រាជធានីភ្នំពេញ ៖ ក្នុងរយៈពេលមួយឆ្នាំ សមត្ថកិច្ចបានស្រាវជ្រាវ ស៊ើបអង្កេត រកឃើញ និងប្រតិបត្តិការលើទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ចំនួន ៧៥១ទីតាំង និងបានបិទសៀលទីតាំងចំនួន ៦០៥ទីតាំង មិនឱ្យមានសកម្មភាពទៀតឡើយ និងបានបញ្ជូនជនបរទេសចំនួន ២១,៦៦៦នាក់ មកពី ៣៨សញ្ជាតិទៅស្រុកវិញ នេះបើយោងតាមលេខាធិការដ្ឋាន នៃគណៈកម្មការចំពោះកិច្ចប្រយុទ្ធប្រឆាំង ការឆបោកតាមប្រព័ន្ធបច្ចេកវិទ្យា (គ.ប.ឆ.ប.) ។
ប្រភពបានលើកឡើងថា លទ្ធផលនៃការបោសសម្អាតឧក្រិដ្ឋកម្មឆបោកតាមប្រព័ន្ធបច្ចេកវិទ្យាចាប់ពីខែកក្កដា ឆ្នាំ២០២៥ រហូតដល់ថ្ងៃទី៣១ ខែកក្កដា ឆ្នាំ២០២៦ ដោយអនុវត្តតាមបទបញ្ជារបស់រាជរដ្ឋាភិបាល ការបោសសម្អាតការឆបោកតាមប្រព័ន្ធបច្ចេកវិទ្យា បានស្រាវជ្រាវ ស៊ើបអង្កេត រកឃើញ និងប្រតិបត្តិការលើទីតាំងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ចំនួន ៧៥១ទីតាំង និងបានបិទសៀលទីតាំងចំនួន ៦០៥ទីតាំង មិនឱ្យមានសកម្មភាពទៀតឡើយ ។
ក្នុងប្រតិបត្តិការបោសសម្អាត សមត្ថកិច្ចបានស្រាវជ្រាវ និងស៊ើបអង្កេតតាមបណ្ដាទីតាំងកាស៊ីណូ ដែលមានអាជ្ញាបណ្ណសរុបចំនួន ១៩៥ និងបានឈានទៅដកហូតអាជ្ញាបណ្ណចំនួន ២០កាស៊ីណូ និងបានព្យួរអាជ្ញាបណ្ណចំនួន ២៩កាស៊ីណូ ពាក់ព័ន្ធនឹងសកម្មភាពឆបោកតាមប្រព័ន្ធបច្ចេកវិទ្យា ខណៈកាស៊ីណូចំនួន ២៣ បានផុតសុពលភាព និងផ្អាកដំណើរការអាជីវកម្ម ។
ជាងនេះបើគិតចាប់ពីខែកក្កដា ឆ្នាំ២០២៥ មកដល់ខែកក្កដា ឆ្នាំ២០២៦ អាជ្ញាធរកម្ពុជា បានសង្គ្រោះ និងអនុវត្តនីតិវិធី ដើម្បីធ្វើមាតុភូមិនិវត្តន៍ជនបរទេស ចំនួន ២១,៦៦៦នាក់ មកពី ៣៨សញ្ជាតិ ភាគច្រើនជាជនជាតិចិន វៀតណាម ប៉ាគីស្ថាន ឥណ្ឌូនេស៊ី បង់ក្លាដេស និងឥណ្ឌា ។
ក្នុងរយៈពេលដូចគ្នា សមត្ថកិច្ចបានកសាង និងបញ្ជូនសំណុំរឿង ចំនួន ៣៨៨ករណី ទៅតុលាការ និងជនសង្ស័យ ៤,១៤៧នាក់ រួមមានមេខ្លោង និងគូកន ចំនួន ២៧សញ្ជាតិ ត្រូវបានចោទប្រកាន់តាមនីតិវិធីច្បាប់ ៕
ចែករំលែកព័តមាននេះ