារកត្តា២យ៉ាង ទី១-ថ្លៃចំណាយលើការធ្វើសមយុទ្ធយោធានេះអស់ច្រើនពេក និងទី២-កូរ៉េខាងត្បូងមិនព្រមចូលរួមជាមួយអាមេរិកនៅក្នុងការវាយប្រហារអ៊ីរ៉ង់។ ត្រឹមតែប៉ុន្មានម៉ោងមុនពេលចាប់ផ្ដើមសមយុទ្ធយោធា លោកត្រាំប្រកាសនៅលើបណ្ដាញសង្គមទ្រូសសូសល (Truth Social) ថាលោកមិនសប្បាយចិត្តទាល់តែសោះដែលអាមេរិកខំចូលរួមធ្វើសមយុទ្ធយោធានេះអស់លុយមួយគំនរ ហើយលោកខំកសាងទំនាក់ទំនងល្អជាមួយលោកគីមជុងអ៊ុនថែមទៀត។ សមយុទ្ធយោធានេះមិនត្រឹមតែអស់លុយច្រើនទេ ប៉ុន្តែជារូបភាពមិនល្អទាល់តែសោះព្រោះបង្កប់ដោយគំនិតយកគ្នាជាសត្រូវ។
សមយុទ្ធយោធាដែលមានឈ្មោះថាខែលសេរីភាពអ៊ុលឈី (Ulchi Freedom Shield) នឹងបន្តធ្វើឡើងរហូតដល់ថ្ងៃទី២៧ ខែសីហាទើបបញ្ចប់ទៅវិញដោយមានការចូលរួមពីកងទ័ពកូរ៉េខាងត្បូង១,៨ម៉ឺននាក់។ អគ្គសេនាធិការដ្ឋានកងទ័ពកូរ៉េខាងត្បូងប្រាប់ថាសមយុទ្ធយោធានេះធ្វើឡើងនៅថ្ងៃចន្ទដូចការគ្រោងទុក។ ដោយឡែក វិមានប្រធានាធិបតីកូរ៉េខាងត្បូងបញ្ជាក់ថាខ្លួនកំពុងពិនិត្យមើលឡើងវិញនូវសារនយោបាយរបស់លោកត្រាំដែលបង្ហោះនៅលើបណ្ដាញសង្គមដោយក្ដីសង្ឃឹមថាចំណងមិត្តភាពរវាងលោកត្រាំ និងលោកគីមជុងអ៊ុននឹងនាំទៅដល់ការសន្ទនាគ្នា និងការស្វែងរកសន្តិភាព និងស្ថិរភាពសម្រាប់ឧបទ្វីបកូរ៉េ។ ក្រុមសម្ព័ន្ធមិត្តនឹងបន្តសម្របសម្រួលទៅលើបញ្ហាការពារជាតិ និងការធ្វើសមយុទ្ធយោធា។
ឆ្លើយតបទៅនឹងការអះអាងរបស់លោកដូណាល់ត្រាំដែលថាប្រធានាធិបតីកូរ៉េខាងត្បូង លោកលីជេម្យុង មិនចូលរួមជាមួយអាមេរិកដើម្បីចាត់ការអ៊ីរ៉ង់នោះ វិមានប្រធានាធិបតីកូរ៉េខាងត្បូងអះអាងថារដ្ឋាភិបាលរបស់ខ្លួនកំពុងពិភាក្សាគ្នាថាតើត្រូវចូលរួមចំណែកខាងផ្នែកយោធាជាមួយអាមេរិកកម្រិតណា។ ទន្ទឹមនឹងនោះ រដ្ឋាភិបាលរបស់ខ្លួនក៏ត្រូវតែគិតគូរទៅដល់ការត្រៀមខ្លួនទប់ទល់នឹងបញ្ហាដែលកើតឡើងនៅឧបទ្វីបកូរ៉េ និងនីតិវិធីផ្សេងៗស្របទៅតាមច្បាប់ជាតិរបស់ខ្លួនផងដែរ។ លោកត្រាំចង់បិទបញ្ចប់គម្រោងធ្វើសមយុទ្ធយោធា ឬកាត់បន្ថយទំហំនៃសមយុទ្ធនេះតាំងពីយូរមកហើយ។ លោកក៏មានបញ្ហាទំនាស់ជាមួយកូរ៉េខាងត្បូងផងដែរពាក់ព័ន្ធនឹងការរ៉ាប់រងថ្លៃចំណាយលើការចិញ្ចឹមកងទ័ពអាមេរិក២៨៥០០នាក់។
កូរ៉េខាងជើងតែងតែប្រកាសថ្កោលទោសការធ្វើសមយុទ្ធយោធារវាងអាមេរិក និងកូរ៉េខាងត្បូង និងចាត់ទុកថានេះជាការត្រៀមវាយប្រហារមកលើខ្លួន។ អ្នកវិភាគមួយរូបគឺអ្នកស្រីជេនីថោន (Jenny Town) យល់ថាការដែលលោកដូណាល់ត្រាំសម្រេចចិត្តដូចខាងលើនេះអាចជាផ្នែកមួយនៃកិច្ចខិតខំរកឱកាសជជែកគ្នាផ្នែកការទូត។ នេះជាអ្វីដែលលោកត្រាំប្រាថ្នាចង់បានជាយូរមកហើយចាប់តាំងពីលោកឡើងកាន់អំណាចនៅអាណត្តិថ្មី។ ប៉ុន្តែបំណងប្រាថ្នានេះហាក់ដូចជាមិនសូវទាក់ទាញចិត្តកូរ៉េខាងជើងប៉ុន្មានទេ។ ប្រវត្តិទំនាក់ទំនងរវាងលោកត្រាំ និងលោកគីមក៏មិនល្អនឹងគ្នាប៉ុន្មានដែរ។ ការបោះដៃរកគ្នាកន្លងមកអាចជាការសម្ដែង ឬការធ្វើឱ្យតែល្អមើលប៉ុណ្ណោះ។ លោកត្រាំធ្លាប់បោះពាក្យបោះសម្ដីឱ្យលោកគីមដោយចាត់ទុកថាគាត់ជា «បុរសដែលចូលចិត្តបាញ់រ៉ុកកែត» ព្រមទាំងគំរាមវាយប្រហារកូរ៉េខាងជើងឱ្យវិនាសសាបសូន្យ។ លោកគីមក៏ធ្លាប់វាយប្រហារលោកត្រាំផងដែរដោយចាត់ទុកជាមនុស្សមានសតិមិនគ្រប់ ហើយលោកគំរាមវាយប្រហារអាមេរិកយ៉ាងខ្លាំងក្លា៕ ប្រភព៖ Reuters
ចែករំលែកព័តមាននេះ