សោ.កសៅ ! ទារកអាយុជាង ៣ខែបានបា.ត់បង់ជីវិតគួរឱ្យសង្វេគ នៅទារកដ្ឋានមួយកន្លែង
- ភ្នំពេញ
រាជធានីភ្នំពេញ៖ ទារកអាយុជាង ៣ខែម្នាក់ ដែលឪពុកម្ដាយជាប់រវល់ធ្វើការ ហើយយកទៅផ្ញើរនៅទារកដ្ឋានមួយកន្លែង ទើបតែបានរយៈពេល ៥ថ្ងៃប៉ុណ្ណោះទារកនោះក៏មានជំងឺ ។ ពេលនោះខាងអ្នកថែទាំបានច្រកថ្នាំផ្ដាសាយក្ដៅខ្លួនរួច ស្រាប់តែទារកខាងលើស្រែកយំរហូតហូរឈាមតាមច្រមុះរួចប្រកាច់ បន្ទាប់មកអ្នកថែទាំក៏បញ្ជូនទៅសង្គ្រោះនៅគ្លីនិកឯកជន ។ ប៉ុន្តែពេលទៅដល់គ្រូពេទ្យបានប្រាប់ថា ទារកនោះបានស្លាប់ហើយ សង្ស័យបណ្ដាលមកពីជំងឺគ្រុនឈាម ទើបនាំយកសពត្រឡប់ចូលទារកដ្ឋានវិញ រួចជូនដំណឹងទៅឪពុកម្ដាយទារកនោះ និងសមត្ថកិច្ចចុះទៅពិនិត្យ ។
ហេតុការណ៍ខាងលើបានកើតឡើងកាលពីវេលាម៉ោងជាង ៨ព្រឹក ថ្ងៃទី ២១ ខែសីហា ឆ្នាំ ២០២៦ នៅក្នុង «ទារកដ្ឋាន និងមត្តេយ្យសិក្សា ខេមឃីដ» ដែលមានទីតាំងស្ថិតនៅក្នុងភូមិដំណាក់ត្រយឹង សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ ។ ទារកដែលស្លាប់នោះឈ្មោះ អាត ហុងវៃ អាយុ ៣ខែកន្លះ មានម្ដាយឈ្មោះ ម៉ី ណារីន អាយុ ២១ឆ្នាំ មុខរបរកម្មការិនីរោងចក្រ និងឪពុកឈ្មោះ ហូ ហុងលី អាយុ ២១ឆ្នាំ មុខរបរកម្មកររោងចក្រ មានទីលំនៅបច្ចុប្បន្នភូមិក្រាំងដូនទៃ សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ ។
បើតាមបុរសម្នាក់ដែលជាជីតារបស់ទារកខាងលើបាននិយាយថា កូនស្រីគាត់និងកូនប្រសារបានយកកូន (ទារក) ទៅផ្ញើរទារកដ្ឋាន និងមត្តេយ្យសិក្សា ខមឃីដ នេះទើបតែបានរយៈពេល ៥ថ្ងៃប៉ុណ្ណោះ ដោយផ្ញើរចាប់ពីថ្ងៃចន្ទ ដល់ថ្ងៃសុក្រ និងចាប់ពីវេលាម៉ោង ៦ព្រឹក ដល់វេលាម៉ោង ៦ និង ៣០នាទីល្ងាច ក្នុងតម្លៃ ១ខែ ៥០ដុល្លារ ហើយក្រោយពេលចេញពីធ្វើការឪពុកម្ដាយបានទៅយកត្រឡប់ទៅផ្ទះវិញ ។ គាត់បានអះអាងថា ក្នុងរយៈពេល ៣ខែដែលនៅជាមួយឪពុកម្ដាយ ចៅប្រុសរូបនោះមានសុខភាពល្អជាធម្មតាទេ មិនមានជំងឺអ្វីធំដុំឡើយ ហើយប្រសិនបើចៅគាត់ឈឺធ្ងន់ធ្ងរ ក៏ខាងទារកដ្ឋាននោះមិនទទួលមើលថែដែរ លុះឥឡូវពុំដឹងថា យ៉ាងម៉េចទេទើបអ្នកថែទាំច្រកថ្នាំរួចបែរជាស្លាប់បែបនេះ ។
