កម្លាំងយោធាឃាត់ខ្លួនជនសង្ស័យ២នាក់លួចនាំចូលទំនិញថៃចូលទឹកដីកម្ពុជា
- បន្ទាយមានជ័យ
ខេត្តបន្ទាយមានជ័យ ៖ នៅថ្ងៃទី១៥ ខែសីហា ឆ្នាំ២០២៦ នេះ កម្លាំងយោធាការពារព្រំដែនតំបន់អូរបីជាន់ បានឃាត់ខ្លួនជនសង្ស័យចំនួន២នាក់ ព្រមទាំងរទេះចំនួន២គ្រឿង ដែលលួចដឹកទំនិញខុសច្បាប់ចូលពីប្រទេសថៃ មកកាន់ទឹកដីកម្ពុជា ស្ថិតក្នុងភូមិសាស្ត្រឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
យោងតាមផេកផ្ទាល់ខ្លួនរបស់លោកឧត្តមសេនីយ៍ទោ សេង ធារិន មេបញ្ជាការរង និងជាសេនាធិការយោធភូមិភាគទី៥ បានឱ្យដឹងថា ទំនិញដែលដកហូតបានរួមមាន ស្កុត និងកាវបិទរុំម្ហូបជាច្រើនការ៉ុង ហើយជនសង្ស័យទាំងនោះ ត្រូវបានបញ្ជូនឱ្យសមត្ថកិច្ចជំនាញចាត់វិធានការតាមផ្លូវច្បាប់ ។
ចំណែកឯឯកឧត្តម ប៉ាន់ខែម ប៊ុនថន ក្រុមការងាររាជរដ្ឋាភិបាលចុះជួយមូលដ្ឋានក្រុងប៉ោយប៉ែត បានលើកឡើងតាមបណ្តាញសង្គមដោយសម្តែងការសោកស្តាយ និងទទូចថា «តើមានគិតអាណិតដល់កងកម្លាំងដែលកំពុងឈរជើងការពារជាតិ និងទឹកដី និងអាសូរដល់ជីវិតវិរៈកងទ័ពទេ ដែលបានពលីក្នុងសមរភូមិ? តើពេលណា ទើបចេះឈឺចាប់ ហើយចូលរួមធ្វើពហិកាឈប់ប្រើប្រាស់ទំនិញថៃ?» ។
មន្ត្រីនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យបានបញ្ជាក់ថា ទទួលបានព័ត៌មានពីកម្លាំងជួរមុខថា ក្រៅពីករណីនេះ កាលពីថ្ងៃទី១១ ខែសីហា ឆ្នាំ២០២៦ កន្លងទៅ នៅស្រុកម៉ាឡៃ កម្លាំងយោធាសហការជាមួយនគរបាលការពារព្រំដែនគោកលេខ៨១៥ ក៏បានចាប់ទំនិញលួចនាំចូលពីថៃចំនួន១រទេះ ដែលជាសាច់បង្កកទម្ងន់ជាង១តោនផងដែរ ប៉ុន្តែជនល្មើសបានគេចខ្លួនបាត់ ។
ទាក់ទងនឹងបញ្ហានេះ ប្រជាពលរដ្ឋបានទទូចសុំឱ្យកម្លាំងសមត្ថកិច្ចឈរជើងតាមបន្ទាត់ព្រំដែនទាំងអស់ បង្កើនការសហការគ្នាទប់ស្កាត់ឱ្យបានតឹងរ៉ឹងបំផុត ចំពោះការលួចនាំចូលទំនិញពីប្រទេសថៃ ខណៈដែលប្រជាពលរដ្ឋខ្មែរទូទាំងប្រទេសកំពុងចូលរួមធ្វើពហិការឈប់ប្រើប្រាស់ទំនិញទាំងនោះ និងស្នើសុំឱ្យស្រាវជ្រាវចាប់ខ្លួនក្រុមឈ្មួញទុចរិតយកមកផ្តន្ទាទោសតាមច្បាប់ ។
ចែករំលែកព័តមាននេះ