ចំណែកស្ត្រីដែលត្រូវជាជីដូនបាននិយាយថា នៅវេលាព្រឹកថ្ងៃកើតហេតុ ខណៈពេលនាំកូនទៅដល់ទារកដ្ឋានខាងលើ ដោយឃើញកូនរបស់ខ្លួនហាក់ចង់មានជំងឺផ្ដាសាយ ឪពុកម្ដាយទារក៏បានប្រគល់ថ្នាំផ្ដាសាយក្ដៅខ្លួន ដែលបានបើកពីមន្ទីរពេទ្យកុមារជាតិកាលពីជាង ១ខែមុនឲ្យទៅខាងអ្នកថែទាំ ដើម្បីទុកច្រកនៅពេលកូនផ្ដាសាយក្ដៅខ្លួន ។ ពេលនោះក៏បានប្រាប់ទៅអ្នកមើលថែថា បើច្រកថ្នាំសូមកុំច្រកផ្ទាល់ គឺលាយនៅក្នុងទឹកគោឲ្យបៅទៅ បន្ទាប់មកឪពុកម្ដាយក៏បានចេញទៅធ្វើការបាត់ទៅ រហូតដល់វេលាម៉ោងជាង ៨ព្រឹក ស្រាប់តែខាងបុគ្គលិកទារកដ្ឋានខាងលើបានខលប្រាប់ថា ចៅប្រុសគាត់ស្លាប់បាត់ទៅហើយ ។
ស្ត្រីរូបនោះបាននិយាយបន្តទៀតថា ពេលសួរនាំពីមូលហេតុដែលបណ្ដាលឲ្យស្លាប់នោះ ត្រូវបានខាងទារកដ្ឋានខាងលើប្រាប់ថា ពេលឃើញចៅប្រុសគាត់មានជំងឺអ្នកថែទាំក៏បានយកថ្នាំនោះច្រកដោយផ្ទាល់មិនបានលាយក្នុងទឹកដោះគោឲ្យបៅនោះទេ ។ លុះក្រោយពេលច្រករួចចៅប្រុសគាត់បានយំយ៉ាងខ្លាំង ហើយក្រោយមកក៏ស្រាប់តែហូរឈាមតាមច្រមុះរួចក៏ប្រកាច់ បន្ទាប់មកខាងទាកដ្ឋាននេះបានបញ្ជូនទៅសង្គ្រោះនៅគ្លីនិកឯកជន ។ ប៉ុន្តែពេលទៅដល់គ្រូពេទ្យបានប្រាប់ថា ចៅប្រុសគាត់ស្លាប់ហើយ សង្ស័យបណ្ដាលមកពីជំងឺគ្រុនឈាម ទើបនាំយកសពត្រលប់ចូលទារកដ្ឋានវិញ រួចជូនដំណឹងទៅឪពុកម្ដាយ និងក្រុមគ្រួសារបានដឹង ។
សមត្ថកិច្ចបានប្រាប់ថា ក្រោយពេលកើតហេតុកម្លាំងប៉ុស្តិ៍នគរបាលរដ្ឋបាលចោមចៅទី ២ បានរាយការណ៍ជូនកម្លាំងការិយាល័យបច្ចេកទេស និងវិទ្យាសាស្ត្រនៃស្នងការដ្ឋាននគរបាលរាជធានីភ្នំពេញ ចុះទៅធ្វើកោសល្យវិច័យ ។ ប៉ុន្តែនគរបាលពុំទាន់ប្រាប់ឲ្យដឹងពីលទ្ធផលនៃការធ្វើកោសល្យវិច័យនៅឡើយ ហើយក៏ពុំទាន់ដឹងថា តើរឿងនេះបញ្ចប់ទៅវិញដោយរបៀបណាដែរ ៕
ចែករំលែកព័តមាននេះ